立場新聞 Stand News

朱古力味嘅屎

2016/10/6 — 12:41

曾經俾人問過一條矛盾對決題:

「屎味嘅朱古力,同朱古力味嘅屎,你㨂邊樣嚟食?」

面對呢啲無聊問題,我俾出一個好科學嘅答案:

廣告

「朱古力壞咗變屎味有可能,但呢個世界係冇朱古力味嘅屎嘅。你屙到一督 Double Chocolate 味嘅屎出嚟擺喺我面前,我再答你。」

但原來,呢個世界,真係有朱古力味嘅屎。

廣告

日本公司 Yamamoto Fragrances 與工業產品製造商 Shikibo,共同研發咗一種新型除臭劑,名為「Deo-Magic」,原先應用喺紙尿片同寵物用品上,但最近諗到一條名乎其實嘅「屎」橋,就係將 Deo-Magic 應用到大阪市嘅吸糞車當中,而唔知邊個天才,選擇咗一種特別嘅氣味去抗衡臭屎。

無錯,你答啱咗呢條一百萬嘅問題:答案係 C。朱古力味。

Deo-Magic 功效強勁,吸糞車半點屎味都冇,反而滲出香濃朱古力味。(突然想唱首廣告歌:結果,太多朱古力味,屎味今次冇掟企。)呢個創新方法解決咗一個城市臭味問題,但日本網民唔多欣賞,認為好有問題,媽聲四起,劣評如潮,認為如此這般會搞到大家有朱古力恐懼症。

其中有個 Comment 我認為罪該萬死:「點解偏偏要㨂一樣啡色食品嘅味道?應該用橙味先啱!」

拜託唔好,因為我係 Club 橙餅死忠 Fans。

品牌應用香味營銷,要細心選擇,千祈唔好搞出朱古力味嘅屎。

據聞香港某發展商既銷售部門,曾諗過將海洋嘅味道加入新樓盤示範單位,藉以體現海濱優閒生活嘅賣點,但後來發覺香港嗰種真正嘅海水味既鹹且澀,一啲都唔好聞,所以最後都無用到條橋。

Scent Marketing 係營銷重要一環,市場上有好多類似 Yamamoto Fragrances 嘅香精製造公司,有求必應溝出獨特氣味,讓品牌應用到產品或宣傳推廣上面。新加坡航空喺呢方面用心經營,無論空姐所使用嘅香水,或機上派發嘅熱毛巾,都用上一種名為「Stefan Floridian Waters」嘅特製香精,配合獨特絲質制服,令顧客對品牌留下深刻印象。

呢類香精製造公司,可以人工造出各類古怪味道,例如我聽過有汽車香薰,有一陣「新車味」,模擬新車落地嗰種座位嘅皮味,令人永遠有揸緊新車嘅錯覺。

「新車味」有市場,「新機味」同樣有市場。

美國有間專門製作 Apple 電腦用品配件嘅公司 Twelve South,推出咗一款蠟蠋,強調點著後所散發嘅,係新買 Mac 機開箱嗰陣新機味。「New Mac 蠟蠋」盛惠 $24 美元,咁貴以為冇人買?開賣幾小時內被果粉搶購一空。

下次 Steve Jobs 生忌死忌要悼念,識點,一定點 New Mac 蠟蠋。

朱古力吸糞車:

發表意見