立場新聞 Stand News

燒烤醬炆豬肋骨之製法與歷史

2016/3/17 — 20:50

作者按:

非常容易, 1個step!

燒烤醬炆豬肋骨(或豬腩) BBQ sauce slow cooked pork ribs (食譜+文化歷史冷知識+咁多點揀邊度買)

今集先俾食譜煮法, 後面講文化歷史冷知識 (你等緊佢焗的時候就可以慢慢睇)

材籵呢:

豬肋骨 (近腩位)     500G

廣告

燒烤醬BBQ sauce     1/2杯

茄汁                1/2杯

廣告

牛扒汁  Steak Sauce                  1/4杯

喼汁                2湯匙

砂糖                1/4杯

辣椒汁              隨便你

點搞呢:

將所有醃料撈埋一齊, 醃1-2小時, 放入焗爐180C焗2小時, 期間反佢一次個頂會無咁易烤乾/燶, 唔反都得既, 唔好俾佢燶就可以。

(你個焗爐無得較溫度? 你今次執到喇, 呢個餸無所謂的~)

 

而家來文化部份喇

先講歷史, 相傳……(fade in向世界出發mode) BBQ Sauce燒烤醬係十七世紀既時候係美國先開始出現既, 但係早期的食譜大部份都無燒烤醬的, 係後來去到1909年左右, 美國開始商業化生產燒烤醬之後才開始普及。時至今日……(慢慢fade in旅遊mode) 唔同地方的燒烤醬已經演變出佢地各自既特色喇.

南美呢, 就有種佢地既燒烤醬叫chimichurri, 不過我諗你地連個名都skip左來睇架喇, 如果你地係罕有既愛食之人, 特別中意搵埋的懶叉特別既野、無果樣整果樣既, 歡迎上來我個page講食經, 我地而家又繼續去第二個地方。

澳洲呢度的燒烤醬通常係同茄汁擺埋一齊的, 有的大牌子係香港都有得賣。味道正正常常, 亦唔會太辣, 都唔會太重味, 其實澳洲人食辣既程度同香港人差唔多, 味道來講一般無咁重口味。

至於美國, 其實出產最多不同而又有特色既燒烤醬口味, 除左有真係夠辣的燒烤醬之外, 仲有加左酒或者酒味既燒烤汁(通常係whiskey或者bourbon), 仲有HP汁之類的都係比較特別的燒烤醬, 而唔同地區又會加入少少果個地區既特別元素, 例如近墨西哥的會有少少墨西哥風格, 或者當地盛產既香料、辣椒等。

返到來亞洲, 香港既叉燒醬、海鮮醬(又叫甜醬), 原來好常被用來作為肉類醃料既底。(你係咪想話: 唔係下話甜醬都算?) 而日本既就梗係要數 “照燒醬”, 呢隻味呢, 我諗地球上都無咩人會唔中意掛。至於韓國, 都有一種發酵過既麵醬用來作為佢地既 “燒烤醬”,有辣有唔辣,任君選擇,不過通常韓國暢銷既都係辣既, 仲要辣到扒街。

今次無產品要介紹,暫時無賣燒烤醬,因為香港其實都有好多選擇, 如果你有行開city super呀、百佳果的都有, 之前係惠康都見過, Aeon十二蚊店都有一兩款西式燒烤醬(之前買過唔知係咪間間有, 試下大的果幾間)。至於點揀呢, 你可以睇下個招紙有無講係咩特別味道, 如酒味、煙薰、蒜味、洋葱、辣等, 再睇下背面個成份表, 去選擇你中意既香料、味道、辣道、濃道, 有些會註明有幾多個%乜乜的, 有些無。

歡迎大家share下邊隻好食邊隻唔好食,邊隻極難食。

太複雜既話, 一字記之曰: 試。

 

作者 facebook page

發表意見