立場新聞 Stand News

我童年嘅暑假係不斷打機同打機囉

2017/7/5 — 17:09

FIFA 17 遊戲畫面 l 資料圖片 l TAKA@P.P.R.S @ flickr —Attribution-ShareAlike 2.0 Generic (CC BY-SA 2.0)

FIFA 17 遊戲畫面 l 資料圖片 l [email protected] @ flickr —Attribution-ShareAlike 2.0 Generic (CC BY-SA 2.0)

今日碌fb,見到有個家長將佢個仔嘅summer holiday時間表post咗出嚟。我其實好唔明,點解總係會有人將呢啲「私人嘢」俾公眾「欣賞」?唔俾人鬧爆至奇啦下話。

個schedule,的確係好密嘅。學咁多嘢,咁必定又要「還佢童年」啦。我當然唔贊成咁樣谷法,但某程度上我對佢地又有啲同情。

廣告

我個仔,都差不多放暑假了。返學嘅時候,學校嘅schedule谷到佢地氣都冇得抖。即使你唔幫佢安排其他課外活動,佢地既日常其實都係無限做。好啦,到放假啦,你以為佢地一定覺得甩難啦,終於可以唔駛無限做啦?頭兩日就係,第三日就同你講:老豆,我好悶呀,有咩可以做呀?

平日學生日讀夜讀,忙到完全冇時間諗吓自己得閑嗰陣可以做啲乜,又或者有乜想做。冇辦法,佢地亦同我地嗰代唔同,根本冇呢個習慣去諗,自己有乜想做。我自己都已經係條冇乜理想嘅咸魚,香港地嘅教育,再咁搞落去,怕且都係會變成咸魚工場。

廣告

老豆,咁你以前暑假做啲乜架?阿仔問我。

暑假嘛…老實講,我童年嘅暑假,係不斷打機同打機囉。打足成個暑假,由朝打到晚,暑期作業留到最後嗰兩日先做囉。嘿,好糜爛,係咪?但我當年覺得好快樂喎。

我其實,都打算放任阿仔過一個糜爛嘅暑假,冇糜爛過邊算係童年架我心諗。不過,當你幫個仔排滿暑期活動,會俾人「批鬥」嘅同時,你放任個仔打足兩個月機,恐怕俾身邊啲三姑六婆批鬥得仲勁。

「我以前暑假呢…」我答阿仔:「都係睇吓書做吓運動咁囉…再有時間剩嘅,咪打吓機囉。」

「打機?」阿仔聽到,不知幾咁雀躍:「咁我依家去打機啦老豆。」

咩叫興趣呢查實?要你逼佢學逼佢練逼佢做果啲就唔係興趣啦。男仔去打機,邊駛逼架。

快啲練好啲,陪我打FIFA啦。

 

(標題為編輯所擬;原刊於作者 facebook

發表意見