立場新聞 Stand News

我的最後一道指令

2016/5/9 — 21:10

作者 facebook page 圖片

作者 facebook page 圖片

已經唔記得幾時開始,要求每間店舖夜晚閂門之後,負責埋數嘅同事向我報數,以前用SMS,中途用Line,近年用Whatsapp,風雨不改。

五月五日last day, 嗰晚仲收到報數,都講得通,但六號晚依然收到,就唔係咁好,於是乎第二朝晨咁早,打電話畀同事:「即刻將我喺群組取消、移動、終止、剷除,總之我唔應該再收到報數。」無幾耐,收到幾個道別謝言,然後一個鐘頭內,逐間逐間踢我出群組。

廣告

就係咁,七號晚,過咗一個寧靜嘅夜晚,再收唔到報數,一個都收唔到,從此無得開電腦入生意數,無得分析生意走勢,好唔慣,好孤單,好無奈。

合作八年半,人去情在,威嚴尚在,大家又點好意思踢走我,我都唔想,但知道咁樣做,絕對正確,惟有忍心落咗最後一個order,好在個個都仲聽話。

廣告

規矩就係規矩,人情還人情,唔應該混淆視聽,無得傾,唔使諗,一定要踢我出群組,呢啲叫專業。

同樣道理,「退休」即係退居幕後,再無台前身份角色,緊守「不在其位,不謀其政」原則,絕對唔會對舊袍指指點點,說三道四;就算第時重出江湖,再作馮婦,一樣唔會評論舊公司、舊行家、舊行業,各位傳媒朋友,你哋死咗條心把啦,唔好再message我啦,我係唔會答㗎,因為我真係知乜嘢叫專業。

舉一反三,所有退休「高官」、「高層」、自以為是嘅「高人」,知唔知乜嘢係「退位讓賢」,你想講想做嘅,無論有無講到,做唔做到,已經喺在位時完成任務,呢個世界,無咗你,無乜問題喎,唔好阻住地球轉,唔好騷擾班後生,唔該返屋企湊孫啦,呢啲叫專業,知唔知呀。

 

原刊於作者 facebook page

發表意見