立場新聞 Stand News

【最入屋文宣】連登豬馬賽克砧板 連登豬火腿便當

2019/11/4 — 14:17

近看,一 pat 嘢,行開啲睇,我見到喇!係連登豬啊!

起初見到個馬賽克,以為邊區個連儂牆又有新作。睇真啲,隻豬係立體㗎!原來係砧板,一支支小木柱一格格咁砌出嚟!我數過,我真係數過,total 用咗 34 乘 19 即係 646 支木柱仔做出來。少啲心機,少啲耐性,實在係都做唔嚟!

連登豬馬賽克砧板
(Facebook 圖)

連登豬馬賽克砧板
(Facebook 圖)

廣告

咁考功夫嘅事,出自做開木工的本地藝術家之手~Roy 今朝在 Facebook 貼出大作話製作過程「最唔洗用腦」,但卻有自我療癒之效。他又好坦白說,花時間做個連登豬木砧板可能真係無咩用,但他說「我會keep住做,日後義賣又好展覽又好,送畀黃店做認證都好,日後先算」。

廣告

你問我,過程諗起都覺得治癒。獨治癒,不如眾治癒。唔知 artist 會唔會考慮開班一齊 do?

繼 Pepe 之後,連登豬可以話係最受歡迎的文宣 icon,而且好似特別受藝術家歡迎。早在連登豬馬賽克砧板之前,另一個香港藝術家 Milo 用火腿砌出連登豬便當,睇落都相當有質素~用連登豬馬賽克砧板整連登豬火腿便當,應該特別好味道!

連登豬火腿便當
(Facebook 圖)

連登豬火腿便當
(Facebook 圖)

計我話,文宣嘅嘢,最緊要入屋!睇個樣就知,連登豬咁可愛,一定無公害。砧板又好,便當又好,有心人應該投資幫佢哋量產。抗爭日常化,由你每日食嗰餐飯開始~今日,你幫襯咗黃店未啊?

發表意見