立場新聞 Stand News

戴翅偉、味吉陽一、小智有乜嘢共通點?

2017/7/24 — 13:44

戴次偉、味吉陽一、小智(作者製圖)

戴次偉、味吉陽一、小智(作者製圖)

《足球小將》、《伙頭智多星》同《寵物小精靈》三套卡通我由細睇到大(以時序嚟計),三個主角都有個共通點,就係父親缺席。

戴翅偉(大空翼)老豆行船,出現集數寥寥可數,戴翅偉見盧比度叔叔仲多過見佢老豆。我細個時因為受無綫劇必然有三角戀定律影響,一直懷疑盧比度叔叔會唔會最後變咗戴翅偉爸爸...

味吉陽一年少喪父,佢年紀輕輕已經要唔返學做廚師,兩母子艱苦維持老豆剩落嘅飯堂。陽一真係幾慘,好在佢地遇上味皇頭馬丸井先生,丸井鍾意咗陽一阿媽,當陽一係仔咁看待。

廣告

至於小智,成個故事一直都冇交代究竟小智老豆係邊個、喺邊度、生定死。上年Pokemon GO爆紅咗一陣,網友熱傳幾篇潮文,其中一篇係有啲考據王估計佢老豆真身,不過呢啲大家可以當係腦補。小智同佢阿媽相依為命,而大木博士就不斷出現喺佢兩母子中間,於是網友流傳另一篇潮文就係大木博士問小智佢阿媽喺唔喺屋企,然後叫小智去捉精靈... OMG,童年崩壞啊...

我當然唔係寫到呢度就完,咁太膚淺了。大家有冇諗過,如果佢地三個嘅父親冇缺席,三個故事都好難寫落去。

廣告

心理學關於男性成長嘅其中一個理論,係佢地自小有弒父戀母情結,即係佢地成長時被迫唔可以同母親太親密,令佢地感覺要同父親爭媽媽,於是佢地要學習父親並且超越佢地,於是父子之間會不斷出現又愛又恨嘅矛盾。

就算唔buy弒父戀母情結理論,大家都會同意父親係男性成長嘅重要他者(significant other),男孩成長過程會不斷模仿父親,父親通常會對男仔特別嚴厲,對兒子嘅生涯規劃有好多意見,甚至強迫。

我地可以推測一下,如果戴翅偉老豆係一般上班族,雖然翅偉對足球嘅興趣係由佢細個時老豆送個波俾佢開始,但喺頭嗰幾十集,即係翅偉仲係小學生嗰陣,翅偉老豆可能已經睇唔順眼個仔日日練波練到天昏地暗,然後干涉個仔嘅興趣,要佢多啲時間讀書,咁《足球小將》個故事就完了。

如果陽一爸爸冇死,佢就可以經營飯堂,陽一就唔會咁早就冇讀書落場做嘢,然後可能讀到大學畢業去咗做上班族。咁個故事就唔會係陽一挑戰晒味皇同味將軍所有頭馬,而係佢老豆去挑戰。

咁小智呢,如果小智老豆係上班族,佢可能都唔會俾個仔日日去捉精靈同比賽,況且,如果小智爸爸喺度,大木博士亦未必會咁俾心機鼓勵小智四圍去,然後...(我知我好心邪)。咁個故事都好難寫落去,大家亦冇Pokemon GO 玩了。

如果男性成長過程中父親缺席,男孩子其實會尋找代替的重要他者,呢個好大機會係男性照顧者(例如男性長輩)或者係佢地認為值得仿傚嘅對象,你可以叫呢個男性做仲父或者代父。

不約而同地,上述三個主角,佢地都搵到呢個仿傚對像。

戴翅偉嘅仲父,好明顯係盧比度叔叔,冇盧比度呢個巴西嚟嘅前足球員啟蒙,戴翅偉好難由小學一直踢到世界盃,咁就冇咁多集《足球小將》了。

至於味吉陽一,佢有兩個仲父,一個係丸井先生,一個係味皇大人。佢地一個當陽一係仔,一個當陽一係Jedi 學徒咁教導。陽一年紀輕輕就已經可以游走於日本最勁飲食集團嘅話事人之間。有呢兩個仲父,陽一就唔再係飯堂炸一世豬扒嘅小老闆,而係料理界明日之星。

小智呢,我都係嗰句,佢嘅仲父大木博士咁鼓勵佢做精靈訓練員,又冇阿爸阻住,咁佢自然會專注發展。

講咗咁耐,其實我都係根據三個故事嘅劇情嚟討論。如果從觀眾心理需要嚟睇,三個故事其實都係滿足緊男孩子嘅弒父戀母情結,佢地冇個嚴父迫佢地讀書補習考東京大學,於是佢地尋找人生志向嘅限制大減,再由編劇安排合適嘅代父俾佢地--啲代父仲要係猛料之人,而且對三位男主角都係循循善誘,愛護有加。對於男孩子嚟講,咁嘅成長歷程,似乎比親生父親帶佢地全身投入興趣更有說服力。

如果要再數,日本熱血動漫嘅男主角,好多都係父親缺席/仙遊,例如龍珠、火影、進擊的巨人、Gundam 、鋼鍊、海賊王。父親缺席,即係唔係成功靠父幹,令英雄成長嘅故事模式更有說服力,所以都係劇情需要。

(寫動漫最容易有嘢講錯講漏,如有錯漏,請各位師兄指教)

 

作者 facebook

發表意見