立場新聞 Stand News

簡單技術文-課唔課金玩Pokemon Go?買乜道具、課幾多?

2016/8/1 — 20:21

我最叻講錢,人生淨係得返錢,所以我唔識教你玩Pokemon Go,唯有講下究竟課唔課金、同課金買乜嘢道具好。

如果你打死都唔會課金,唔好浪費時間睇落去。直接去留言tag你一個朋友,放毒毒佢啦XDDDDD

───

廣告

第一問:《課唔課金?》

玩Pokemon Go係絕對可以唔使課金:下載唔使錢、捉精靈唔使錢(但要運,仲要大量嗰隻,主要用嚟避開啲公廁)、再加上送嘅無限孵蛋器,350個道具位、250個精靈位,你日日行返工、放工搭電車,成日打理個道具箱,又或者只係hea玩,係可以唔使課金……不過……

廣告

一隻咁好玩嘅遊戲,我估香港有六分一人口玩緊,好多人玩到機不離手,如果你有實際需要,有心玩就課金買道具。

───

第二問:《邊個可以課金》

1. 經濟能力負擔得起。係你自己嘅經濟能力,唔係你父母。
2. 覺得隻game好玩
3. 想快遊戲進度
4. 玩到起碼level 15
5. 覺得道具同背包容量唔足夠

呢留意,五樣條件全部符合,先好決定課金。頭三樣唔使解釋,至於(4)未到level 15,你課咗都唔會加快進度,效果唔明顯,即係課嚟都無用。你玩到上level 15,你已經證明你幾中意呢隻遊戲,值得一課,當係長期投資。

───

第三問:《買邊隻道具?》

(一)BAG UPGRADE(200金幣)

-點解要買:呢個增加道具容量,係必定要買。如果你只可以買一樣道具,買呢個。

如果你經歷過「背包無位而迫住要掉走50個精靈球但轉頭見到水箭龜佢想發癲根住發覺唔夠精靈球想即刻想課金但課金系統太多人用而買唔到精靈球最後水箭龜閃咗」(多謝責任主編提供現實案例),你會知道背包空位非常重要。上到20 level共三種精靈球,加上要儲回復體力嘅道具,好多嘢要放。

-點買:道具箱嘅起始容量係350,建議一口氣將背包位加到500-700,即係要600-1400金幣(背包上限係1000個位)。

-物品性質:永久

-必買度:買買買買買買買買買(五個買為滿分。你知道呢個道具有幾重要未?)

(二)Pokemon Storage Upgrade(200金幣)

-點解要買:呢個增加小精靈容量嘅道具(起始為250個),相比之下,重要性較低。但考慮到(i)全數精靈有140+,(ii)你點都要捉啲陳生嗰類公廁嚟升級,(iii)你唔想隔兩分鐘就清一清精靈同(iv)佢一定會出更多精靈,建議加到350-400,即係盛惠400-600金幣。

-物品性質:永久

-必買度:買買買(五個買為滿分)

(三)Egg Incubator(150金幣)

點解要買/唔好買:本身佢送一個孵蛋器,係可以無限使用,但只可以孵一隻;而你同時最多可以有9隻蛋,即係你要多8個孵蛋器。

一般玩家(特別係無乜錢嘅學生哥),建議千祈唔好購買,因為呢個根本係潘朵拉之盒,買咗第一個就唔會停。

唔買都得,問題係……據聞啲特別蛋(例如美洲限定Tauros/大隻牛 #128、歐洲版Mr. Mime/吸盤小丑 #122)可以透過孵蛋獲得(註)。喺亞洲嘅你,要有呢啲限定版,只可以不斷孵蛋器孵蛋器孵蛋器。如果點都要長征,咁係咪一次過孵9隻蛋好啲呢?建議:一係唔買,一買買到盡、買夠8個,共1200金幣。

-物品性質:消耗品,每個可孵蛋三次(設定非常似避孕套,一盒三個;不過避孕套係避免生仔,incubator就係孵你啲仔出嚟)

-必買度:唔好買/買買買買買(五個買為滿分)。留意,唔好一次過買100孵蛋器,因為會佔用你個背包嘅容量!買8個就夠,用完再買。

(四)Lucky Egg(25 lucky eggs, 1250金幣):

