立場新聞 Stand News

【故事】ICQ

2016/9/29 — 12:39

想問大家知唔知 fb 個「你可能認識的朋友」list 係點運作,點解成日都會彈個已經失聯 n 年嘅朋友出來。

是咁的。尋日諗住碌多最後一嘢 facebook 就出門返工,點知神推鬼擁,命中注定,畀我眼尾見到個 list 上面,有個名熟口熟面。

我以為自己已經唔記得咗佢。所以睇到個名嗰刻,我係有啲呆撚咗。個腦一片空白咁click 入去佢個 wall,profile 係一個唔知乜水嘅漫畫公仔,cover 就係影住個天,有幾嚿雲。

廣告

無咩特別吖。我同自己講,無咩特別啫。跟住就熄 mon,返工。

但係行到落巴士站,企定,諗完又諗,我諗我唔可以否認自己其實好 care。我忍唔住拎部手機出來,開返個 facebook,喺個「你可能認識的朋友」list 度,手抽筋咁起勢掃。

廣告

我掃咗幾千次都掃唔返佢出來。咁不如直接 search 佢個名?偏偏佢個名又太 common,一 search,幾百幾千個女仔都係同名同姓。我搵唔返嗰張有個漫畫公仔嘅 profile 相。

或者 Mark Suckerberg 只係想令全球網民明白一個道理,就係生命無 take 2,好多嘢係過咗去,就返唔到轉頭。

不過,道高一尺魔高一丈,好在我有屋企電腦長開嘅習慣。我無離開個 page,放工返屋企都仲可以睇得番。

上咗巴士,先又醒起,其實睇得番都無用,因為我連佢係咩樣都唔知道。

返到學校。上堂前其實仲有一疊仔功課要改。但係望住疊簿,我知道我唔會有心情。是但啦,算數啦,反正改唔切學生仲開心。

於是我就開電腦,google 三個英文字母:ICQ。

一年前我曾經喺班房做過統計,叫知道咩係 ICQ 嘅同學舉手,結果 38 人入面得一個知道。嗰條柒撚獴獴仲要係發緊夢聽錯我問咩叫「屎橋」。算啦佢哋就來連 facebook 都唔知係乜。好快又會唔知 IG 係乜。好快又會唔知 Snapchat 係乜。

ICQ 就好似一隻曾經被愛但終於被遺棄嘅流浪貓。但佢無死,反而一日一日咁長大。今日,其他貓有嘅 voice message 功能、video chat 功能,甚至 stickers 功能,佢都有齊。

打開 WEB ICQ,網頁要求輸入 ICQ 號碼(依家叫 UID,唔再叫 ICQ#,何苦改?)同密碼。諗都唔使諗就輸入。原來依兩組數字仍然存藏喺記憶深處,我覺得好神奇。

就係咁,我打開咗一部黑歷史。

曾經,一個多愁善感嘅女仔將自己個名改做「痛哭。白雪」,依家佢係一個藍絲差婆;「~寂寞孤身.BeN~」係個老師,主張大中小學生不應談戀愛;「花火 Gigi」顧名思義曾經好愛花火 Gigi,Gigi 唱≪花火≫嗰年 25 歲,今年 40;一個男仔啱啱結婚買樓,佢個名叫做「** 小小豬b °::.」,但係 info 寫嘅係佢前……唔知幾多度嘅女朋友名。

時移世易。

好多人我已經唔記得咗係邊個。但我當然仲記得佢。~☆ FAN ★~。前後嘅符號成日改,但中間三個字母永遠都唔變。

佢花名叫做阿煩。

再 Click 入去,睇到佢 info。

藍和白形成了天
你共我樂透半天
倚在你肩 靠在海邊
星星月亮兩手牽
日與夜變化萬千
坐上飛氈 飛到天邊

在水平線 就這樣分不出黑白天
在天堂見 折翼天使吃著半支煙

天氣還算好
就算下大雨令你很糟 不覺你糊塗
天氣還算好
縱遇上風暴 令你跌倒 有我待你好

在懸崖邊 遼闊天地再會看得見
在回南天 證實戀愛日期沒改變

天氣還算好
就算下大雨 令你很糟 不覺你糊塗
天氣還算好
縱遇上風暴 令你跌倒 有我待你好

同再起步 同再起步

二汶把聲喺腦海裡面不斷盤旋。曾經我同阿煩好鐘意依首叫做≪好天氣(天朗氣清版)≫嘅歌,好鐘意依部叫做「好天氣」嘅廣播劇。嗰個係 903 叱吒風雲嘅年代。所以你知道點解佢叫自己做阿煩。好多個放咗學嘅下晝,我就係同佢一路聽住 903,聽住陳占嘅故事,阿 Moon 嘅故事,阿煩嘅故事,一路傾 ICQ,咁過。

想睇下有無可能搵得返同阿煩嘅對話 history,雖然其實我早知係無。

除咗個名同 info,再無其他資訊。

今日喺 facebook 見到嗰個,就係 Fan 再加佢個姓。定係其實根本就唔係阿煩?
 
