立場新聞 Stand News

弱智投資大觀園 - 好人有好報

2016/2/23 — 10:57

圖由作者提供

圖由作者提供

嚴格嚟講,呢個唔係一般投資嘅故事(即係買樓、買股票等),而係講一種投資陷阱,叫做「種金」。

你會話:「屌你啦史兄,買股票咪又係陷阱?」我梗係明,有邊個買過股票嘅冇中過(同中緊)伏?但買股票,理論上等同你畀咗錢公司去做生意,佢認認真真拎錢去營運嘅利潤會歸你。你買嘅,係公司嘅擁有權:即使啲股票係你喺牛嬸手上買返嚟,好似無錢落公司個袋,但其實只係牛嬸將個權利轉讓咗畀你。

另一方面,有種叫「種金」嘅陷阱、或稱「龐氏騙局」(Ponzi Scheme),徹頭徹尾只係一種將錢左手交右手嘅活動,本質完全唔同。用下線A嘅錢分畀上線B、再靠下下線C嘅錢分畀A同B,如此類推,如有雷同,實屬不幸。種金中間完全唔存在任何經濟及營運活動,只係透過不斷搵新人加入、科水、再分錢嚟營造有錢分、有錢賺嘅假象。

廣告

以最簡單嘅方法嚟講:

-「種金」就係上線(你當史兄)分別搵嚟下線二人(責任主編同林嘉欣),每人畀$5,000史兄,咁史兄無端端有$10,000;

廣告

-然後責任主編同林嘉欣各自再搵嚟兩個人(下下線),各拎$5,000出嚟,咁主編同林嘉欣二人又各得$10,000,回報係100%(假設史兄唔再拎走任何錢);

-下下線又再搵兩個人….好似金字塔或者細胞分裂咁,1變2、2變4、4變8…...咁上層嘅人先有錢賺;

-你計計下,就會發現,個金字塔去到第23層(2 嘅23次方),已經係8,388,608(你唔好戇鳩,梗係唔係用心算,係用計數機計嘅),相當於全港人口;去到第33層,已經係8,589,934,592,即係86億,多過全球人口。即係話,個金字塔去到33層已經係極限,概念上呢個時候呢個計劃一定會爆煲;

以上嘅例子,極為簡化。現實世界嘅種金計劃,型式千變萬化。2008年嘅馬多夫騙案,就係一種極為複雜嘅種金/層壓式騙局例子。不過!所有嘢只係幌子嚟,核心萬變不離其中:透過引入新人及資金,分派畀現有計劃成員。

如果你忍受得住上面幾百字字嘅學術扼要(睇開史兄寫嘢嘅人,一般都好有忍耐力……等出書嘅就更加忍得等得…….),我哋可以開始講故事。

故事嘅主人翁,叫中大阿哥。哥前哥後三分險,呢個嘅名,居然叫阿哥。

──────────────────

2000年,中大阿哥大學二年級。某日,佢收到中學同學阿水嘅電話。

「喂,大哥,我係阿水呀。好耐無見,你近排生活點先。」阿水用懶熟絡嘅語氣講。事實上,阿水同阿哥中學只係同過班一年,之後阿水就轉咗校;Year 1喺大學撞到,交換咗電話大家都冇聯絡過。

「係呀,上次喺campus撞到你都已經成年前嘅事。」

「上次聽你講,你好似修金融嫁喎。有冇冧吧畀我買先。」阿水半開玩笑講。

「有呀,8號。」科網股年代,8號電盈(前香港電訊)係最當炒嘅股票;又或者8字頭、喺創業板掛牌嘅,好炒到你唔信。當年創業板啱啱成立,誠哥隻tom.com上市,全港瘋狂咁抽,佢第一日上市就升咗3倍。然後新地嘅新意網、一眾藝人嘅東方魅力、大班嘅36.com,全部都好好炒。

「咪玩我啦。好嘢唔好收收埋埋,一齊分享下嘛。」

「梗係啦。點先。」阿哥唔想再講股票。畢竟,畀人問號碼炒股,時有知。阿水唔係第一個,亦肯定唔係最後一個,阿哥都無佢咁好氣。

「無呀,近排有個叔父輩,開咗間教育公司,我而家喺嗰度做partime。佢哋想開班教人投資,但我哋做開第二行,唔識教育嘅嘢,所以想搵人幫手。我記起你修金融,睇下你有冇時間去佢嗰度教下書,賺下外快咁囉。」

