立場新聞 Stand News

我唔覺得連詩雅好有問題喎,反而我嘅兒時女神就....

2016/4/27 — 16:06

《跟住矛盾去旅行》 片段截圖

《跟住矛盾去旅行》 片段截圖

拿利申先,繼毛哥對人頭鼠呢個 series(編按:ViuTV節目《跟住矛盾去旅行》)之後,我再追,目的,肯定是為左兒時女神。

之但係,睇完的感覺,又未至於一面倒地,覺得連詩雅好有問題喎;反而,我係為女神呢邊而覺得幾不以為然囉。

連詩雅其實都仲係廿幾歲,大情大性一些,像一個小女孩,是咪好大問題呢?我又未必覺。話佢「嬌嗲」,嘩老實講,同《華之里》時候的葉蘊儀比,邊係佢嗰皮呀?

廣告

講真,就算係葉女士個大仔,都好似剛剛二十喳,阿女神彷彿做完《女人俱樂部》之後當正自己真係夠秤做得 Shiga 阿媽咁,擺出個長輩格咁,其實,駛唔駛呀?何解人家同老外講多幾句英文,都可以畀你評頭品足講一餐?

老實講,起碼睇 Shiga 幾個位,佢在同輩中都算係有分寸有禮貌的︰臨時通知改酒店,佢有呻,但去到張雙人床度,佢係第一時間畀葉女士揀邊一邊先的;人家真心鍾意玩迴旋木馬,都主動邀請你玩埋一份啦,反而係個「長輩」推推搪搪之後又話唔玩了。

廣告

去得意大利,你鍾意睇藝術人家喜歡食野 shopping,鹹魚青菜各有所好,我又唔覺誰比誰高尚;你會比較留意時事(其實,咪又係呢幾年的事啫),但人家一個叫做剛剛站穩腳跟的歌手,outspoken 的代價係咪又咁容易負擔得起?畀人雪係咪你養先?講到尾又係返返去那種「我見識多過你」的自我優越。

我又唔會話好咬牙切齒咁鍾意邊個唔鍾意邊個。總之,我會繼續留意葉女士對世情的洞見,又會繼續落去新路唱《到此為止》(屌講起幾時先有得唱呀)。

而,我而家其實係最期待何韻詩對高皓正。

發表意見