立場新聞 Stand News

帶著茅廁去旅行(二):破解「去外國工作」迷思

2016/5/9 — 18:23

《星期日檔案》截圖,圖由作者提供

《星期日檔案》截圖,圖由作者提供

拿,首先…經過左之前幾年嘅working holiday熱潮(無錯,已經凍晒),好多人都開始諗,認真去澳洲發展嘅可能性。唔知點解,近排突然好多人私訊我問關於移民同工作嘅野(係咪香港有咩移民電視節目我唔知?),而且大都係有家庭,或者諗住建立家庭,想過來認真發展、落地生瘡嘅朋友。

呢啲朋友,想同你地講聲,唔駛覺得上來我個facebook運吉又唔買野唔好意思,其實我係樂於分享嘅,如果唔係都唔會寫咁多(廢)文啦。不如等我一次過講多少少,解答下大家疑惑啦(反正你班茂里都係運吉架喇)。

睇完有野問可以直接上我個專頁hi我,唔好太大力。

廣告

迷思1:如果我(或者我另一半)英文唔好,係咪只可以做洗碗呢?

分享1:當然唔係啦,你都可以選擇洗碟嘅。

廣告

講笑。其實真係唔一定,如果你本身有專長,例如美術、駕駛、技術(包括科技或任何工程/建築/維修/落手落腳啲工作),你語言方面係唔需要好top嘅,大前題係你要溝通到,日常生活同日常工作其實用來用去講來講去都係果啲,只要你生活一排慣左本地口音同俗語就可以。

改善方法:可以上youtube搵啲澳洲口音來聽下,第一步,係睇教學短片教單字,如果完全吸收到無問題就去下一步:對話。無電視劇(澳劇大多好膠啲),睇下啲日常對話,飲食或者旅遊特輯等都可以。如果你掌握到單字、句子、對話,咁其實已經無問題架喇。

迷思2:我英文(自己覺得)OK,又唔係真係native或者abc,但係溝通到,間中可以講下笑,我可以做office文職嗎?

分享2:拿,呢個係土地問題。如果你調番轉頭諗呢,係香港,你想入一般公司做個正常文職,識廣東話係基本(外資公司高層唔講啦,果啲其實唔係主流),但公司請唔請你,主要唔係睇你識唔識廣東話丫嘛,而係睇你有無能力做果件工作嘅(知識、經驗呀乜乜乜)。咁你將呢個情況套番落澳洲,都係一模一樣架唧,只係由翡翠台轉左做明珠台咁解。如果你本身係香港都無乜知識經驗呢,咁你就係亞洲電視台喇。

迷思3:我想知歧視嚴重嗎?

分享3:呢個呢,就未必係膚色問題,可能係你自己嘅問題。據非正式統計(即係我自己同網上三唔識七啲人覺得),歧視華人最勁嘅,就係華人囉。曾經有個華人老闆同我講我唔可以去見客,因為我係華人樣,啲客見到我個樣公司就已經唔會有生意喇(喂?我真係咁樣衰?)佢仲話佢同佢啲仔女都係咁講,就算佢地係係度出世長大嘅,澳洲人都會因為你個樣係華人而歧視你。

當然,呢個只係其中一部份華人嘅睇法(即係佢自己覺得)。

我自己覺得(又即係另一個非正式統計):

情況1:  如果因為你英文唔好、溝通唔好以致工作表現差,或者語言無問題但純粹工作表現差,咁唔係因為你個膚色種族歧視你,係因為你真係做唔到野丫嘛。

情況2:  如果人地純粹因為你個膚色種族,即係離遠望到已經唔中意你,咁就真係歧視。

情況3:  如果近距離望到你先唔中意你嘅,都未必關個膚色種族事,可能純粹係你自己樣衰。

情況4:  如果你響火車上面大便令到人地唔中意你,咁唔知係唔係歧視你,但你應該纜片,或者自己帶著茅廁去搭車。

如果你睇完有問題嘅,可以上來facebook專頁問我,但請唔好問埋啲太空泛或者太無準備過嘅問題。例如呢:

澳洲而家搵工易嗎?

有咩好工推介?

呢類。

如果我過左一日都未答你,有可能係我唔得閒未覆得切,因為我其實都係一個要食飯嘅生物來嘅,即係包括返工、準備食飯(即係要煮啦)、真係食飯、收拾食完飯、處理專頁同網站、買貨執貨出貨等等,亦都有可能係你問題太空泛,或者純粹係你太樣衰。

搵日同大家分享一下其中一個澳洲白領工作嘅真實情況。

 

作者簡介

發表意見