立場新聞 Stand News

港產爛片雜談:王老吉、OSIM特約 - 女人本色

2017/2/1 — 20:03

《女人本色》一幕

《女人本色》一幕

年份:2007
片種:劇情(但套戲係無劇情)
導演:黃真真
編劇:梁鳳儀、黃真真、姚君霓
主演:梁詠琪、薛凱琪、林子祥、鄭嘉穎、李克勤、張敬軒

劇情簡介:

-成在信(梁詠琪飾)是香港典型的女強人,她的老公杜林(林子祥飾)在香港回歸、公司政策改變的情況下被革職。成在信十年來的故事就從此刻開始。接著,她的丈夫因為車禍離世,當她以為自己可以把一切事情都處理得相當穩當的時候,她的兒子因為“非典”而病逝,失去工作,也失去了她與新任上司程必聰(聶遠飾)的一段情。

廣告

-準備放棄自己生命的時候,一個決定救回了她:她決定與昔日助手宋曉彤(薛凱琪飾)及毛毛(小儀飾)攜手開辦按摩椅公司,到最後,能否成功呢?

***文章有劇透***

廣告

我記得喺第一篇文章講過,爛片最最最重要係「劇情不知所謂」。當中有一種爛,並唔係套戲一開波都爛,而係中途變爛、仲變得好快。今次嘅《王老吉、OSIM特約:女人本色》就係當中嘅佼佼者。

平心而言,《王老吉、OSIM特約:女人本色》上半部稱唔上係爛片,頂多係一套拍得平庸,劇情牽強,人物無感情無交流嘅電影;但一踏入後半步,林子祥撞車身亡後,套戲即刻暴走,連續出現兩幕令人界櫈嘅劇情:

-強國式植入王老吉飲品廣告:植入得非常核凸,一個由王老吉堆成嘅金字塔,再每句對白都加「王老吉」三隻字。

-薛凱琪發花癲,成個癲婆咁開fashion model換衫三分鐘。若呢幕再長幾分鐘,絕對比得上《阿嫂》最尾炒車嗰段祖宗級瘋狂。

植入完王老吉一個品牌都唔夠,最後十五分鐘加埋OSIM,不斷插入OSIM 商品商標片段。劇尾一幕,導演似乎嫌觀眾未受夠喉(你仲睇緊即係仲頂得順),OSIM同王老吉同時出現,雙龍出海,雙鬼拍門,美點雙輝,嚟個終極蹂躪。有啲唔識嘢嘅人不斷批評天剎地球反擊戰2嘅蒙牛廣告,唔該去睇睇《王老吉、OSIM特約:女人本色》先,直頭冠名贊助呀!

諗真啲,呢種強行插入嘅模式,同政府將大陸夾硬嚟嗰套放嚟香港,同出一轍。唔使理你中唔中意,總之我就係要咁做,吹咩。Bad money crowds out good money.

套戲最為經典嘅一幕,係梁詠琪公司上市喺IFC嘅Harlan’s搞酒會。Harlan’s嘅主廚用廣東話講嘢,梁詠琪好驚訝,然後講咗句:

「香港回歸咗十年,而家外國人都要學中文咧。」

咁多年嚟,《王老吉、OSIM特約:女人本色》我睇咗四五次,每次睇見呢幕都覺得咄咄稱奇。你睇下!香港回歸咗十年,啲精一地都係咧!打飛機打到咁,何苦?

呢套戲完晒,先出字幕話你知佢係獻畀香港回歸十周年。但你會拗爆頭,因為套戲不但唔舐共、舐港之餘,仲有多踩低香港人同大陸嘅黑喻(超暗嘅暗喻,暗到睇唔到,稱之為黑喻):

-大陸人劣根性:梁詠琪(公司CFO兼人事部主管)同佢老闆(大陸仔,公司CEO),一齊簽文件迫公司部份員工減薪。之後有員工跳樓,公司要搵人孭鑊。條大陸仔點?佢一嘢就隊咗梁詠琪出嚟,炒撚咗佢。嘩!真係好貼切,完全反映大陸人起香港人尾注,不念舊情(佢哋係情侶),毫無道義,狼心狗肺,打完齋唔要和尚嘅惡習!無論之前幾好感情,一有事大陸人必定會起你飛腳,狠狠咁出賣你!

