立場新聞 Stand News

導火新聞線電影版之深宵問答

2016/8/11 — 10:57

《導火新聞線》截圖

《導火新聞線》截圖

作者圖注:達叔,你咪撚傻啦,2014年有班友瞓咗幾個月街,癱瘓咗一小部分港島同旺角幾條街,都見唔到特首.....你拎住個核彈,條友都只會搭飛機放假,拎住五千萬去嘆世界。

留意,含少量劇透。同埋,深宵一take過出文,無人睇過錯別字。
.
.
.
.
.
留意,係含《寒戰II》呢套仆街戲嘅劇透(我會鞭呢套戲嘅屍鞭到有替代品為止)。當你發現問與答呢種形式又出現,你就知道我無時間諗篇文嘅結構,純粹諗到乜就寫乜。

問:《導火新聞線電影版》好睇嘛?
答:好.好.睇。

廣告

入場前有啲怕套嘢純為cap水而拍(我仲記得蕭定一套3D肉蒲團同雷凱欣爆波嗰幕呀你老味!「老夫就係極樂老人李長周」,哈哈哈哈哈)。但睇完《導火新聞線電影版》,喜出望外,完全無失望。

問:點解好睇?
答:一套戲好睇,要有幾樣元素,好演員、好劇本,同敍事流暢(靠燈光、攝影、導演、配樂同其他支援)。信我,呢套戲吳孟達真係由頭帶到尾,堅勁,帶到觀眾入戲。套戲90分鐘,但有兩三個位係會睇到你感動同眼濕濕,完全係達叔嘅功勞。

廣告

至於方凝、阿咩同男神王宗堯,對唔治,可能因為達叔先係主角(寫咗四千次達哥,怕大家誤會係蔡思貝先改返),佢哋三個嘅戲份好少,連達叔嘅車尾燈都見唔到;另外一眾配腳,例如你終於講得出佢個名而唔係「陳寶珠個仔」嘅楊天經、Emily、麗雲姐,sorry,真係連上鏡嘅機會都無乜。

講起男神宗堯BB,如果今日煙仔仲賣得廣告,萬記幾錢都要搵男神做代言人,佢食煙真係好撚型。再瘦啲嘅王宗堯,根本就係竹野內豐嚟。

王宗堯 Facebook 圖片

王宗堯 Facebook 圖片

至於劇本,由電視版嘅潘漫紅寫,簡單直接,交晒功課,有資料搜集,有根有據(屌你老味唔係寒戰II咁無端端幫香港整條特赦法出嚟,stop and get out!),高潮起伏。拍得好流暢,好緊湊。

題外話,要成為一套爛片,好演員、好劇本,同敍事流暢,只要其中一樣倒轉就夠,兩樣倒轉可以輕易榮登當年嘅爛片之王(例如寒戰II。可惜今年有套強敵超人對蝙蝠俠)。有晒三樣,你就係黃精甫。

問:你係唔係收撚咗錢賣廣告?
答:戇鳩!錢我冇咩?你覺得錢可以令我喺自己檔嘢度賣廣告? 

其實係可以。哈哈哈哈哈……不過唔係《導火新聞線》,而係《寒戰》。好多人睇完我屌柒《寒戰》套影評話想入場......香港人真係痴撚線。但垃圾就係垃圾,好戲就係好戲,呃到人一時,呃唔到一世。幾千萬票房又如何?寒戰系列導演嘅戲,我呢世都唔會再睇(註)。

無收錢還無收錢,《導火新聞線》的確有瑕疵(下含劇透):

-無咗梁小冰。

-莊思敏嗰幕戲(亦係唯一一幕),生硬、造作令我想鎅櫈再繼而懷疑蕭定一/導演方俊華同佢有路。Thanks god 如果莊思敏出現並開始講嘢,你可以放心去廁所,唔睇會令成套戲加分。

-有幾度劇情無厘頭/無下文:邊撚個係《囧報》嗰老闆阿莊,邊度走出嚟?後嚟特首話要打畀阿莊,跟住呢?電話無電?

-說教味太重。阿方凝講道理嗰幕,畀枝粉筆你教書好唔好?

-套戲太短,放棄咗角色嘅交流同情緒嘅收發,好多情感變得兒嬉(你老味男神係天台傾兩句就身心舒暢,起碼食一包煙先啦)。

最大問題係《閃報》嗰條線。點解仆街嘢係香港記者做(睇住個細路女有危險而見死不救),有道德同骨氣嗰個係內地實習生?sorry~~ I can’t agree with that.

