立場新聞 Stand News

怒海救援 — 已經提咗自己唔好入場睇,又忍唔住,抵死的

2016/3/2 — 14:07

我已經提住自己唔好入場睇《怒海救援》(The Finest Hours),又忍唔住。抵死的,抵散場時無奈苦笑。

故事話改編真人真事。一開場,一個死老豆咁樣的青年,去溝女;轉個頭,條女就逼婚。青年明顯係個小男人,竟然砌詞話要先得到上司簽紙同意先可以娶老婆。頂,話自己係處女的鍾嘉欣都唔會同樂小姐傾過先去搞嘢啦。OK,五十年代的美國,可能真係有咁嘅男人呢。如果發生在今日,你就肯定以為條仔玩嘢。

廣告

如此安排係為咗話你知,呢條友仔好聽教聽話,難聽少少講句係迂腐,再老實點形容是笨。果然,狂風吹來,亂來的上司下令男主角帶幾個伙計出海搶救遇難船隻,明知九成機會出唔到海,出到都九死一生,因為老闆吩咐,即使老前輩勸佢揸流攤,照樣心口掛個勇字衝出去。仲要昆幾個新丁齊齊出發。有點似謀殺。

廣告

電影好想將男主角描寫得好英勇。慘,我只覺得兒嬉。揸架類似快艇的船仔,前面是一個ICC咁高的巨浪,死唔肯U-turn,係要衝過去。衝完,無咗羅盤,無plan B,隨水漂流。話咁易,又漂咗去隻沉船;隻艇只可容納廿幾人,男主角情願同歸於盡,堅持超載到三十幾人。回程,又話咁易,過咗之前個巨浪都唔知。搵唔到岸,就快死?碼頭的街坊是但開幾盞車頭燈,身在茫茫大海的災民又話咁易就見到,安全著陸。睇完,你會以為個碼頭係天星,出事現場只不過喺維多利亞港中央。你話佢英勇,我只覺得條友魯莾、固執、不分輕重但好彩。

睇到一半,我對個故事或者故事想帶出的信息已毫無興趣,只想有些少緊張刺激災難場面。沒有。那些什麼會睇到觀眾暈船浪之類的評語,別相信,悶到你抽筋才是比較中肯的意見。近年的所謂災難片,一蟹不如一蟹,套套仆直。是因為現實已經充滿災難,所以很難再為電影內死人塌樓而動容嗎?不會的,即使我中了二千萬六合彩,我也不會認同《怒海救援》及得上回歸後的《鐵達尼號》(Titanic)。中了個Billion,就可能會。

 

標題為編輯所擬;原刊於作者 facebook page

發表意見