立場新聞 Stand News

派輸

2017/8/31 — 20:01

背景圖片來源:陶傑 Channel Facebook

背景圖片來源:陶傑 Channel Facebook

稍稍有點人生經驗的保險代理也懂得選擇,該派還是不該派卡片的 timing,卻偏偏就是有種天才連這等稱不上是學問的學問也沒有。

剛剛。

酒店 lounge,大家 happy hour,同個靚女律師傾得鬼咁開心。

廣告

你明唔明咩叫傾得鬼咁開心?即係你唔使 google 都會知道係 buying signal 嘅動作佢全部做晒出嚟,例如一分鐘撥弄秀髮六次,有意無意拍吓你膊頭,手臂貼手臂又當若無其事。

就係傾到興起嗰陣,無端端有個我完全唔熟嘅人走嚟同我 say hi,根據我記憶佢係喺一間類似華資銀行做 mortgage,而佢目的當然唔係同我 catch up 而係想同我爭食。即係咁,我個人好民主,你有料咪公平競爭囉,最慘你冇料又要扮有大把金條,嘥自己時間嘥我時間嘥靚女時間。

廣告

阻人發達猶如殺人父母有冇聽過?

最最最最最柒係,知道人哋去過不丹就叫人 send 個 itin 畀你,人哋個 itin 你 afford 唔到都不在話吓,你留個 email address 畀人嗰陣竟然派卡片?等等先葉生,派卡片有問題咩?派卡片梗係冇問題,但喂大佬,正常人都派公司卡片,佢派咩卡片你知唔知?佢派嗰啲係咩魚鱗社車輪社亂輪社嗰啲卡片,即係話自己係亂倫社咩分區 chairman 嗰啲卡片,你明唔明係邊啲?

即係張卡片係要摺一摺嗰啲,點解要摺一摺?因為佢哋裏面有幾百種公職幾千種 title 要寫落去,成本書咁厚,不如唔好印卡片喇,印書啦,派書派書,一派即輸。

你知唔知呢啲人有咩問題?大佬,如果你係 proud of 自己做緊嘅公司,你點會唔派自己公司卡片?我唔係話歧視車輪社嘅朋友,但試問十個有幾多個唔係為咗 networking 而加入呢啲 organization?Networking 唔緊要,嗰啲乜社物社係屬於 low-level networking。

再講,我自己做一份工已經想死,你咁有閒情逸誌做二百幾種公職代表乜嘢?係代表你真係咁有能力身兼多位定係代表你想沽名釣譽攞著數?

完全唔反對 networking,但要小心選擇你的組織,有啲 associations 真係搞得好好,有啲就搞得好到不敢恭維,例如 Warwick Alumni Hong Kong。

Warwick 喎,陶傑母校,夠晒勁,但真正加入這個舊生會的 Warwick 人寥寥可數,點解?真係唔係個個有咁嘅勇氣加入,你睇佢個 logo 就知。字體顏色似乜?美國五十年代嗰啲 trading 公司,可能人哋懷舊。最引人遐想係字上面嗰條嘢,到底係乜?可能我心邪,我真係覺得係一個豹紋胸圍。

其實簡簡單單,用番 Warwick University 個 logo 咪算囉。

睇佢哋嘅 annual dinner 仲頂癮,backdrop 竟然就咁寫住 Dinner 2016,係唔係簡約主義到寫番個 Warwick Alumni Hong Kong Annual Dinner 都嫌多餘?

應該花心思嘅又唔花心思,唔應該多舊魚嗰啲你又喺度無情情發揮你嘅豹紋小宇宙,唔怪得我讀唔到 Warwick。
 

發表意見