立場新聞 Stand News

廣州唔賣細碼衫?

2015/2/18 — 17:21

前兩星期,有廣州朋友 T 第一次過香港,同行的過境常客 C 話要帶姊妹去旺角朗豪坊的 H&M 見識。T 不以為然:「H&M?廣州都有啦。去黎做咩?」T 拍哂心口:「信我!香港 H&M同廣州完全唔同架!」入到去,唔使 5 分鐘,T 已經在瘋狂搶購:「嘩!呢度竟然有好多細碼衫!正!」

點解廣州女仔在香港見到細碼衫會咁 HIGH?因為在廣州,稍為有名氣的服裝品牌,幾乎都唔賣細碼衫。呢個消息你是否覺得好奇怪?我在廣州多年,一直覺得這種事好不可思議。廣東女仔一向身材纖細,廣州 D 品牌店卻反其道而行專出大碼衫,豈不是在倒自己米唔想做生意?C 嘆道:「人哋先唔志在做你 D 本地人既生意。外地人先係佢地既大茶飯呀!廣東省以外,大把高頭大馬的中國女性。而且大碼衫仲可以出口去歐美,包賺!」

與全國各省的各個大城市一樣,廣州的流動人口眾多,甚至比本地人更多。而以消費觀念來說,廣州人較精打細算,而外地人相對較捨得花費。於是,在廣州做生意的人更顯得傾向先照顧外地消費者,就是理所當然了。

廣告

所謂大雞唔食細米,既然做外地人生意可以賺豐厚得多,越大的品牌當然越一面倒的做大碼衫,唔多理細碼衫呢種「細米」。本地人要買衫,通常是幫襯剛剛創業的本土品牌,要不就是不見經傳的街邊貨。雖然地王廣場等潮流商場會賣日本韓國進口的潮服,但價錢嚇人,比在香港買貴好多,普遍廣州潮男潮女都是逛的多買的少。

一直以來,香港的服裝生意一直都好正常──我是指香港的服裝生意真的針對本地市場,真正為香港人服務。所以,香港的服裝品牌大都以細碼衫為主。這是因為大部份香港人都是祖藉廣東,尢其香港女性體形都是較纖細。香港人點都估唔到,「香港服裝生意以本地人為服務對象」這種咁正常的社會現象,對廣東人來說竟然是不可思議的驚喜!廣東女性來到香港,一定首先衝進各家服裝店買細碼衫大樂一番!

廣告

2015 年新年,希望「香港服裝生意以本地人為服務對象」這個最正常不過的社會現象不會變,不會像廣州般越來越多大碼衫而細碼衫買少見少。有人話,面對十幾億人口的內地市場,誰會不動心?其實,香港服裝以本地人為服務對象,一樣可以開拓新市場。廣東區域的人與香港人身形相約,單單開拓這一區已經是一億人口的生意,更何況還有各個與香港人身形相約的東南亞地區客源?保持個性,一樣可以既自足又開創!

 

(題為編輯另擬,原題為「點解廣東人要去香港買衫?」)

發表意見