立場新聞 Stand News

男人老狗唔怕醜

2016/3/30 — 19:51

圖由作者所配

圖由作者所配

三月十六日,結婚二十八周年紀念日,寫咗篇《緣定今生》送畀老婆大人,多得毛記加持,反應癲咗,63萬Reach,萬九Like,1700些牙,500幾留言,感動到咁多人,可能羨慕我搵到真愛,又可能like爆老婆大人囧言金句啩,最大可能係佩服我幾十歲人仲咁肉麻。

其實自己都唔知有幾肉麻,但好多情侶網友互tag打情罵俏耍花槍,完全唔理我感受,焗住睇哂所有骨痺到嘔嘅留言,雖然咁,依然好欣賞佢哋兩情相悅旁若無人嘅表現。

廣告

好不幸,大部份人自細畀人教導,隱藏靈魂深處嘅情感,特別係男人,中年漢,生意佬,「男兒有淚不輕彈」唔在講,鐡漢唔講柔情,唔講兒女私情,更加唔敢公開講愛情,驚死畀人話小男人、乸型、婆媽、肉麻,驚死畀人笑弱小心靈,驚死影響事業前程,對我嚟講,實在錯得好離譜。

真正嘅女中英雌,男子漢大丈夫,使乜呢樣驚,嗰樣又害怕,使乜怕畀人知道自己原來係一個有血有肉嘅人嚟㗎,使乜樣樣收收埋埋唔敢講,淨係敢講意會、心靈相通、明就得啦。今日唔知聽日事,諗一諗,今日唔講幾時講,唔通就嚟瓜至講「我愛你」嗎?

廣告

我講,大大聲講,年年月月日日重重複複公開講,茄輪日日打,碗碟日日洗,因為幾世修嚟嘅愛情福份,男人老狗唔使怕醜,唔使怕肉麻,只要愛人知道睇到,心入面同表面都有幸福感受。咁做,唔係曬命,唔係想人羨慕,而係希望多啲人學習模仿,多啲人明白,真摯嘅愛情應該凌駕任何肉麻嘅感受。

問題嚟喇,突然記起二月十四日老婆大人無端端咁講:「情人節根本無乜意義。」對於我呢啲從來未試過情人節送花送禮嘅人嚟講,最鍾意用「日日都係情人節」蒙混過關,我𠵱家有啲怕,都要諗定母親節送乜至得喇。

 

原刊於作者 facebook

發表意見