立場新聞 Stand News

穿屎主演 必屬爛片:見習黑玫瑰

2017/7/18 — 12:07

年份:2004年
導演:甄子丹、黃真真
編劇:司徒慧焯、劉文慧、林說
主演:蔡卓妍、鍾欣潼、毛舜筠、鄭伊健

官方劇情簡介:

被外星人父母遺留地球的沙織(蔡卓妍飾)和天才少女老嬌(鍾欣潼飾)分別看中了招租古老大屋;屋內機關重重,原來是神秘女俠黑玫瑰(毛舜筠飾)為收徒而設。的士司機羅大(鄭伊健飾)前來營救,最後也被困屋內。沙織和魯嬌只好就範,學種玫瑰、練功夫,並發現了黑玫瑰一段悽美動人的過去,沙織更與羅大暗生情愫……就在黑玫瑰的變節徒弟紫藤女(禾子瑜飾)下手犯案之際,見習黑玫瑰出手阻撓,紫被迫撤退,從此種下了復仇之恨,眾人展開一場大激鬥……

廣告

───

林振強寫過,任何有阿叻參與嘅節目,都保證低質素(註1)。將規則套喺穿屎二人,我發現由穿屎二人主演嘅電影,亦必屬爛片。煩請睇下穿屎二人一齊主演嘅電影列表(唔計客串、唔計只有其中一人主演):

廣告

2002年這個夏天有異性
2002年 一碌蔗 
2003年 千機變 
2003年 愛在陽光下
2004年 古宅心慌慌 
2004年 見習黑玫瑰 
2004年 千機變II之花都大戰
2007年 雙子神偷

《千機變》開始,每套都爛,絕無例外,例無虛發。二人單獨演出嘅戲,反而偶有佳作(例如《公主復仇記》)。可幸係2008年後,穿屎無再喺大銀幕有主演嘅戲,一來可能係投資者終於發現啲戲太爛,當然更大可能係陳冠希淫照事件。

另外,唔講你唔知,爛片都有季節效應,喺某啲時日特別多。一年流流長,最常見嘅爛片季節,就係農曆新年,上次嘅《神龍賭聖之旗開得勝》、近開年嘅賭城系列、《喜碼拉亞星》,皆為賀歲片。

今次嘅《見習黑玫瑰》,既係穿屎主演、又係賀歲片,兩個效應夾埋一齊,九星連珠,聽見個名同陣容已經心都寒埋。

───

我對《見習黑玫瑰》此戲印象特別深刻,有兩個重要原因:第一,喺戲院上嗰陣,我咁啱同港女女友(見註2)第一次復合(幸運地亦係最後一次)。呢套咁嘅垃圾,港女女友死話要睇,仲要去返我哋第一次約會嘅沙田UA睇。

作為一套笑片,《見習黑玫瑰》嘅得分,係零,皆因我一次都冇笑過。套戲試圖用毛舜筠喺90年代所建立嘅黑玫瑰形象,以舊帶新,希望畀穿屎接棒。可惜桃花依舊,人面全非,男主角無厘頭換上鄭伊健(而非梁家輝),劇中充斥80年代《精裝追女仔》、《最佳拍檔》式滑稽笑話,放喺2004年已經全不入流,難以逗觀眾笑。舉幾個例子:

-劉以達扮心理學老師講佛洛伊德(當時劉以達已經畀周星馳玩到爛)
-阿Sa反眼、一路叫住 “V……V……V”,發癲跳舞
-有個潮州佬講潮州話
-鄭伊健喺一個城堡裏面用咗幾日、攀山涉水去救穿屎
-三個主角去救毛舜筠,明明一個跟一個行,偏偏行行下走失咗
-毛舜筠同阿嬌喺樓梯用廣東話詞,套入<平安夜>唱歌,睇到我毛管桐

係咪唔好笑?我寫出嚟都覺唔好笑。當年睇完同女友嘈咗幾句,問佢點解要揀套咁嘅爛片,佢話「我鬼知咁嘅咩?」佢講完我哋兩個喺戲院門口大笑。今次再睇,有一兩個非常鬼崇嘅劇情,反而令我笑咗一下:

-毛舜筠大義凜然發表講話,話穿屎二人「通過良心同勇氣嘅測試」,決定收佢哋為徒。二人只不過係跳過咗堆由毛舜筠特登放低嘅狗屎……我睇唔出幾有良心,同付出咗幾大勇氣。

-穿屎嘅性格突然180度轉變。早廿秒先講黑玫瑰禁錮佢哋,兩個鬼死咁驚,但一帶佢哋去衣帽間就無咗件事,二人表現興奮。

第二個對呢套戲印象深刻嘅原因,係當年壹周刊定蘋果日報登咗張劇照,阿嬌瞓喺床度背向天,露出一條波罅,以玉女路線行走嘅穿屎居然有波罅,套戲實在令人好期待……點知:

1. 喺戲裏面根本睇唔到阿嬌嘅波罅;當然亦見唔到阿Sa嘅波罅……無波何來罅?沒有國哪有家呢?

2. 後嚟唔使入場,上網有得睇晒佢全相,要波有波、有罅有罅,認真令人唏噓與欣慰……

────

我認為黑玫瑰呢個題材,可以隔十年八載reboot嘅機會好低。第一代黑玫瑰(陳寶珠主演)喺1965年代拍攝,大受歡迎;去到1992年,相隔27年,當時睇第一代黑玫瑰嘅小朋友已經成為經濟支柱,即使你用無乜關係嘅馮寶寶、黃韻詩、毛舜筠去拍第二代(92黑玫瑰對黑玫瑰),黑玫瑰作為共同回憶,仍有支持者。但去到2004年,穿屎嘅支持者多為80-90後說,黑玫瑰對佢哋、尤如六四事件於內地青年。

選角方面,個人認為90年代嗰套<黑玫瑰>成功,要歸功於梁家輝-佢嗰場餵毛舜筠食粥嗰場戲-「小寶寶,食蛋糕;飯仔mum mum叔叔送到……」,即使隔咗廿年我仲覺得好好笑

最重要係,搵穿屎做喜劇,要面對好大嘅先天局限。古今中外,喜劇演員多為男性,女性是少數;再觀察香港成功嘅喜劇女星,能引觀察發笑嘅,多半是外型獨特(肥肥、魯芬、余慕連)、奇貌不揚(以前嘅吳君如),或刻意醜化自己(表姐系列嘅鄭裕玲、食神嘅火雞姐莫文蔚、以前黑玫瑰嘅毛舜筠)。喺穿屎二人堅持玉女形象、未肯完全醜化自己嘅背景下,成功扮演出引人發笑嘅角色嘅機會甚微。

──────────────────
文章硬插廣告時段
不要問,只要like,仆街史兄的專頁同IG。
Facebook : https://www.facebook.com/Relgitsjg
IG (主要用嚟睇女仔) : https://www.instagram.com/iamuncleshit/
Project HK 專頁:https://www.facebook.com/PROJ.HK/
─────────────────────

作為一套喜劇,以穿屎掛帥,對劇情唔可以有要求。平心而論,(1)撇除唔好笑,同(2)相比起喺呢個專頁曾經介紹嘅爛片,《見習黑玫瑰》劇情仲過得去,起碼忠奸分明,主旨清楚。當然有啲沙石可以唔要或者刪減:

-伊健去救穿屎之前,用一架的士救咗五個人;
-羅莾同盧海鵬講數嗰幕戲;
-穿屎二人扮成龍練功耍醉拳,太長,好拖;
-有幾段主角對住鏡頭講嘢嘅片段,打窒套戲嘅流暢度;
-大奸角紫滕女大半集都未出現。出嚟所謂作奸犯科,睇嚟睇去都唔知有幾可惡。

套戲最搞嘢係,穿屎跟黑玫瑰練功,出盡奶力都唔夠紫滕女打,最後要靠二人嘅特異功能,一個用外星人力量移動物件、一個用隱藏嘅天生神力打敗紫滕女。90分鐘,編劇最後暗地帶出「遺傳」、「天資」比「後天努力」重要呢個重要訊息,所謂成功靠父幹,實在用心良苦。