打鐘。我開聲同自己講,算啦,諗咁多把撚,係又點唔係又點呢?

去上堂啦柒頭,將你嘅煩惱,發洩喺班學生身上,Go Go Go。

喺 ICQ 識阿煩,係 form 4 嘅事。佢 form 2。

雖然嗰時未有所謂「狗衝」,但作為男人天性,狗衝其實係亞里士多德到孔子都會有嘅行為。當時,絕大多數嘅狗都會喺 ICQ 嘅 friend search 功能嗰度衝。只要你喺 profile 放張靚女相,無論你真人靚唔靚,係男定係女,都會每日收到最少十個八個男仔 hi 撩你撩你講嘢。

而對住呢種出樣嘅女仔,我知道我從來無行。一來,人哋貼得張相出來,其實一定會問返你,can you send me your pic?唔怕同你講,我一 send 通常就無下文。二來,當時我唔識咁多啦,後來睇咗一本雞精書先明白,ICQ 溝女原來係有竅門嘅。我仲記得作者話,人哋女仔每月有幾百人排住隊想同佢傾偈,真心,點解要揀你先?你話你係好男人,心地善良?屌你啦,就算全香港只有 10% 男人心地善良,除返條數都有幾十個心地善良男排緊隊。Why you?

所以你需要嘅係技巧。

比如雞精書入面有章介紹一條金科玉律,叫做「諗多一步,目的達到」。即係話做男仔嘅,切忌令女仔唔知點將個 conversation 繼續落去。Ok,sure,no problem,咁講嘢嘅男仔全部無得留低,要一筆勾銷。你應該要喺 send msg 畀人嘅同時,諗埋對方可以點答。所以你講完 ok 之後,其實應該要加多句:咁你呢?如果人哋問你鐘唔鐘意唱k,你答完「鐘意」之後亦要問返人,妳成日唱架?當然唔係吓吓都要用問題回應。假設人哋話,我食過最難食嘅壽司就係明將,你可以咁講:我都食過,真係好難食好難食,可唔可以丟佢落山。最恐怖嘅係啫哩軍艦,啫哩軍艦就好似毒蘋果,食過嘅人都會受詛咒,永遠得唔到幸福。咁樣,對方就有好多空間可以回應,例如佢同唔同意你呢句說話,有無食過啫哩軍艦,新白雪公主好撚鳩,之類。

總之你唔會答:食過呀,好難食。一要女仔停低諗點樣覆你,你就輸了。

本書叫≪網民解毒≫。其他技巧仲有好多,想知自己搵來睇。我想講嘅係接觸呢本書,已經係中六中七,所以識阿煩個 moment,我完全唔知有咁嘅學問。而正正係因為我唔識,靚女都唔會理我,所以我狗衝嘅時候,只會專揀無貼相嘅女仔。

就係咁,個天畀我遇上阿煩。

「妳鐘意聽少爺占?」

「鐘意!你點知???」

「因為妳叫做阿煩。」

我 send 咗隻≪好天氣(天朗氣清版)≫ mp3 畀佢。

「我聽緊依首」

「……我都係」

第一晚,我哋傾到凌晨四點。第二日要返學,阿媽屌我做乜仲唔瞓,我話,人生大事,人命關天!佢嚇到縮返入房。我同阿煩由≪好天氣≫傾到≪四點水≫,由≪四點水≫傾到「學校線人」,傾到同學,傾到自己學校,傾到鐘意去邊度買衫,傾到嗰期打風,貓仔爬上樹唔識落返來。第二日一放學返屋企再傾。第三日如是,第四日如是,第五日如是。

好啦,你一定會話,屌你講夠未啊,傾偈無相無偈傾。係的,我是明的,也是認同的。問心,傾耐咗,我係咪一啲都唔想知佢咩樣?梗係唔係。幻想都要有個對象(純愛,唔好諗邪嘢)。

之但係,同時我亦有另一種諗法。我覺得同阿煩嘅純文字交流先至係最真。一開口問相,有啲嘢就無可避免會無咗。

慶幸我哋成長喺一個文字嘅年代。嗰陣時,就算想搵佢張相來睇都唔係咁易。連數碼相機都少見,莫講話用手機影完 upload 上網,share 畀朋友。咩 food porn,相機食先,無呢樣嘢。你有嘢想記錄,有感受想表達,通常都只係可以寫,貼網上日記,貼 ICQ info。

我記得嗰時同阿煩傾咗唔夠一個禮拜,已經開始上癮──愛情學上嘅正統講法,叫做「掛住」──我想話畀佢知我掛住佢,但係又淆底,唯有喺 info 度寫一篇引人遐想嘅鄺體短詩,希望佢對號入座。

所以我一直唔明鄺神有咩咁神,中學時代我就寫緊鄺體啦。不過我諗起畢卡索話:「每個細路都係藝術家,問題係大個咗點令自己繼續係。」或者鄺神最神嘅地方,正正係佢幾十歲人都寫到成隻小學雞咁。

