立場新聞 Stand News

母親節送情人禮物

2016/5/6 — 19:17

(作者提供相片)

(作者提供相片)

二月十四日,老婆大人無端端拋低句:「情人節根本無乜意義」。對於我呢個從來未試過情人節送花送禮食大餐嘅人嚟講,最鍾意用「日日都係情人節」蒙混過關,直頭標冷汗。由嗰日開始,我𢱑穿頭殼,應該送乜禮物補償。

結婚廿八年,送過三次禮物。第一次:珍珠耳環,大人笑咪咪講多謝,然後問幾銀,如實答,「老公,你畀人呃咗,呢隻色、size、形狀、手工,最多值X蚊。囧!」

第二次:金飾頸鏈,第二日戴返工,專登喺我面前行過,一次咁多,話好難襯衫喎,我懷疑已經喺金價高嗰時賣咗。囧!

廣告

第三次,釜底抽薪,唔送首飾,送錢,寫咗張十萬蚊支票,等大人自己發落,點知望咗眼,隨手掟番畀我,補多句:「邊有人用自己錢,送畀自己當禮物。」弊,筆錢用聯名支票戶口開出喎。囧!

經過慘痛教訓,明白首飾呢家嘢,男人識條鐡,已經十年無膽再送過,今次大人開到聲,決定膽搏膽,喺五月八日母親節,代兩個仔送份禮物。

廣告

靜雞雞摷佢個首飾箱,發現好多閃令令飾物,醒起識佢第一日,大人一直係Swarovski(唔識讀)粉絲,客廳飾物櫃儲咗好多水晶動物,既然金飾唔敢買,現金就死梗,美滿婚姻險中求,翻兜珍珠襯水晶最穩陣,value for money,肯定唔會錯,我諗。

奉勸所有男性動物,唔浪漫唔係問題,唔使誇張成優良天性咁,更加唔好學我視送禮如無物,你未必有我嫁到個大方老婆咁好運,大安旨意十年一潤,隨時無情情畀人潤一潤,咁做好鬼笨。仲有兩日,即刻𢯊起心肝,母親節送份禮物畀老婆大人、母親大人、外母大人,三個最重要嘅女人,保你天下太平,家有寧日,我諗。

真摯嘅愛情靠雙方用心經營,一分愛護,兩分容讓,經常將肉麻說話放喺口唇邊,一份讚美,一份留意情人喜好嘅細心,一份氹人開心嘅苦心,就算母親節送情人禮物,有啲兀突,只要有心,一條水晶頸鏈,就可以話畀愛人知,你心中有佢,佢肯定冧到暈,唔使諗。

今日開始唔使返工,照舊晨早起身,大把光陰,唔寫感性離任,寫老婆大人,仲可以一路嘆齋啡,一路食花生,一路諗諗端午節食糭嗰時送啲乜。

(文章原刊作者FACEBOOK專頁

發表意見