立場新聞 Stand News

搵工人情債

2018/12/14 — 15:18

資料圖片,來源:Andri @Pexels

資料圖片,來源:Andri @Pexels

每年一到暑期工和大學畢業的季節,就會接到好多平日唔太多聯絡的「好朋友」電話或晚飯邀約,目的當然是希望可以安排他們的囝囝或囡囡來我們廣告公司做暑期工或者第一份長工。總之就是想入行做廣告,做乜都唔怕,等佢捱下,由低做起,畀個機會,搵人見下佢,睇下啱唔啱……

其實,朋友一場,幫忙搭下路,行個方便一點不難。正所謂我揀人、人揀你,好公平。在那些芸芸眾多「好朋友」介紹來見工的應徵者當中,老實說,如果是好熟的朋友介紹,自然會加些分數,面試表現假如不太差勁,總之請咗唔會對唔住自己或對唔住人的話,通常都會請了才算。況且,只不過是一份最初級的 account executive 或 art director,甚或一份暑期工而已,總算給了人家仔女一個機會,也給了他們老爸老媽一個人情。 

他們在職的表現往往好壞參半,好的那些,可能真的懂得珍惜一個難得的機會,也不想令父母的名聲盡失,不但努力上進,對辦之餘更超乎預期。有時我會暗喜,自圓其說:做得我好朋友,教出來的仔女一定唔失禮。 

廣告

然而,表現差的那些,可以有幾盡?仍記得有一個長工做了不夠兩個月就辭職,理由是已經學識這份工的所有技巧和知識,想去做下其他東西云云,最老馮的是臨走前還問我要封推薦信。也有一些是恃住熟人介紹而奄尖聲悶,老馮推三推四,怨這怨那,最唔肯捱兼最怕蝕底。還有一種就是比任何人都要忙,唯獨是不忙工作,生活多姿多彩,練精學懶,返工就遲到早退,星期一老馮告病假繼而星期五 no show 之類。不夠三個月,你不送走他,他都頂不住自己走了。 

遇到這些情況,其實做父母都幾為難,不得不再邀約出來食飯飮嘢,對其子女的飄忽短視、不懂珍惜「賠罪」一番。講到這裏,作為父母,想幫助一下自己仔女實屬正常,至於作為仔女,來得見工,也一定說好想好想做你份工。當中唯一的落差,就在於那些做仔女的,就連堅持一下,做得一年半載,認認真真的返下工也懶得做。根本就無須俾面,馬馬虎虎,乜都老馮,搞到人人以為你老豆真係叫「馮生」。

廣告

 

原刊於《蘋果日報》

發表意見