立場新聞 Stand News

年輕二十年

2017/1/13 — 15:49

人到中年,為自己做過的事情後悔,作者覺得非常正常,不過.......(資料圖片)

人到中年,為自己做過的事情後悔,作者覺得非常正常,不過.......(資料圖片)

朋友生日,一班中年男人坐埋一齊。席間有個唔識趣嘅人嘆晒氣咁拋下一句:「X! 如果俾我後生番二十年就好囉。」

講一句如此嘅話,係註定俾人柴台的。講得呢句,證明你對過去二十年嘅人生有後悔,於是你發夢可以回到過去,可以修正錯誤。以四十歲人嘅人生經歷同智慧,去修正你二十歲時因為年少無知而犯下嘅「錯誤」,呢個如意算盤打得響嗎?當然唔得。最簡單嘅原因係,沒有當日年少無知亂打亂撞嘅經歷,你又何來會有今日嘅自己?所以講乜都係嘥氣。

人到中年,為自己做過的事情後悔,我覺得正常不過。人生行到這裡,好同唔好多少都定了型。其實可唔可以好一啲?應該可以的,但中年人口中的方法往往是,當年如果我點點點,又或者我冇點點點,人生就可以好好多囉…諸如此類。老老實實,我聽過唔只一個朋友講過,話如果當年唔係心軟同阿邊個結咗婚,佢嘅人生就唔會搞成咁…Come on James,人生,係真係冇「如果」的,死蠢。

廣告

後悔,等於承認自己曾經係愚蠢。所以好多人會死撐自己「從來不會為自己做過嘅事情後悔!」。好型呀頂你。好失禮,呢句話我曾經都講過,但撫心自問,人生會後悔的事其實真係何其多?由小事彷如「冇俾心機讀書」,到讓人揪心嘅「冇好好陪伴家人」,通通都讓人後悔莫及。要數,數到天光都未完。在我這條水蛇春咁長的「後悔List」當中,有一項我是挺介意的,就是後悔,應該快樂是沒有盡情享受快樂。明明遇到值得開心的事情,卻因為當中的一些不完美,而將應有的快樂收藏起來。你滿以為,你該為這些不完美的地方而板起臉來,但當二十年之後你回望過去,你卻發現,最快樂的日子原來已經過去。當日你以為,因為the best is yet to come,所以可以放任自己不去享受快樂,原來the best在你年輕時,早就出現了。

OK,世上是沒有如果的。我亦冇可能變回二十歲。唯一可做,是提醒自己,有得happy的時候,就盡情happy吧。不然的話,下一個二十年我又要再後悔多一次。

廣告

除此之外,我還會安慰自己,起碼我唔會因為同咗阿邊個結婚生仔搞到覺得自己嘅人生又點樣點樣折墮。淨係咁,已經應該值得高興了。中年男人,後悔自己娶錯老婆的,原來可以有咁多的。嘿。

發表意見