立場新聞 Stand News

論 Sammi 新廣告 — 戲裏戲外,真真假假

2016/3/24 — 17:42

鄭秀文最新廣告中手舞足蹈,營造率真的感覺。她說「Shopping?Dining?我鍾意,不過我最鍾意嘅就係Banking……」(廣告片段截圖)

鄭秀文最新廣告中手舞足蹈,營造率真的感覺。她說「Shopping?Dining?我鍾意,不過我最鍾意嘅就係Banking……」(廣告片段截圖)

就最近(2016年1至2月)公佈的數據,十大最高廣告支出行業當中,排名第二位的銀行、信用卡及投資服務的廣告支出,按年足足下跌咗20%。要比起整個本地廣告支出,自近16年來首次按年跌破雙位達13%還要多!你話點算?

市場越係艱難,賣廣告嘅一分一毫,都要越謹慎留神,比以前更加講求高效。又或者,用另一角度,更鍾意貨比貨,同競爭對手嘅表現,由頭到尾、完完整整咁比較一番。好似最近同一位銀行高層朋友吃飯,一提起阿Mi,即Sammi為渣打拍嘅一個以信用卡消費及透過各種銀行服務儲飛行里數嘅全新信用卡廣告,讚不絕口、愛到要命。一路講、既興奮又激動:「嗱,今次真係抵讚啦,用明星咁咪用得啱囉,之前陳豪始終係演戲!Sammi好明顯就係做自己,你話,自然到呢……唔似賣緊廣告!」

計我話,我唔敢講Sammi到底平日係咪真係咁樣生活,用咁嘅聲線兼跳住、典住講嘢,但起碼,佢由《孤男寡女》、《瘦身男女》、《我左眼見到鬼》、去到《盲探》,真正成功咁演活咗杜琪峯戲中嘅佢,仲可以好深入民心,令人直覺Sammi就係咁嘅性格、神情同語氣。戲裏戲外,分唔出邊啲係演戲。就算佢果句:

廣告

「Shopping?Dining?我鍾意,不過我最鍾意嘅就係Banking……」

確實有啲over,但睇完呢個廣告,估唔到身邊真係有好多行內行外嘅朋友提起,其中仲有人話,睇完真心想申請番張信用卡。你唔好理,此可叫做高效!唔怕貨比貨,差唔多同期另一張都係換飛行里數出名嘅DBS信用卡廣告,都係用明星,古仔玩雜技、騎單車、變造型、走上走落,比佢之前嘅DBS廣告來得更自然、更瀟灑,但比起Sammi,好似都係差咗少少。

廣告

廣告還廣告,可以建立到知名度、提高到形象、影響到興趣及購買慾,但香港人有的是頭腦,識計數,最後都係睇着數。揀邊張里數卡、你要點使錢、你要點賺里數,簡直無難度!

 

原題為〈戲裏戲外,真真假假〉

發表意見