立場新聞 Stand News

帶著茅廁去工作:好多人以為喺澳洲做嘢,等於唔駛做嘢

2016/7/6 — 14:33

作者製圖

作者製圖

好多人以為,喺澳洲做嘢, 係等於唔駛做嘢嘅;

又有好多人以為,喺澳洲做嘢係一定可以準時收工嘅。

我可以話你聽, 首先頭一項呢, 就一定無可能;

廣告

至於第二項呢, 就睇你做邊行、咩職位、入中咩公司、好唔好彩等等。

首先講喺澳洲做嘢有無可能唔駛做呢? 咁如你換個角度諗, 如果有一個職位係唔駛做嘅, 咁點解一開始會有呢個職位創造出來呢? 加上而家市道唔好, 無乜公司會咁樣駛錢, 據聞以前嘅礦業公司係有好多錢咁樣灑, 但近呢幾年mining boom 大勢已去, 所以再無呢的 “筍工” 職位了。

廣告

然後講準時收工嘅問題, 其實準唔準時收工, 真係好睇你做咩行業、職位, 例如你做超市的, 如果你係收銀, 據我所知, 大多數係可以夠鐘收工, 只要你隊個牌出來截住條隊 (無錯, 就係我地排隊最唔想見到的 “Sorry, this check out is closed”); 如果你係經理, 今日又有少少麻煩嘢, 例如邊個茂里做錯乜, 的貨又唔知去左邊等等, 可能你都要留低執一執手尾佢。

超市的情況我都係聽講的, 銀行的情況個人就比較清楚, 如果你喺櫃位負責現金提存嘅同事, 只要你埋到數, 通常都可以準時走嘅。有同事話, 其實就算埋唔到數, 理論上夠鐘就可以走, 咁但係理論上係一回事, 事實上我就真係未見過未埋到數佢地可以走, 唔通你數錢數到一半掉低晒所有嘢行左去咩… 咁呢個情況之下係無乜可能實際走到嘅。

至於banker, 駛唔駛超時工作, 真係好睇個人表現同選擇。首先, 我地嘅工作量, 係無定嘅, 因為我地嘅工作就喺幫公司搵客, 咁你如果好多客, 當然你需要搵更多客嘅時間就相對減少 (因為你已經有好多客啦嘛, 各位同學數學上明唔明先?), 但你多左客嘅同時, 亦都少左時間去處理有多無少嘅paper work、電腦紀錄, 文件跟進等; 呢間公司, 每一個你搵過嘅客, 不論佢地同意上來見你, 定係無興趣, 只要你同佢地對話過, 都要做番電腦紀錄, 加上有時的文件唔係話即刻即日做得晒, 而係要等呢個補呢樣… 等果個補果樣… 又轉來轉去 email + fax 去幾個不同部門, 而佢地又互相彈來彈去, 有時就要等個客補文件, 又會補錯、又會補漏, 又或者完全無左件事; 而另外有的客呢, 就會喺約左你之後, 不停咁改期改期又改期, 你就要改完改完又再改個電腦紀錄… (然後由段初再由頭再loop過) 咁你要做嘅工作就會做極都做唔完喇…

 

留言吹水 www.facebook.com/HiMrRoo

發表意見