立場新聞 Stand News

灣仔樂意扒房明年結業 老闆:每年加租兩成 無法撐下去

2015/9/22 — 14:39

繼夏銘記、金雀餐廳之後,再有老牌食店結業。屹立灣仔超過四十年的樂意扒房,亦計劃明年「光榮結業」。經營餐廳的楊氏兄弟今早在電台節目中透露,回歸後人流大減,客人「都是揸筷子多」,而租金卻年年爆增,直言租金近年每年加租兩成,「舊年(加幅)已經唔合理,今年再掠我一刀,我唔掂喇!」

樓上餐室樂意扒房 1974 年開業,以傳統老牌西餐馳名。座上客不乏外籍人士,甚至賭王何鴻燊都是常客之一。扒房四十周年的派對上,就連美國駐港總領事夏千福、天主教香港教區主教湯漢樞機都親身到賀,可見其飲食界「江湖地位」。

經營樂意扒房的楊大華和楊大程,今早接受商業電台「在晴朗的一天出發」的節目訪問時,透露光榮結業的消息。董事總經理楊大華形容退場是「被迫」的結果,加幅愈來愈不合理,叫二人無法再撐下去,「每年加租 20%,一路加上去,好唔掂架喇!」訪問中,他連續吐出三個「唔掂」,直言「地下人流旺,加租都仲 ok,但我地係樓上鋪嚟㗎,樓上鋪比較無咁旺。」

廣告

說到人流,楊氏兄弟更在餐廳目擊回歸前後客源的變化。楊大華憶述 97 前,客人好多都是外籍人士,笑言「警察總部果啲、英軍、商界啦,全部都是外國人,要揸兵器,即係刀刀叉叉食飯。」主權易幟,兄弟記得當年吃了好多次 farewell dinner,甚至有客人用餐後對他們說:「真係好唔開心,我要返鄉下啦。」

「今時今日呢,我地中國客人都有,不過都係揸筷子多,即係去食中菜多。」昔日門庭若市的扒房,如今門可羅雀,楊大華也坦言:「夜晚放工 5 點鐘後,啲人無曬喇,靜英英,水靜鵝飛喇,寥寥可數呀。」

廣告

傳統扒房買少見少的今日,楊氏兄弟檔感嘆現在西餐廳通常由大集團經營,少有像他們那樣「同客人好 close,好似一家人咁。」經營接近半個世紀,他們都直言對樂意扒房種下了感情,被迫退場的消息,一直都未有向員工透露半句,「伙計唔敢講呀,難以開口,呢個係心酸,唔係開心事。」

發表意見