寫完,第二日,我就見到阿煩改 info。佢話佢都好掛住某個人,唔知嗰個人掛住嘅,係咪佢。

梗係啦,仲使問。就係咁,我哋一齊咗。整整三年,我同佢都係鄺體傳情。我一張相都無問佢攞過。

然後我哋開咗個共用嘅 showhappy,然後我哋轉咗用 xanga。然後我哋轉咗用 msn。少爺占組成咗一隊叫野仔嘅樂隊又暫休。≪好天氣≫續集≪19 歲≫推出又播完。≪四點水≫續集≪落雨路≫推出又播完。依三年我哋日日傾偈,history print 出來應該厚得過≪大英百科全書≫,句句對話甜過菠蘿罐頭。

直至 Mark Sucker 創辦 facebook 嗰年,我哋嘅關係先走到盡頭。原因?唔知呀,科技日新月異啩。總之慢慢,慢慢,我哋就愈來愈少傾偈。其實 ok 嘅,我接受。菠蘿罐頭都有期限啦。

阿煩。唔知佢依家點呢。

Lunch time 嘅時候,我耍走咗幾個約好傾 project 嘅學生,想喺 Spotify 開首≪好天氣(天朗氣清版)≫一個人聽。首歌收錄喺一張叫做≪少爺占廣播劇音樂全集≫嘅專輯。一 click 入去,成啖珍珠奶茶噴出來,粒珍珠撞落個 mon 度再彈返落 keyboard。

CD 封面係五個漫畫公仔,其中一個,就係佢 facebook 張 profile。

係佢。其實我早應該知道係佢。藍和白形成了天呀。

阿煩。

放學鐘聲一響我快過班波牛飆出課室。我飛的返屋企。因為我好驚會停電或者阿媽成杯咖啡打瀉落部腦度或者人猿突然襲地球,令我再搵唔返佢個 facebook account。Fan,鬼叫佢個名咁 common!

喺的士上面,我合埋眼深呼吸。阿煩。我好想同妳講,好耐無見,妳好嗎?我……係掛住妳嘅。但十幾年前嗰種擔驚受怕,又再重演。我好淆,佢會唔會答我話,阿生你乜水?佢會唔會當我係纏住佢唔放嘅變態佬?會唔會當我係呃蝦條嘅賤男?寶藥黨扑頭黨?

何況我要點同佢講嘢呢?我哋根本就唔係 friend。咁係咪要 add 佢做 friend?佢唔 accept,我咪柒過 note 7?好啦,就算佢會 accept,跟住又點呢?

「hi,how are you」咁呀?根據「諗多一步,目的達到」,我應該要幫佢諗埋點答,但係我諗唔到。屌我諗唔到。

深呼吸。或者我可以寫個 info,畀佢對號入座。

然後我就明白其實我唔會寫到。我唔再係小學雞,我流嘅血裡面唔再有鄺體。時代改變,我跟住時代一齊變。我已經唔再識寫 ICQ info。

更莫講話 facebook 根本無 info。當然你可以出 Wall post,但 Wall post 同 info 係兩件事。Wall post 只係你某一刻嘅感受,人哋只會一掃而過;但係 ICQ info,係 timeless 嘅。正因為咁,今日嘅 ICQ 先至會好似一座受保育古跡,雖然已經無人再用,但灶頭上面隻鑊、牆上面掛住嘅相、書枱上面嗰封未寫完嘅情書,統統記載住曾經有過嘅人同事。

我最後一個 info,只有一句。我已經唔記得後生細仔嘅我點解會有咁嘅體會:

「時間沖淡不了一切。」

我突然好驚,我同阿煩嘅回憶會被破壞。所以我做咗一個決定:我唔會 add 佢。

因為最重要嘅,其實唔係要知佢係咩樣,唔係要知佢結咗婚未,甚至唔係要知道,佢仲記唔記得我。

最重要嘅係,喺我記憶入面,我曾經同一個叫做阿煩嘅女仔,純粹用文字,連續傾咗一千晚偈。我哋一齊聽過林二汶唱歌,一齊笑過 I love you boyz,一齊為森美自己講自己笑滴過汗,一齊追過 Vani 嘅專業推介。最重要係,佢曾經係我女朋友。最重要係,我曾經愛過佢。

人生無幾多個三年架咋。

返到屋企,我沖咗個涼,開著個 mon,望住阿煩張 profile pic 同埋嗰片藍和白形成嘅天,流咗兩滴馬尿。跟住我 close 咗嗰一頁,再喺「你可能認識的朋友」list 上面,佢個名嗰一格,噤咗一下個交叉仔。

然後我寫咗依件事出來。無圖,只有字。寫完,喺依一秒,我竟然覺得自己又好似返返去寫 ICQ info 嘅年代。我相信阿煩一定會睇到依一篇,一定會對號入座。阿煩,如果妳睇到,其實我想同妳講,多謝妳,再見。

發表意見