-返大陸做生意=倒錢入咸水海:故事以97政權移交作起點,公司主席話喺大陸開20間酒店。跟住香港開始仆街,公司又跟住仆街,減薪、主席爭人街數,一啲都冇提過返大陸開酒店點樣幫到公司渡過難關。呢個暗示返大陸搞生意只係等同倒錢入咸水海,唔會幫到公司……

-香港人靠負碌:梁詠琪係公司CFO,不過成套戲無交待過佢點樣能幹勤力,如何聰明精明,有逆境求存嘅精神,反而處處顯示佢係一個理財失敗(亂畀錢朋友投資啲乜嘢垃圾生意)、始亂終棄(被炒後想去自殺……但連自殺都失敗)、負碌到無倫(帶住兩件蛋散去做pitching但居然成功;亂畀錢朋友投資但朋友賺到錢居然同佢分)嘅廢物。最後梁詠琪係碌完一關又一關嘅情況下,居然成為上市公司嘅主席,好勵志之餘,係咪又好似香港好多人嘅「成功故事」?例如無廁紙諗到搭的士去拎嘅人。導演同編劇想帶出一個重點:呢班人成功,純粹因為香港打緊順境波,同本身才能技能毫無關係。真係用心良苦

───

梁詠琪自殺嗰幕,又係另一經典:佢嗰仔死咗、自己畀大陸仔出賣、無咗份工、兒時玩伴又過咗身,走投無路生無可戀,跟住電影用咗五分鐘去交待佢著條白色連身裙(順帶一提,條裙將梁詠琪腰粗背厚胸平腳粗嘅缺點表露無遺),再悲哀咁講佢要喺浴缸用刀片割脈自殺死。

正當佢要下手割脈之際……

電話響。

用十分鐘營造嘅肅殺氣氛,半秒內一•洩•如•注!好咧,梁詠琪一手掉爛個電話,又再想自殺之際……

門鐘響。

跟住一個正在尋死嘅梁詠琪居然死死氣去開門!!!你都就死咧,邊嗰嚟撳門鐘又有乜嘢所謂?之前五分鐘嘅劇情變得十分多鳩餘!結果一開門小儀入嚟,話投資羸咗錢,跟住梁詠琪就打消咗自殺嘅念頭。嘩,我屌!一個連自殺都失敗、尋死嘅決心一嘢就被動搖嘅人,點樣說服到觀眾佢係個聰明實幹嘅人?

───

劇情矛盾兼跳躍。套戲個幾鐘,不合理、無交待嘅情節大小不下三數十樣,而家特意挑選三數樣詳述之:

-梁詠琪同CEO上床:上床本身唔係問題。問題係,梁詠琪同CEO上床嗰陣,佢個寶貝仔中咗沙士,喺醫院深切治療部……即係……好似啲日本動作片咁「作為未亡人,我老公過咗身麻煩你用大根嚟填滿我空虛嘅心靈咁」。

-「點解人事部解僱我」:梁詠琪畀大陸佬起尾注後,氣沖沖咁去搵大陸佬問責。梁第一句就問:「點解人事部解僱我」……哈哈哈哈哈,根據故事設定,梁詠琪就係人事部主管嚟……我懷疑編劇根本唔記得咗呢個設定,又或者梁詠琪無理過人事部,結果畀自己管嘅部門炒咗都唔知。你點樣畀你自己管嗰個部門炒?點樣自殺而自己唔知?我真係唔識。梁詠琪係公司CFO,正確問法應該係:「點解董事局要解僱我?點解你唔保我,仲要贊成?」

-薛凱琪斬釘截鐵,決心要辭職,轉頭又喺公司出現。我居然諗起《寒戰II》嘅梁家輝。

-公司CEO:呢條大陸佬簡直係奇人。作為上市公司CEO,佢居然要自己揸車;公司間房細到核爆(細過《選戰》宋萬山間房),員工要行入佢間房就直接行入去,門口秘書都冇;為咗要知道許紹雄偷咗梁詠琪啲錢,無端端喺間蚊型地產經紀行出現;為咗去救梁詠琪、再食埋佢,無端端揸車喺員工樓下出現……真係神出鬼沒。