「屌,我最撚憎教補習。」

「唔單止係補習嚟嫁。不如我約你上佢哋度望望先?佢檔嘢喺金馬倫道,近你屋企。」只係同班過一年,阿水居然仲記得阿哥住尖沙咀。

「er……好啦。見係你,我真係唔中意開班教人嘢。」阿哥唔係好識拒絕人。算啦,話晒一場舊同學,又咁近屋企,當畀面去睇睇。

──────────────────

金馬倫道某商廈,宏大投資有限公司。

阿哥上到去,人頭湧湧。一千呎嘅辦公室,座無虛席。場內全部人分組咁喺唔同嘅枱度傾嘢,你一言我一語,人聲疊疊,大家好專心同留心,好似傾緊家國大事。

喺阿水正嘗試研究呢班人傾緊乜嘢嘅時候,阿水、同佢女友阿倩出咗嚟接待阿哥。

阿倩同阿哥老土咁握過手,阿水就請咗阿哥入房。阿水坐阿哥左邊、阿倩坐阿哥右邊。

「估唔到你讀緊書,做partime都咁勁喺公司有間房。」

阿水笑一笑。

「嗱,廢話少講。你讀金融嘅,而家我哋呢間投資公司,希望幫啲有心人學投資-特別係讀書同學識唔多嘅,再幫佢哋搵錢。

我哋宏大投資,因此推出呢個叫『人人識投資』計劃……」阿水一口氣連珠爆發,不斷講講講講講。

其實阿哥並無留心阿水之後講乜……

「中國古拳法嘅『人人有功練』?」阿哥開始回想起《破壞之王》裏面吳孟達呃周星馳落搭嗰段戲。

坐喺右邊嘅阿倩接住講:「無錯咧,而家我哋正需要一啲有學識、有上進心嘅人去教人投資,唔使教好深,求其教啲經濟呀、財經呀、時事嘅嘢就得。我哋真係好希望你幫手。」

阿水呢個時候拎一本厚厚嘅portfolio出嚟介紹。

「嗱,呢個我哋老闆林天生,佢喺歐美投資界好出名。佢喺Goldman做過十年,賺咗幾億已經上咗岸。而家希望返嚟香港幫下普通人……」阿水一路翻本嘢一路狂講。

「你睇下,佢同好多美國政經高人都係熟人嚟,你睇下呢個咪係Greenspan。不過我哋老闆唔多願提起,我哋求咗好耐佢先肯拎一張相出嚟。」

『我同李小龍根本係兩師兄弟,唔通我四圍話畀人聽咩?』《破壞之王》啲對白又喺腦海出現。

阿水同阿倩你一言佢一語,不斷吹噓公司同老闆如何如何架勢同勁揪,阿哥開頭都諗起電影破壞之王嗰幾幕。隨住阿水同阿倩不斷開行馬力,講完一本資料又另一半資料,講足一個鐘,阿哥畀佢哋疲勞轟炸到精神混亂。

終於講到口水都乾,阿水開始介紹戲肉:

「中大阿哥,工字不出頭,投資先有希望。而家希望你嚟加入我哋,一齊打個天下出嚟。呢個機會可遇不可求,千載難逢。

你本身讀金融,要教人投資,應該勝任有餘,但入我哋公司做,都要入會、上個堂,學返由我哋老闆編寫嘅教材,佢仲會親自教授。等你明白我哋套嘢係點,再出去幫人。

你識咗,就可以再搵你親戚朋友入嚟上堂。咁佢哋嚟上堂,就會有佣畀返你,搵到第一個入會,只係得$38,當係一啲心意;當你朋友又再搵到人嚟上堂,你都會分到佣,搵得越多人、分到越多。放心,如果你搵唔到人嚟,我哋會幫你。

你同我都做咗大學生,要貢獻社會。我哋公司好缺人,真係好希望你嚟幫手教人投資。」

之前嗰啲乜嘢背景幾勁幾勁,多鳩餘啦,周不時有人拎住同李嘉誠嘅合照去呃錢(所以誠哥係唔同人合照嘅)。反而觸動到阿哥嘅,係呢啲乜嘢回饋社會、教人學嘢嘅所謂口號,真係好吸引人。尤其自己話晒都係大學生,受咗納稅人嘅資助,而家見識比一般人多、又好似識乜嘢CAPM,M&M(唔係朱古力),Arbitrage Pricing Theory,好應該教導一班普通人,等佢哋都受惠。你見而家好多學者,周不時為政府度橋、獻計,點解呀?咪係覺得自己有學識、有能力,讀得成書應該入官門幫手治理國家大事囉!

