立場新聞 Stand News

用作家文字包裝清潔劑,咩玩法?

2018/6/27 — 12:29

唔係改圖,唔係眼花,無花無假,潔廁劑用咗作家嘅文字做包裝,仲要係書店有得賣,唔通係「新廁所文學」?!

是咁的,我同側邊嗰個屋企用開「X威寶」系列洗廁所、抹廚房嘅,但萬萬都諗唔到,有朝一日佢個包裝會變成咁!琴日喺 facebook 見到「商務」個 post 都咪話唔震撼!書店會賣清潔劑都少少爆啦,仲要係用作家嘅文字做包裝,話咩以「洗滌文學」做主題喎。今次真係唔只洗碗,仲一邊洗碗一邊洗滌心靈,認真估佢唔到!

不過始終廚房同廁所,唔係人人都喜愛,咁跨界別嘅 crossover 亦都唔係個個作家都玩得起。上網睇唔少向西村上春樹、藍橘子、林日曦,我覺得佢哋肯玩埋一份唔出奇,奇就奇在沈旭輝教授都肯落水。玩還玩,佢哋都算玩得幾認真㗎,match 返佢哋各自嘅本業,又 echo 返「洗滌」呢個主題。好似沈教授咁,佢就用咗幾十字,講咗一個印度總理莫迪帶頭掃街嘅「潔淨印度」運動,仲話:「何不嘗試洗廁身教,讓子女學會承擔?」

廣告

咁多個作家嘅大作入面,我都係最鍾意向西嗰個:

非正式統計,
人的一生有三年時間
要在廁所內度過,
隨時比你的初戀還長。

廣告

嘩吊!我日日踎廁都無諗過踎吓踎咁就三年,時間過得真係快。向西嘅大作洗滌咗我,我決定之後一定帶埋電話入廁所,反正都座底踎三年,咁梗係一路踎一邊打機開心啲啦!不過,嗱,又好認真咁講,廁所同文學向來關係非淺㗎。除咗寫喺公廁牆上嘅文學之外,聽講黃霑當年寫《上海灘》,都係靠個廁所先寫得出「浪奔浪流」呢啲咁壯闊嘅歌詞。其實廚房都唔差㗎,記唔記得許志安喺金曲頒獎典禮講過「廚房宣言」呢,截瓜切菜背後都係充滿愛啊!

以廣告論廣告,條橋正係正嘞,但我堅決抵制「三中商」,「商務」獨家發售?BYE!

發表意見