立場新聞 Stand News

會展擺低我

2016/2/20 — 12:02

Tesla Facebook圖片

Tesla Facebook圖片

一講 Tesla,收唔到聲。

Tesla 有幾好,講 details 講唔完,就講最大路嘅價錢同速度。

買 Tesla 嗰陣,佢哋有個優惠,保證三年內 75% 收返架車。就算你買到一百萬嗰隻 model,三年內你嘅淨付出係 HK$250,000。(不過而家個優惠已經變咗 70%,但仍然好抵。)

廣告

當然,仲要未計慳埋嗰啲油錢。

舉個偏少少嘅例子,如果你住大埔,來回中環,假設你揸㗎一百萬嘅車,耗油量應該幾驚人,一個月四千蚊油錢已經算保守估計,一年就係四萬八。如果你揸 Tesla,三年你慳十幾萬油錢。

廣告

講速度更加唔使講,百幾萬嗰架 Tesla,零至 100 係 2.8 秒;七十幾萬嗰架,4.4 秒,就算係六十幾萬嗰架,都只係五點幾秒。咁嘅 performance,只係咁嘅價錢,你搵畀我睇。

幫 Tesla 寫廣告文?係幫地球寫廣告文。如果全街都係電動車,受惠嘅係每個地球人。

好多熱愛跑車的人會說,Tesla 冇操控感冇駕駛感冇乜感物感。的確,好多專家都未必會推薦 Tesla,而所有讚到 Tesla 天上有地下無嗰啲,都係車壇門外漢,包括荷里活紅星和超級富豪。信邊個,是個人選擇。

即係咁,譬如話買隻錶,梁朝偉話呢隻好,但鐘錶雜誌總編輯話嗰隻好,你買邊隻?我買梁朝偉嗰隻。

無啦啦講咁多,因為 Tesla 嘅 Model 3 終於接受訂購。三月三十一號正式面世,四月一號可以喺網上落訂。

Model 3 嘅定價係 Model S 嘅一半,訂金好似係一千蚊美金,而某啲 Model 3 型號會同寶馬嘅 M series一樣咁快。

明白,有啲人係要架車有巨型定風翼再四波拖二波鬼殺咁嘈先覺得係揸緊車,go ahead。

開住㗎 McLaren 鬼殺咁噪梗係型,但如果我係女仔,你開住架臭飛戰車噴晒煙鬼殺咁嘈車我去 Grand Hyatt 燭光晚餐,得,唔使客氣,你喺會展擺低我得喇,我自己行後門入酒店。

發表意見