畀佢哋疲勞轟炸咗咁耐,阿哥只想離開。畀阿水讚一讚,阿哥自己又心動。

「好咧。入會同上堂幾多錢?」阿哥心諗,加州紅會費都只係幾廿蚊,豪畀你。

「$11,888」

「下?」阿哥忍唔住大叫咗出嚟。

「頭先講第二本portfolio嘅時候,我講過上堂會教啲乜,你無聽咩?放心喎。你完成咗課堂,搵人入會,好快搵得返。工字不出頭,我哋一齊努力,我哋會幫你,啲錢好快回籠。」

「我邊有咁多錢?」

「唔緊要,有冇帶信用咭?」

阿哥面帶難色,因為佢有帶。始終萬幾蚊唔算細數目。

「我哋真係好需要你呢啲讀過金融嘅人嚟幫手。放心喎,阿哥,我同你係中學同學,我又喺度做,實會睇住你。萬幾蚊好快搵得返。工字不出頭,小財唔出大財唔入。」

「嗯,好咧。就信你。」阿水都係中學同學,應該唔會呃自己。阿哥一心諗住可以貢獻社會,乖乖拿出信用咭。

$11,888.

「感謝你加入我哋,合作愉快。」阿水阿倩露出滿意的笑容。

──────────────────

嗰次之後,阿水同阿倩好似人間蒸發咗咁,無咗影。當初啲乜嘢上堂呀、幫人呀,無影無跡。咁阿哥見對方開頭講到自己有幾重要、有幾幫到手,但又唔搵自己,咁應該係佢哋搞得掂……咁搞得掂都無謂搵人啦。

更重要呢,呢邊廂阿哥都掛住拍拖,已經將呢件事拋諸腦後(年青人總係咁三分鐘熱度……成萬幾蚊就倒咗落海……),仲有忙住填表搵工見工見住同學搵到工,對於呢單「人人識投資」晨早已經放埋一邊,完全無咗件事。阿哥亦因為條咭數,負債累累,如去做兼職還錢,邊有時間去理教人投資。

好快去到year 3下學期。某日阿水突然打畀阿哥。

「阿哥,上年單嘢呢,想提提你,你喺我哋嘅會籍,一年唔郁就會過期。你呢個星期再搵唔到人join,你個會籍就會畀人取消。記住~搵第一個人入會,就有$38!搵得越多,回饋越高!」阿水溫柔咁提醒。

「係喎!仆街咧,原來有呢單嘢存在!」阿哥全情投入兼職同拍拖,已經完全唔記得呢單嘢。萬零蚊,點都要諗下搵機會賺返翻嚟。於是乎佢開始搵啲同學、朋友。不過,大家唔係忙於搵嘢做,唔想畢業等於失業,就無興趣入會教人投資,根本無人理佢。

正當死線每日每日迫近之時,中大阿哥突然諗起一個交遊廣闊嘅朋友,叫阿純。阿純無讀過書,應該唔識投資係乜嘢嚟!呢個計劃肯定啱佢。再者,如果有佢加入團隊,一定搵到好多人嚟報讀。

阿純同阿哥老友鬼鬼,一口答應,咁咪約去水哥嘅辦公室。內容大同小異,不過重點變咗喺搵錢同唔使返工,當初啲乜嘢貢獻社會嘅內容,無晒。

「工字不出頭~」「你想唔想搵錢?」「你想唔想發達?」「有機會點解唔把握?」「工字不出頭~」

「工字不出頭~啱。」阿純非常認同。

「我都想join……

我都信工字不出頭,

所以呢,

呢幾年我連工都冇返咧。所以我無錢。」

哈哈哈哈哈哈哈哈哈,聽到呢幾句inconvenient tuth。阿哥自己都忍唔住笑咗出嚟。

「屌係喎!阿純邊有萬幾蚊join?」不過,佢信得過阿純,知道阿純有交際能力,會幫到佢回本。

「得啦,我幫你畀住先。」阿哥衝口而出。

阿水、阿純都呆咗。阿水拉咗阿哥去一邊。

「嗱,你自己朋友嘅嘢我唔清楚,但你幫朋友畀埋,要小心喎。」

「得啦,無問題。」

「你咁講就得。」阿水就幫阿純辦埋啲手續,正式入埋會。阿哥幫阿純碌咗$11,888咭。

一個星期後,阿水打畀阿哥,叫佢上去公司拎check。

「嗱,你嘅。都話錢好容易賺。」阿水笑笑口遞張支票畀阿哥。

「嘩,多謝。」阿哥望一望張支票:

「港幣參拾捌元正」

哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈

為咗嗰$38,中大阿哥就畀多咗$11,888,總共投資咗$23,776。屌你老味呀!條計點計呀?如果阿哥要回返最初嘅$11,888,大概要$100,000!!哈哈哈哈哈哈哈哈哈。

最搞嘢係,無幾耐阿純就因為喺香港犯咗事,好似百份報個老闆咁要遠走台灣,一日在生都唔可以返嚟香港!哈哈哈哈哈哈,即係阿哥開頭想靠阿純嘅人際網絡,都泡埋湯。又過咗一排,當阿哥都未開始搵新會員入會,阿水間公司畀慈母調查,好快啲老闆就夾埋啲錢走咗佬。