-林子祥負債?:故事無交待林子祥點解會負債疊疊,根本係屈鳩佢。只有一幕提供過線索-話說林子祥本身好多港股,但見勢色唔對,去經紀行放晒啲股票。最搞嘢係佢居然話要「沽空」股票!哈哈哈哈哈,你有股票,想賣咗佢,嗰啲叫「沽售」(sell);你覺得股票價格會跌,想靠股價跌嚟獲利,嗰啲叫「沽空」(short-sell)。林子祥本身有股票唔想再揸住,係要「沽售」,唔係「沽空」!再者,即使林子祥真係「沽空」,隨後幾年股市都係往下走,林子祥絕對唔使輸錢!編劇黃真真唔識商業社會運作,我理解;但梁鳳儀寫咗咁多本以商業世界作背景嘅小說,連股市嘅基本常識都欠奉,真係令人失望。

-其他:故事人物、枝節太多,角色走馬看花,人物感情薄弱,觀眾難以投入及產生共鳴;薛凱琪一角完全多餘(no offense to Fiona;我好中意佢);梁詠琪嘅公司業務全無交代,商業背景空洞無物。此等種種已經算小巫見大巫,不再詳細討論分析。

此文之配圖,係影片即將完結時所cap。梁詠琪望向電腦螢幕,突然露出一副難以置信之表情。但之後導演、編劇、剪接及梁詠琪皆沒有交待梁詠琪因何事而有此表現。梁氏呢個表情,正好同小弟睇完呢套戲嘅反應,一模一鳩樣:

恐懼、震驚、驚嚇。

回想起十年間我居然不下五次完成這爛片,實在自己都難以置信。

整體嚟講,《王老吉、OSIM特約:女人本色》喺林子祥(代表殖民地勢力)死後,下半部瘋狂暴走,同香港回歸後就無咗英國人,亂鳩咁嚟、藥石亂投,簡直同出一轍。此戲係緊隨《樹大招風》後,排名第二嘅港產政治隱喻片。我要用上十年時間先參透到佢嘅意思,《王老吉、OSIM特約:女人本色》簡直係香港呢個亂局中嘅推背圖,港產片中嘅璇璣圖,每次翻看都有新嘅理解同體會。爛至如此,實在不可多得。

───

養份時間:如何翻拍《王老吉、OSIM特約:女人本色》

-完全刪去薛凱琪一角;刪去許紹雄及鄭嘉穎。將無謂角色及戲情刪去
-將炒樓輸錢嘅人由許紹雄變咗林子祥(自己老公)
-將CEO大陸仔由朋友變成敵人

-故事講一個女人點樣為正義發聲:梁詠琪係公司CFO,為人有義氣,行善積德,偏偏老公愛好炒股炒樓;公司換上大陸CEO,樣樣講求關係不按制度同規矩;梁詠琪一早發現樓市會爆煲並分別提醒CEO及老公,偏偏CEO不理並將業務擴展至地產業務,老公想認叻而照炒(之後梁詠琪第一次救佢)。

之後梁詠琪發現CEO挪用公款並沽售公司股票獲利,想告發之,點知CEO有內應,完全郁唔到佢;CEO為報復,派人冼鳩林子祥,畀啲假嘅股票內幕消息炒孖展,林輸錢之餘,覺得愧對梁詠琪而自殺(有咁煽情得咁煽情)。梁詠琪嗰仔因沙士死亡,梁萬念俱灰之際,以前受過佢恩惠嘅人救返佢,一邊發奮圖強東山再起,再挺身而出指證CEO。

最後凸顯社會公義,好人有好報、惡人有惡報,努力總有回報,好似香港咁經得起考驗,然後BBQ完場。

下次介紹嘅,應該係我未睇過嘅《花都大戰》或者《內衣少女》。

───
爛片系列

阿嫂
我阿媽發仔瘟

作者 facebook

發表意見