AC

AC

立場 Green 、科學版編輯,閑時鐘意飲飲食食。

2018/4/16 - 19:17

【小食堡】長沙灣小店食人情味

回想十幾年前,還住在大角咀之時,樓下有間小店賣煎釀三寶,雖然不是即叫即炸,但個叔叔好有人情味,寫明十蚊六件係都會比多一兩件呢個死肥仔。當然,炸雞髀、煎釀三寶這類炸物最緊要熱辣辣,但要「即叫即做」一定要等,趕住掃街的人會唔會因為咁繼續排隊買?

深水埗元州邨對面就有間小店叫小食堡,迄立這裡超過十幾年,除了燒賣、腸粉外,其他小食真的即叫即炸,等起上來動輒更要 15 分鐘,日日依然有街坊長龍排住等食捧場,夠神奇吧?又,真的這麼好吃嗎?

廣告

好彩這天行過無乜人,立刻狗衝。等食時老闆娘向熟客呻老公想放個長假,不過一放假又心囉囉攣要開工,形容是賤骨頭。相信點解排半個鐘都有人願意等,就是老闆夫婦那副敬業精神與笑容。忙到踢晒腳都繼續同客吹水,這是現今香港少見的境況。

老闆炸雞髀

老闆炸雞髀

這裡皇牌是那隻大過我拳頭的炸雞髀 ,排隊的人十個有八個都點炸雞髀(先蒸後炸,亦有只蒸版本),但當街扯住雞髀來食我一定會吃到變「污糟貓」,所以還是選吃煎釀三寶吧。值回票價嗎? $14 有四件(去年只是 $12 ,通脹無辦法喇)我覺得還好,至少落足料,即炸即放上碟,不會像旺區的三寶紙咁薄或「食陣風落肚」都收廿雞,完全對得住良心。重點是保証你吃的不會擺了數小時嘛!

煎釀三寶(四件) HKD14

性價比:3.2/5

好食:3.2/5

衛生:3.2/5

小食堡

地址:長沙灣元州街 340 號地下 2 號舖

營業時間:星期一至六 14:00 - 21:00

只收現金

原刊於作者 Instagram