問:套戲有冇乜嘢 take away?
答:please call 23382338 for Mcdonald take away service. 

sorry點半寫文好肚餓。經典嘅戲,除咗上面三樣元素,仲多一項,就係(i)前無古人或者(ii)唔同人睇有唔同嘅感受。

前無古人好簡單,你拍啲無人拍過嘅題材(點解異形係經典,宮崎駿嘅天空之城係經典)、第一個用某種特技或者拍攝手法(某程度嚟講黃精甫拍嘅都係經典)。

唔同人睇有唔同感受,呢個堅難。

《導火新聞線電影版》主旨,就係想講紙媒/記者/傳媒人喺網絡世界下點生存,同埋點擊率vs做好新聞/新聞道德之間嘅取捨。

講紙媒/記者/傳媒人喺網絡世界下點生存,係全世界嘅事。John Oliver呢條片,詳盡咁講咗美國嘅地方報紙生存有幾困難。條片我睇咗兩次:



對於點擊率vs做好新聞/新聞道德之間嘅取捨,並唔係新鮮事。以前狗仔隊盛行,一樣有咁嘅討論;不過(1)今日香港人對所謂明星嘅興趣已經跌到去負數,(2)真正堅嘅嘢根本狗仔隊跟唔到(你只要一個陳冠希就夠你做足幾十日頭條),(3)藝人濫用狗仔隊(哎呀,阿誠嫂唔好意思,我哋行到你面前偷拍)同(4)網媒+網上媒體湧現,今日點擊率先代替咗昔日狗仔隊嘅地位。

沒有它都會有別人,點擊率好、狗仔隊好,其實代表緊嘅係市場需求同報社收入(仲有記者人工)。講穿就係錢vs道德嘅問題-我覺得兩樣嘢喺某程度上有矛盾,但唔係好簡單咁有你無我。請讀返一次殷海光嘅《人生的意義》,認真的。

新聞係用嚟傳遞訊息,即係要有receiving end先得。你覺得好嘅新聞,但無人睇,得你自己話正,孤芳自賞,咁你只係自high。

但係咪多人睇嘅就係好新聞?唔係。

點取捨?我唔識教人。我淨係知人生從來都係80-20:

我做十件事,當中有八件,係我未必完全鍾意,但做咗有錢、有本錢;然後我可以負擔去做其餘嗰兩件事。

我一路都抱住咁嘅心態去做人、返工、應酬,甚至乎寫文都係。我寫嘅十篇文,當中有一兩篇係未必好想寫但我知道會有人睇、好多人有共鳴、更多人share,例如男女關係、兩性討論,煽動仇恨嘅題材,要寫,寫到世界末日都未寫完。跟住呢,我有信心可以用好多時間同心機,寫啲唔會有人睇到尾、睇完都唔share嘅嘢(例如呢篇,同埋好多技術文)。又例如,上面無咁撚多gag、咁多無謂嘢,篇文二千幾字你點會睇到呢段呀?

但我唔會畀like 同share帶住我走,我會驚惕自己呢啲嘢一篇起兩篇止。做報館可唔可以咁?我無答案。

講起技術文,一啲充滿數字同推算嘅文字,我開頭寫,只係為自high(第一篇好似係計,如果來港未滿七年可以拎綜援,政府要洗多幾多錢)。你要知道,有50%香港人,當中90%係女人,見到非股價嘅數字真係會頭暈身慶唔舒服。我要迫人睇,所以寫越簡單、越直接越好,寫寫寫,慢慢真係會有人睇,同發現錯處(有人睇嘅最佳證明)。

我唔相信好嘅嘢會無人睇,亦唔覺得市場受歡迎嘅嘢就係bad taste(王晶而家嘅戲另計)。《導火新聞線》講咗少少點樣靠網絡世界去令人睇新聞(例如懶人包),現實世界亦有人靠網上籌旗去做好嘅新聞(Factwire)。

最後,上面嗰段嘅第一句,我講出嚟都唔係幾好意思:因為《導火新聞線》咁正,今晚黃埔戲院都只係得三十人。香港人中意juicy、要noise,寒戰II垃圾到賓周見骨收幾千萬-事實上賓周係無骨嘅,自殺特工隊劣評如潮啲人都要去睇,我有時覺得,香港啲港產片、港資報紙死亡,到最後香港冧撚埋檔,唔多唔少係自己攞嚟。

───

註:除非林嘉欣全裸演出。講笑。其實我睇過-發夢嗰陣。

───

頭盔:

-有人送咗贈券畀我(多謝Joey Chau),但我係買飛入場嘅。

-呢篇唔係膳稿,我唔會透過寫呢篇嘢,從任何公司/網頁或其他團體得到任何形式嘅報酬。你唔真係以為係寒戰班友畀錢叫我寫呀嘛? 

 

史兄 facebook

發表意見