-點解要買:30分鐘雙倍經驗值(簡稱雙經),記住用嚟為精靈升級(evolve),雙經嗰陣千祈唔好走去捉精靈。因為為精靈升級嘅數量同升嘅經驗基數多好多。而你level越高,捉嘅精靈起始值越勁。

-建議:要買,但用晒先好買。你升到20 level 會有5隻,扣返升呢用你兩隻,仲有三隻。一次過買25隻會阻住你個袋嘅位。

-必買度:遲啲先買買買(五個買為滿分)

(五)唔建議買系列

-Poke Balls:豆腐精靈球。去到level 15+, 連CP10嘅精靈都捉唔到
-Incense:睇唔到有乜功效……除非你住山卡啦或者想吸引陳生到訪
-Lure module:我有理由相信開game呢一頭半個月,遊戲開發會隨機令大量PokeStop長開櫻花,唔使買住

───

第四問:《買邊隻金幣套裝?》

以下係六種套裝嘅每100個金幣嘅平均價
-$8/100金幣:$8.0
-$38/550金幣:$6.9
-$78/1200金幣:$6.5
-$158/2500金幣:$6.3
-$318/5200金幣:$6.1
-$788/14500金幣:$5.4

首先,$8係搵笨。貴,而且100金幣幾乎買唔到任何實用嘅道具,可以唔理;$788平均價最低,但對於好多人嚟講,唔係小數目。同埋當你有萬幾金幣,好容易走去買埋啲垃圾(例如一口氣買200個豆腐精靈球),正如好多有錢佬一有錢嗰陣包埋啲二奶都好鬼醜。剔走埋。

如果照上述建議清單買(背包容量+精靈容量+孵蛋器),大概要2200金幣到3200金幣。所以$158/2500金幣同$318/5200金幣可以話係入門課金套裝。唔買潘朵拉嘅孵蛋器,$78/1200已經好夠(4次背包容量+2次精靈容量)。

史兄自己係買$318嘅:
-背包加到700
-精靈容量加到450
-餘數用嚟買量孵蛋器

另外,一般課金遊戲都有入門套裝,超平超抵,目的係引你課第一次金。唔趕住嘅人可以等下呢兩星期會唔會有呢啲入門套裝。我估計Pokemon嘅入門套裝,一定有兩三個用完即棄嘅孵蛋器,呢個先係最搵錢。

───

Btw,以前有好多女人唔明,點解download咗隻手機遊戲落嚟,仲要畀錢玩。

「乜唔係就咁玩就得,做乜仲要畀錢?」

無錯!以前紅白機去到PS2年代,你畀錢買咗盒帶返屋企,係完全唔使再畀額外錢玩……所以聽過好多男性朋友話,課金打機完全唔畀老婆知,因為(1)佢哋老婆唔明乜嘢叫課金同(2)佢哋知道課金嘅銀碼後一定家變。

自從出咗Pokemon Go,男女老幼、一家大細一齊玩,好多女人終於明白乜嘢叫課金同點解要課,仲要課埋一份……比起減肥、一齊開心、令大家完全唔理立法會選舉同練乙錚喺信報嘅專欄畀人停咗,呢樣先係功得無量。

「挑,嗰陣你玩比卡超,咪又係係咁課金?」

尋晚喺黃埔聽到個阿媽同個女講:「你係咪捉唔到?開個櫻花畀你咧」但嗰度明明一地精靈,捉到你怕、捉到你驚......所以話女人錢幾時都係最易賺。


───

聲明:呢篇唔係膳稿,只係我想畀少建議啲唔識課金、少玩手遊嘅人,錢要識得洗,洗得開心,唔好好似玩仆街垃圾BFB咁畀錢玩到一肚氣。我唔會透過寫呢篇嘢,從任何公司/網頁/開發商或其他團體得到任何形式嘅報酬。
───

《香港語文──聽陳蕾士嘅秘密》- 限量加印

(2)史兄新書《史詩式愛情》,已經正式上架

──────────────────

不要問,只要like,仆街史兄的專頁同IG。
Facebook
IG (主要用嚟睇女仔)

──────────────────

作者 facebook

發表意見