雖然我踩套戲踩咗咁耐,戲中幾場打戲、動作設計不錯,流暢爽快,幾個武打場面(酒樓、結局)喺呢套爛片裏面係真正嘅亮點。導演甄子丹,應記一功。你會奇怪甄子丹點解會拍呢啲戲,仲做導演?其時甄子丹拍完亞視<精武門>後,後繼無力,當時只係一個半紅不黑嘅演員。

反而我奇怪嘅係,拍呢套戲嗰陣,鄭伊健已經拍完幾集古惑仔,比陳浩南更加陳浩南。憑佢身份地位,實在無必要去演一套所謂喜劇,成個小丑咁扮羅賓,著住條現袋衭走嚟走去……又要用咀摘花,仲要同個機械人通山走。可憐嘅陳浩南型到核爆嘅形象付之一炬。

──────────────────

養份時間:如何翻拍《見習黑玫瑰》

黑玫瑰早年係正義嘅化身,喺認識英俊瀟洒嘅差佬老公後,結婚生女後淡出江湖。好景不常,老公早死,黑玫瑰憶夫成病,患上思覺失調:佢夜晚會出外犯案,不斷殘殺後生靚仔嘅差人;日間會正常返,以為係紫滕女作奸犯科。

故事開始講述「紫滕女」專喺夜晚殺警,搞到警隊人心惶惶。專責小組(或者卸責小組)搵出穿屎二人,拜退隱嘅黑玫瑰為師。

搵到黑玫瑰,二人作特訓。穿屎二人朝夕相對,加插啲同性戀嘅劇情。中途二人收到線報,「紫滕女」將會出動,目標係探員鄭伊健。

黑玫瑰叫穿屎去保護鄭伊健,中途阿Sa似同伊健擦出愛火花,阿嬌呷醋發脾氣走開。跟住「紫滕女」出現,阿Sa 唔夠抽,阿嬌臨時返嚟擋咗致命一擊。

阿嬌出絕招殺退「紫滕女」,「紫滕女」帶住伊健離開;穿屎離開之際,「紫滕女」又再出現。阿嬌殺退「紫滕女」二號,但自己受重傷,回到黑玫瑰秘密住所,阿嬌不支倒地,阿Sa先發現自己中意嘅係阿嬌……

救返阿嬌,此時阿Sa發現黑玫瑰手上居然有傷,傷口與「紫滕女」一號嘅位置吻合,二人開始生疑。某日仲喺秘密住所搵到未死嘅鄭伊健,咁「紫滕女」身份都呼之卻出。

某日有線報指「紫滕女」又再出現。二人如常出動,經過訓練,穿屎功力大增,成功殺退「紫滕女」。豈料「紫滕女」二號又再出現,呢個時候先發覺事有蹺蹊……

「紫滕女」一號,亦即係黑玫瑰,返到住所,怒不可遏,諗住用計殺咗穿屎。當穿屎二人返嚟,居然帶埋「紫滕女」二號出現。紫滕女二號終於講出真相,大概係話黑玫瑰受太大打擊,結果掉低自己個女,仲化身「紫滕女」作惡。「紫滕女」希望幫阿媽用愛去感動佢,醫好佢個病。

最後四人大打出手,結局當然係黑玫瑰錯手殺咗自己個女,然後忍唔住自盡(同漫畫《中華英雄》角色無敵嘅結局一樣)。臨死佢終於清醒,並將黑玫瑰嘅稱號授與穿屎……穿屎將黑玫瑰作奸嘅事實瞞住所有人,直到永遠……然後黑玫瑰變咗Batman Dark Knight嘅Harvey Dent……

──────────────────

1. 最有影響力的人,林振強

2. 夜半無人兄史語:我的溝女血淚史


──────────────────

【港產爛片系列】
-《阿嫂
-《我阿媽發仔瘟
-《王老吉、OSIM特約:女人本色
-《內衣少女》 
-《神龍賭聖之旗開得勝》 
-《遠離寒戰,冚家保平安》 

──────────────────
文章硬插廣告時段

不要問,只要like,仆街史兄的專頁同IG。
Facebook : https://www.facebook.com/Relgitsjg
IG (主要用嚟睇女仔) : https://www.instagram.com/iamuncleshit/
Project HK 專頁:https://www.facebook.com/PROJ.HK/

原刊於作者 facebook

發表意見