立場新聞 Stand News

平凡是福 特別是在童年時

2015/12/3 — 15:31

少有一些事情,是我會比老婆更能夠睇得開的。

講嘅,係囝囝不獲名校取錄嘅事。

小學入學面試,大部份都塵埃落定。因為我係舊生嘅關係,所以老婆話,不如都幫囝囝報名搏吓啦。我話:「報吓名冇所謂,不過幾千人考,最後取錄得一百幾十個,即使係舊生其實都有一大籮,要明白取錄嘅機會,真係好微好微的。」

廣告

結果出爐,一如所料冇得中獎。我見老婆好似有啲啲失望咁,於是我同佢講:「都預咗唔得架啦,何必失望呢?」

老婆話:「我又唔係真係好唔開心,不過買咗條六合彩,總奢望佢會中獎嘛。咁知道中唔到獎,都總有幾分鐘失落嘅。」

廣告

老婆同我一樣,對囝囝入到名校既期望唔高,所以情緒算係冇乜大起伏。不過,關於這種事情,女人總係會比男人著緊一些。

這幾天,跟同樣有孩子下年親入讀小學既家長傾開計,當然係有人開心有人愁。但總括嚟講,還是愁既比較多。同我囝囝一樣,考唔到名校既還真不少。當中有些家長的情緒也有點崩潰了。老生常談係:「入到名校也未必一定快樂」,又或是「讀咗名校都唔代表長大後一定成功」諸如此類。這些道理,大家都知,只是到願望落空的一刻,大家還是會有點難接受。

做了幾年家長,我發覺好多家長嘅通病,係會不自覺的高估自己嘅孩子,總覺得孩子聰明醒目,雖未必係個top talent,但總會屬於「比大部份人好啲」嘅一群。名校收生,本來就係要收top talent,三千人耶錄一百人,還未計有些有特殊關係嘅應考生,即是你最少都要揮低二千九百人,先可以掹車邊入到去。好多家長報考既時候,諗住自己既孩子應該會stand a chance,但假設這些面試係公平的話,只係覺得,孩子應該「比大部份人好啲」嘅話,坦白講,應該係唔夠的。

問題係,要將孩子由「比大部份人都好啲」,提升到「比99%人都強」嘅水平,要付出幾多代價?我常跟老婆講一個比喻:「為咗要中一次六合彩頭獎,於是花錢買一個六合彩全餐」,值唔值?只能夠講,我自己就肯定買唔起。

認識有些家長朋友,她們說自己之所以失望,是因為要接受現實,自己的孩子原來不是精英。唉,老土點講句,細細個做精英有咩好?除咗會有一刻光輝之外,往後的童年盡是高處不聲寒嘅日子。這個嘛,信我,我是過來人。

平凡是福,特別是在童年時。共勉之。

*****

收到好朋友送來的聖誕禮物,我家的兩位反斗星,在故事書裡讀到自己的名字,發現自己變成了故事書裡的主角,開心到瘋了。

特此多謝送書給他們的靚女姐姐。

作者facebook專頁

發表意見