立場新聞 Stand News

有種廣告,就係無需自我河蟹 — 專訪李施德林何韻詩廣告幕後創作團隊

2016/5/31 — 13:47

HOCC  x 李施德林廣告短片截圖

HOCC x 李施德林廣告短片截圖

有種代言人,你肯搵佢,佢真係會仆心仆命瞓身去為你代言。

就好似 HOCC ,李施德林搵佢做今年代言人宣揚「Bold大你膽量」,廣告片上星期五出街,佢喺自己facebook share 完之後,竟然肯自費落sponsor ad promote 個post。(參看附圖,留意係Sponsor Post)

「車,唔畀個客同佢傾咗叫佢落 ad 架?」

廣告

呢個質疑好正常,但正常客戶要喺代言人個post 度落ad,都會要求代言人直接upload 條片,賺盡share同reach,好少隔山打牛落ad 喺一個share post度;而且我上周五晚向廣告嘅幕後創作團隊(包括客戶同agency)求證,佢哋話落ad 呢個動作完全係hocc 自發兼自費,佢哋見到都好感動同喜出望外。

廣告

幾多代言人拍完廣告,拍下籮柚就走,廣告出街,只肯做合約上列明嘅工作,之前冇commit?當然唔會自動share片蝕畀你,呢種代言,其實好鬼形而上。而肯自費,代表hocc已經品牌上身人brand合一,hocc = Listerine,不分你我榮辱與共。呢種代言,先至真正入心入肺。

hocc可能係全港首個肯為自己代言嘅品牌貼錢落ad 嘅藝人都未定。

何韻詩 x 李施德林廣告 facebook post 截圖

何韻詩 x 李施德林廣告 facebook post 截圖

*** *** ***

有種客戶,因為肯放膽搵有種代言人,先至有可能發生以上美事。

「我哋同阿詩可以話係一拍即合。Listerine今年Global 係以『Bring Out the Bold』為主題,agency就提議搵何韻詩做代言人。可能因為個idea好match佢,由一開始阿詩已經好積極咁參與討論同畀意見。條片剪完出嚟,佢覺得script可以再好啲,已錄好嘅VO都可以放棄再錄,真係非常專業!」客戶代表說。

「我哋無講到明一定要阿詩出幾多個feed或reply幾多fans,但我哋見佢manage fb嘅作風,已經知佢一向好肯同fans傾偈,而當條片出左之後,佢逐個回覆fans 嘅comment,更加超乎我哋預期。」

咁係咪一開始就只係得何韻詩一個選擇呢?「係,其實我哋一嚟真係單天保至尊,淨係提議搵阿詩,因為覺得佢形象上最符合客戶個主題。」負責創作呢個Campaign 嘅Agency--Zoo嘅代表透露,「其實嗰時覺得客都係五十五十會Buy呢條橋,但既然客話要夠Bold,我哋就好Bold咁propose 咗阿詩,冇理由縮架嘛!」

點解五十五十?因為大家都知,hocc一向好有爭議性,佢come out宣揚大愛無疆,傘運之後變得更加敢言(仲考慮過要從政),而敢言喺香港,就等同倒自己米。幾多廣告客戶,宣揚突破創新,暗地裡偏偏追求穩陣,害怕得失任何人,搵hocc代言,會唔會太政治不正確?

「其實我哋都冇乜政治考慮,覺得hocc呢個人選啱就去馬。因為政治考慮而放棄一個好嘅idea ,我哋覺得冇乜必要。做Branding而家就係要夠 human,我哋唔會因為佢而家係一個獨立歌手,或者冇乜廣告商垂青而介意;可以將一個Global idea,轉化出同香港現況息息相關嘅insight,先至可以贏到顧客嘅心。」

係,香港人而家最需要嘅,就係放膽行前一步,引發無限可能;而一個品牌,可以回應到時代,自然可以引發巨大嘅迴響,甚至回報--睇返出片嘅post,就有fans 貼出購買李施德林嘅單據,以實際行動作出支持。證明揀啱人選,真係可以化推廣為銷售。

*** *** ***

有種廣告,就係無需自我河蟹;有種一拍即合,就係可以締造雙贏。

由前排白咖啡落廣告喺 PassionTimes 熱血時報,到今次Listerine搵何韻詩,都證明品牌採用敢言代言人、投放廣告喺敢言媒體,回報,可以高到你唔信。

為公司業績、亦都係為自己嘅Portfolio著想,係時候爭取做更多有種campaign啦!

Listerine ‪#‎Bold大你膽量‬
Teaser Video:

李施德林 x 何韻詩【放膽食】Video:

李施德林 x 何韻詩【放膽愛】Video:

Campaign site

作者:雷文

 

follow 廣告狂人instagram

原刊於廣告狂人

發表意見