埋單計數,呢項投資嘅回報率,係-99.8%。真係痴撚線嫁,哈哈哈哈哈。

中大阿哥喺往後嘅日子炒股炒輪炒乜都炒過,到今日為止冇試過有樣投資嘅回報係接近-100%。連會打靶嘅牛熊證,最仆街嗰鑊阿哥都執返1-2%。

回報-99.8%嘅投資,阿哥只係做過呢一次。

呢個記錄,仲要源於佢一片好心想幫下窮人,諗住「以知識改變世界」。而家好啦,幫唔到窮人,自己就變咗窮人。

──────────────────

中大阿哥係邊個?

如果你心思細密,晨早估中「中大阿哥」,就係我,史兄本尊。倉頡碼嘅中大,就係史;中文嘅阿哥,咪係兄囉。

你話我畀人呃咗幾皮嘢,肉唔肉赤?你戇鳩嫁?幾皮嘢呀!夠我嚟多次「你買書、我埋單」啦。講返轉頭,我有時幾幸慶有好多弱智嘢,25歲之前已經領晒:善心畀人利用仲要呃埋錢(幾皮)、爭咭數(都係嗰幾皮,計咗兩次)、遇到港女、作奸犯科(同黑社會圓圓一齊)、努力讀書做個好學生……重點:即使我犯咗呢啲錯,最後都執得返一身彩,無事無幹,無穿無爛,無風無雨。

因為呢次種金同之後爭咭數嘅經歷,令我學識咗一樣好重要嘅嘢:

唔好爭咭數。

點解我畀人呃,學到嘅竟然唔係「唔信朋友」、「要著緊啲錢銀」?我答唔到你。可能阿媽教落,錢財身外物掛。如果個朋友要錢周轉,借到咪借,最緊要有借有還上等人。信朋友定信錢?你都傻嘅,錢唔認人嫁嘛!

本質上,我同上集嘅故事主人翁阿霞一樣咁戇鳩、白痴,錯信朋友,然後無咗啲錢。我睇見阿霞,諗返自己……所以我恥笑阿霞嗰陣會特別落力。哈哈哈哈哈。(看)

要咁做係因為,

恥笑阿霞嗰陣,令我諗起嗰陣嘅艱辛歲月:幾皮嘢咭數,你估易捱?我每日只係得三十蚊返學,因為要扣起錢買煙,中午只夠錢食$12三餸車仔面,再加$2飲杯凍檬茶。車仔面,我係食足一年!係一年!然後讀碩士,有微薄收入,然而日子依然難頂,我嗰陣嘅名叫長崎糧尾,到月尾就要食杯面加五香肉丁。因為嗰陣嘅一年車仔面,我畢業十幾年到而家,一次,係一次車仔面都冇食過;見到$38一碗車仔面,除咗覺戇鳩,仲會勾起多痛苦回憶。十足十中學範文《唐山大地震》嗰個被救出嚟飲完葡萄糖水之後呢世都唔食甜嘢嘅婦人咁,哈哈哈哈。

到後來畢業做咗幾年嘢,先諗返起呢個「人人識投資」,原來係種金計劃嚟。點解?因為佢哋根本無證監嘅牌,唔可以幫啲會員拎錢去投資、或者教人去投資,佢哋只係「以學習投資為名,招收會員為實」,去用下線(新入會人物如我)嘅會員費,分畀上線嘅人(如阿水及阿倩)。而下線嘅人畀咗錢,就會肉緊咁搵啲下下線入會,等自己可以歸本。所謂上堂、教人,根本子虛烏有,完全唔存在。

我梗係好嬲阿水。唔係單止嬲佢呃鳩我錢,更加嬲鳩佢利用同學之間嘅感情(屌!無感情又點可以呃鳩你錢?),再仆街係佢最尾乜嘢事都冇,仲喺赤大土木工程系畢業。真正逍遙法外。呢個教訓令我明白,冇錢,千祈唔好充大頭鬼。倒轉嚟講,當你可以負擔嘅時候,有意思、有意義嘅嘢一定要去做。

呢啲嘢喺我還撚晒咭數,過咗好多年之後先發現。

至於點解故事講晒,但篇文嘅標題「好人有好報」仲未出現,係因為……仲有下集。

 

 

──────────────────

史兄近期動向:

(1)史兄《婚姻這種邪教》第四版已上市

(2)史兄新書《史詩式愛情》;預計3月底、4月頭出版

──────────────────

廣告時間:不要問,只要like,仆街史兄的專頁同IG。

Facebook
IG (主要用嚟睇女仔) 

發表意見