立場新聞 Stand News

打機有咩意義?

2016/7/29 — 12:15

圖左、中為《Pokémon GO》遊戲截圖;圖右為觀塘區上班族在午膳時間捕捉精靈。

圖左、中為《Pokémon GO》遊戲截圖;圖右為觀塘區上班族在午膳時間捕捉精靈。

呢幾日見唔少關於Pokemon GO引伸出黎嘅討論,印象中最多嘅就係關於信仰同埋打機的意義兩樣。小弟機齡廿幾年,工作十多年亦見過唔少打機打到上晒頭嘅仔,呢度有幾點想分享下。

1. 基督徒可唔可以打機?

廣告

其實基督新教有n個宗派,有部份係比較嚴格,例如唔可以做瑜加、耍太極、睇恐怖片、睇Harry Potter之類。咁有部份人認為Pokemon GO係捉「精靈」,咁就好容易會觸動呢類信徒嘅神經。呢一點我其實傾向尊重佢地嘅堅持。

不過你話打機有邪靈,咁真係頭痕了, 故事提及魔法、精靈或者原力嘅League of Legnds/World of Warcraft/Star Wars/龍珠,甚至妖怪手錶係咪都唔好玩?再延伸落去,童話故事有咁多巫婆同魔法仲睇唔睇?其實當你分得出咩係創作同咩係真正嘅拜偶像行為,就唔會有太大困擾。

廣告

另一種講法響基督新教比較普遍,就係任何會令人沉迷到迷失自我嘅嘢都要謹慎看待。至於乜嘢先叫迷失自我,又係一個光譜嘅問題。基督新教對於啲常見容易令人迷失自我嘅嘢,會叫做試探/魔鬼嘅作工/桎梏/瑪門等等(用響邊度就視乎語境)。

打機容唔容易令人迷失?作為一個機齡廿幾年嘅人,我嘅答案係當然的。電子遊戲設計唔令人沉迷,執得笠,尤其是有智能手機流行之後,你吸引唔到人課金就比較難生存。用一個比較科學嘅講法係,成功電子遊戲嘅獎勵機制設計,就係要令人得到正面回饋得黎有不確定性,即係有啲似抽獎或者賭錢咁,玩者會被condition到渴望從遊戲中得到快感。咁都算係容易令人迷失嘅。(當然,金錢、權力、虛榮都好易令人迷失,你睇下啲開口埋口上帝嘅古代或現代法利賽人就知【我知,聖經裡面唔係所有法利賽人都係咁】)。

我機齡夠耐,有好多沉迷經驗(我分得出沉迷同著迷嘅分別),老套嗰句,打機一定要小心沉迷,更加要提防過度消費,等於健身做運動當然係好,但搞到欠幾十萬卡數就唔好喇。咩係沉迷?心理輔導嘅籠統講法係,嗰樣嘢如果嚴重影響到你正常生活,例如學習、工作、家庭崗位、健康,就可能係。當然,呢個係籠統講法。詳細嘅話,可以寫一篇論文。

打機咁大試探,係咪應該唔俾玩?其實娛樂嘅嘢,每個人都應該知道去到邊個位停,人人玩到興高彩烈,你叫人唔好玩真係好似唔係好通氣。

2. 打機有咩意義?

如上文所講,打機容易上癮就梗架喇,唔容易上癮嘅game基本上就會消失。

咁打機意義係乜?打機其實係冇乜意義,同日常好多娛樂一樣,係冇乜意義。冇乜意義,咁你會唔會唔娛樂?

調番轉講,如果你日常生活全部都係工作讀書家務應酬,完全冇娛樂,咁生活有冇意義?(再倒轉講,如果生活俾娛樂佔據晒,都係冇意義)

當然,好準確咁講,打機唔係完全冇意義嘅,有啲game真係會令人學到嘢,例如AoE/Civilization/三國志學歷史、Plague Inc學公共衛生、Sim City學城市學(反面教材),就算係Pokemon GO都可以令你有動機去親身行下呢個城市唔同地方,咁都唔係壞事。都係嗰句,唔好沉迷,搞到書讀唔好,工返唔到,老豆老母認唔到。

因為有廿幾年機齡,所以有一樣嘢想提提機齡比較短(say, 三日或者三個月)嘅朋友--你打得機多,就會明白,每一隻game都會有走下坡嘅一日,走下坡嘅意思係玩嘅人開始覺得唔夠過癮或者重複,身邊會愈來愈少人玩,開發商愈來愈少搞新綽頭,最後,連你都會放棄,選擇uninstall呢隻你曾經投入幾百小時同埋唔知幾多錢課金嘅遊戲。當你明白呢一點,你起勢投入時間金錢落一隻game嘅時候就會諗清楚值唔值。

每一隻game同Toy Story啲玩具,或者Inside Out裡面隻Ping Pong一樣,曾共渡過漫長的歲月,有過美好回憶已經足夠。唔駛因為一隻game嘅生命週期完結而失落,亦唔駛因為隻game而斷六親。

發表意見