立場新聞 Stand News

【温提:讀者請戴定黑超】緣定今生

2016/3/16 — 12:43

圖由作者所配

圖由作者所配

二十九年前嘅今日,我同愛人,即係老婆大人,相識三個月,已經情投意合,過多三個月,決定儲錢結婚,九個月後,即係二十八年前嘅今日,一九八八年三月十六日,一張婚書,幸福到今日。

有人問:「你老婆有乜好,你鍾意佢啲乜?」咁膚淺嘅問題,唔應該問,因為我唔會鍾意有人問老婆大人:「你老公有乜好,你鍾意佢啲乜?」

兩情相悅,緣定今生,真正嘅愛情唔講package,唔講條件高低,講究心靈相通,心心相印,你心中有我,我心中有你,永遠心甘情願將最好嘅部份,留畀愛人,絲毫唔覺得委屈犧牲。

廣告

老婆大人聰明過我,精明過我,識字多過我,靚女過我,樂觀過我,熱心過我,對身邊人好到無得講,但我以前廢青一個,每個月賺三千六,竟然睇上我。唔止咁,寧願犧牲自己天份,放棄大好前程,全心全意愛我同埋家人,無佢,我肯定無今日,無佢,我只係一個平庸嘅獨行俠,無佢,我根本唔想做人。

唔介意有人話我肉麻,因為愛可以化解人世間嘅戾氣,越多人宣揚越好。無論男定女,十幾歲定幾十歲,事業有成定普普通通,唔應該戇居居將愛收埋喺心入面發霉,而係要時時公開講,茄輪日日打,等愛人睇到感受到享受到舔到濃情蜜意嘅愛,時時刻刻如沐春風,感染身邊人模仿。

廣告

兩年前結婚周年紀念,連寫老婆大人十一日,?家cap啲圖畀大家欣賞(見文首及文末圖片)。睇完,或者明白,咁真咁可愛咁有趣嘅女人,唔嫁佢,嫁邊個,唔愛佢,我就儍;如果唔明,無所謂,我明就得,老婆大人知道就得。

上天啊,結婚二十八年,太短喇,一萬年喇,可以嗎?

 

原刊於作者 facebook,標題為立場編輯所擬。

發表意見