立場新聞 Stand News

極地登山堅要有死亡覺悟

2017/5/26 — 12:09

珠穆朗瑪峰是不少登山者的夢想之地(圖片來源:shrimpo1967 、Druk Air @ wikipedia)

珠穆朗瑪峰是不少登山者的夢想之地(圖片來源:shrimpo1967 、Druk Air @ wikipedia)

香港中學教師成功登上珠峰之巔,好自然成為傳媒焦點,並引起爭議,其中最有趣的討論就是所謂見死不救的問題。

我就唔會話人乜膠物膠,因為關乎生死的問題,本來就值得爭議,而爭議背後,就係大家價值觀嘅唔同。而價值觀呢樣嘢,係會隨著身處於不同環境而有所改變。我覺得一名香港老師成功登頂,其教育意義不限於勉勵她的學生要堅持自己理想的老土嘢,對香港人來說,其教育意義就係要衝擊香港人的價值觀!

廣告

香港人實在是活於太平盛世久了,平時生活未必想到死亡覺悟的問題。加上香港的999服務實在太好,遇急病或意外,打個999好快就有人來救。救人和被救,在香港人眼裡係Take it for Granted的!近日我睇過一篇報導話香港超越了很多國家成為人均最長壽的地區。我忘了香港人是否真的最長壽,但我好肯定如果全世界有一個長壽比賽,香港實係名列前茅。我初時好生奇怪,成日話香港人生活習慣唔健康,壓力又大,點解會咁長壽?有人分析話香港999服務效率奇高,打了電話好快有救傷車來,上加香港地方夠集中,前往醫院路程不會遠,比較容易救得番,令香港人的長壽紀錄跟贏全世界。香港人在這種環境成長和生活久了,覺得出事就一定有人來救是理所當然,一啲都唔出奇!

問題係,當你身處極地,成個故事唔同曬!何謂極地?報導指登珠峰的人都係要簽生死狀的,去了預左會死嘅地方就叫做極地。簽生死狀並非畫隻龜行禮如儀般簽份文件咁簡單,其意義就係你要做好左死亡的覺悟。

廣告

何謂死亡的覺悟?

1. 你去得極地預左自己會死。

2. 你自己出事唔好奉旨諗住有人來救你。

3. 你見到有人出事亦唔好奉旨去救人。

有人會話,去左會死人咁危險嘅地方做乜咁傻仲要去,實在沒意義。但去極地探險好玩之處就係明知果度會死人但又讓自己活著走番出來,呢個就係佢做人嘅意義。

而「做人豈可見死不救?」這是在一般情況下做人應有的價值觀,有人會覺得為人師表更應該以身作則,做好救人榜樣,甚麼都可以放棄,就是人命不能放棄。「你身為老師竟見死不救,點樣面對你啲學生?」問題係,這價值觀只限放在一般情況,在極地絕不適用。

又有人會覺得,做人根本連極地都唔應該去,就如孔子所講君子不立危牆之下,為左一個所謂虛空嘅理想搞到連命都冇,值得咩?這就是人生何謂有意義的問題。有人覺得循規蹈矩做人,永遠生活在安全網,平平安安過日子,遠離危險才有意義。但有人覺得平淡生活就是沒意義,出去闖世界大冒險才有意義。兩套價值觀沒有對錯,只看你自己如何取捨選擇。

條路係自己揀架!「眼碌碌」望著曾老師等死那個人,不能怪曾老師不給他氧氣桶,因為登上極地係佢自己揀的,在這種惡劣環境各安天命,沒有一個人有責任和義務去救你。你視人命好重要嗎嗎?但在大自然入面,一條人命又算得係咩!你對「眼碌碌」果個人心有戚戚焉咩?倒不如祝福他死得其所。戰士死於沙場,極地登山者死於絕嶺之顛,做人又有何憾?

而每一個人去到這種絕地環境,只能按自己的判斷力行事,不受別人的傷勢和「做人豈可見死不救」這種世俗價值觀左右自己。能夠救人的自然要去救,判斷不能救人就繼續上路!不要理會別人讚美你是救人英雄還是受千夫所指你見死不救。

我特別想補充一點,去絕地冒險,參加者簽曬生死狀對外發曬聲明話人命自己負責,即使到最後死左,或者見死不救,完全沒問題,因為大家清楚遊戲係咁玩。但香港好多果啲明知天氣惡劣都硬要繼續上山、或者未想清楚就上山、又或者行山老手卻自恃勇猛專門行啲異常難行路線的人,出左事要人來救,我就覺得呢啲人賤格到無淪。因為香港行山並沒有簽生死狀這回事,而消防員和其他救援人員,佢地職責所在,但凡接到求救或失踪報告,佢地一定要上山救人,而在惡劣環境之下,呢啲救援人員隨時會被不負責任的行山者累死!

曾老師有這種膽色和勇氣登絕嶺看世界,本身就很有資格與她的學生分享。而作為教育工作者,她亦以身作則,盡了啟發人思考的責任。一般人只期望教育工作者講一啲阿媽係女人係人都識的道理,但真正教育係要去啟發人諗嘢,讓人作出自己的判斷。香港實在有太多人太容易受人影響,人地批評兩句自己就劣皮唔敢去做,然後又抵賴話人地評批佢將佢打沉所以做唔到,講到尾係自己沒有個人意志,唔敢跳出Comfort Zone。點解一個會欠缺個人意志?就是做人沒有覺悟,沒有覺悟的人連自己的生命有何意義都未清楚,又如何批評別人的選擇沒意義?

發表意見