立場新聞 Stand News

廣告年結:進擊的 Banking

2016/12/28 — 12:28

一直好想寫渣打今年嘅marketing campaign,見佢哋密密播「4蚊1里」新廣告,終於的起心肝寫。

銀行廣告,一向唔易做。好多銀行都係跨國企業,做啲嘢要同global align,要decent 唔好太「地」;銀行客戶,有不同年齡、階層、政治立場等,食得四方飯,最好當然唔得失任何一方,做嘢自然傾向保守。sell 銀行試新嘢,佢哋會有好多concern(驚甩碌、驚人投訴、驚呢樣嗰樣),要推到出街,真係一啲都唔易。

而偏偏,渣打今年就連環推到新嘢,喺市場上顯得相當進擊。

廣告

第一炮,就係搵Sammi 做代言人,力 sell Banking都可以賺里數呢個新玩法。「Shopping,Dining,我鍾意,不過我最鍾意嘅係Banking!」將咁鬼悶嘅銀行服務,講到好似購物、食嘢一樣吸引,正常真係冇人講得出口,但係由Sammi 以極 Crazy 嘅口脗演繹,立即相當入腦!

第二炮,就係同100毛合作,搵埋鄭經理拍《不要驚動阿盈》,力 sell 信用卡申請。100 毛玩開網絡文化同二創歌詞,件事本身一定「地」過正常銀行廣告好多,渣打肯放下身段玩呢類片,本身真係好大膽!(你可能話:車,另一間銀行都有搵毛記啦!但渣打係第一間銀行搵,做開荒牛開條路畀人跟,難度系數高好多。)

廣告

第三炮,就係推出《我要做富翁》問答遊戲,搵嚟林日曦、陶傑等KOL 參賽,力 sell 優先理財戶口。創新之處,就係將節目安排喺十幾個 fb page 度,同時以 fb Live 聯播。有人事後質疑:個節目一早剪好,唔係失去咗「Live」嘅意義咩?其實咁先至係突破框框,邊個話 fb Live 一定要攞嚟做直播先?而且正正因為唔係真‧直播,林日曦等KOL先可以同觀眾一邊睇 show 一邊 chit-chat,令到成件事更加互動、過癮!

可能有人會問:渣打同毛記合作,主要叫人申請 Asia Miles 信用卡,以毛記對粉絲嘅號召力,問題還不大;《我要做富翁》推廣嘅優先理才戶口,講緊入場費要成百萬,成件事仲要純 online driven,真係work?

講真,紙媒、TVC未死,要 target 中產至高端客戶,Offline 效益確實可能更高;但敢試新嘢,就可以為品牌營造行業先驅嘅形象 — 銀行吸客本來就係深耕細作,同最up trend 嘅媒體合作、搞多page聯播,所產生嘅branding 效果,其實可以提升年輕世代對品牌嘅好感架。

 

=========
不再小圈子,令真正多人睇嘅作品獲得重視!由本版主辦嘅 #廣告狂人大賞2016 ,公眾提名期已延長至12月31日,立即把握最後機會提名心水作品:http://bit.ly/2hpTEZb

發表意見