立場新聞 Stand News

甘俾同大瘤結婚 一定唔係為左錢

2016/11/23 — 18:56

講個愛情故事俾大家聽丫。

大瘤話:「甘俾唔貪錢,好純品。」

甘俾話:「大瘤唔鹹濕,好純情。」

廣告

於是,兩人結婚了,好滾動呀~~~

啲人成日話,乜乜港女拜金,又時常聽人講十個男人九個爛滾。但係好似甘俾同大瘤咁Sweet同咁Pure嘅愛情,係香港真係好罕見。有朋友聽完呢個故仔,話喊左出黎。係呀,我自己都喊左十包紙巾。

廣告

甘俾嫁俾大瘤,唔係因為貪錢,呢樣係人都知,相信冇人會懷疑。大瘤佢又後生、又靚仔、身體又好,最緊要係,大瘤份人夠曬專一,唔會四圍滾。好似大瘤個Package咁好嘅男人,邊度搵丫?如果我係女人,貼錢都要嫁俾佢啦~

各位姊妹,唔恨得咁多架啦。有啲嘢上天整定,羨慕甘俾都冇用,因為妳地天生冇甘俾咁純品,一心只為真愛,睇錢睇得咁化。如果妳顯露出半點貪錢的野心,人地就唔鍾意妳架啦,好似之前個呂麗軍,係人板,有眼你睇!

講真,男女離離合合,本屬平常,我自己都經歷過,一般我都唔會拿出黎同人講,呢啲都係糊塗帳,冇咩好同人講,開心嘅回憶得閒自己回味下,唔好嘅就讓自己日後作個警惕。我亦冇興趣理會人地嘅情愛離合事,更加唔會去評論人地!

但無奈,大瘤同呂麗軍上星期就佢地二人分手問題,公開發聲明,不斷來來回回,搞到我一打開facebook同埋一上各大新聞網站,就睇地佢地單新聞。情況就好似,有一對男女做愛,佢地係屋入面關窗關門扑嘢,關我咩事?我睇唔到亦唔會過問。但當佢地係大街大巷赤裸裸地扑嘢,迫住大家一定要睇到,變成公共事件,咁自然人人有權討論。

大瘤將自己的家醜同埋瘡疤大肆張揚,用公開信方式同條女講分手,無非係因為錢銀,大瘤想止蝕,今日有七百萬香港同胞作見證,我大瘤要同妳呂麗軍割席了,以後唔好再黎問我攞錢啦。女方睇到呢封信,會點諗?可以想像得到,真係百般滋味在心頭。正所謂一夜夫妻百夜恩,我呂麗軍跟你大瘤睡了多少個夜晚,子女都替你生了出來,我倆有數不盡的恩情。現在搞到要分手了,你寫休書,發聲明,要我在七百萬香港人面前落得個貪錢罵名,教我顏面何存?

當然,大瘤一定會覺得,我唔係因為跟妳呂麗軍之間錢銀問題,搞到我好煩,我駛做到咁絕!正所謂清官難審家庭事,男女糊塗債哪有算得清?幸好呂麗軍都算忍辱負重,表明不跟你大瘤對薄公堂,安安靜靜替你大瘤帶大子女就好了,免得沒完沒了。

從來男人都係煩惱錢銀同女人,而呢兩樣煩惱,好多時同一時間出現!今日,大瘤總算守得雲開見月明,現在新娶一個唔貪錢的女人做老婆,日日有美人作伴,又唔駛再煩錢銀問題,難得可以逍遙快活。至於甘俾,富貴於我如浮雲,嫁個好老公就萬事足,那管明天大瘤破產要露宿,甘俾照樣死跟著大瘤,活得幸福。

好一對甘俾同大瘤,郎才女貌,羨煞旁人,甜蜜和純潔嘅愛情,中間絕對不含錢銀瓜葛,真愛,就係咁簡單!

發表意見