立場新聞 Stand News

簡單講吓「耶撚」嘅問題

2017/1/5 — 14:32

係基督徒嘅群體裡面,有一班人會用曉以大義嘅姿態引用聖經去講道理,但一聽落去,好明顯係經唔起邏輯嘅考驗,或者有成十幾重標準,坊間俗稱嗰班人係「耶撚」。或者應該咁講,唔係每個基督徒都咁熱衷講道理,有部分教徒只係希望每個星期返下團契同崇拜feel吓主基督嘅愛,自我感覺良好嘅話佢地就唔會搞咁多事,而且佢地係好怕一講道理就令到愛嘅氣氛消失。係廣義上嚟講,有人會計埋佢地係「耶撚」,但佢地嘅殺傷力未算係最大嘅一群,佢地只係喺個人層面「離地」咁解。撇除呢班人唔講,其餘嘅基督徒探討事情同行為對錯幾乎係無可避免嘅事。係嗰班基督徒裡面,對倫理學同邏輯分析有基礎水準嘅人只係佔少數,但就算係咁,渴望用自己對聖經嘅理解,或者判斷是非對錯嘅標準去指點江山嘅教徒,往往為數唔少。佢地覺得自己所宣講嘅就係唯一嘅真理,當你去挑戰佢地嘅講法係邏輯上有問題,或者講法唔合理嘅話,佢地好可能就會有以下呢幾種反應:

  1. 「唔需要講道理同邏輯」

我諗有部分人會堅持論證神嘅存在,但我唔係呢方面嘅專家,所以有機會嘅話比我跟你地學吓野。不過,我諗唔係單單唔識論證神嘅存在,就會比人話係「耶撚」,而係係講倫理道德嘅議題上講埋晒啲匪夷所思嘅野。呢到講嘅「匪夷所思」,唔係指佢地係某一個議題上持贊成或反對嘅立場,而係話佢地嘅立論根本唔能夠構成合理嘅理由去支持佢地嘅立場,然後講講吓佢地駁唔返你就會講「唔需要講道理同邏輯」,「呢啲係上帝嘅心意,人嘅智慧點可以猜度得到?!」(即係咁,佢地都係人,咁佢地又猜度得到?!)。

我就唔係好明點樣唔需要講道理同邏輯,如果佢地要解釋點解「唔需要講道理同邏輯」,其實咪又係要訴諸返道理同邏輯?如果有人同你講「唔需要講道理同邏輯」,又話唔需要再解釋點解「唔需要講道理同邏輯」嘅話,咪即係話你聽佢想一人說了算囉!

廣告
  1. 「好多人都係咁架啦!你諗法唔同係你嘅個人問題啫!」

好,就唔討論咩叫好多人,但有相當部分嘅基督徒係教訓或者「溫馨提示」人地嘅時候,會同人地講「進入天國的門是窄的」,即係話好多人都入唔到天國,但到左佢地認為好多人都係有同一種諗法,而嗰種諗法同自己嘅諗法相似嘅時候,佢地就覺得一定係啱,而唔需要再講係邏輯上同道理上啱唔啱。

唔記得左邊個講過,教會嘅團契小組係適合培養商討式民主嘅文化。但要搞一場成功嘅商討,令持唔同意見嘅人再次反思自己嘅立場,其實係要符合呢幾個先決條件:1) 隨機抽樣係同一組參與商討嘅人要有唔同嘅背景;2) 參與者訴諸公共理由(public reasons);3) 唔可以令霸權嘅論述(hegemonic discourses)阻礙少數或邊緣人士或團體得不到充足表達意見嘅機會。

廣告

但係唔少團契小組,首先小組成員大部分都係教徒,咁已經係做唔到隨機抽樣係同一組參與商討嘅人要有唔同嘅背景。而有啲小組成員吓吓都用屬天嘅奧秘去維護自己嘅諗法,呢啲根本就唔係公共理由。況且,有相當部分嘅團契小組係已經有霸權論述嘅存在,例如「大愛感性包容」三軌並行嘅論述,同埋好多野都係「出自撒旦嘅攻訐」。即係話,無論你講啲咩理據都好,佢地都可以話「你唔夠大愛感性包容」、「唔識感恩」同埋「你講嘅野係出自撒旦嘅攻訐」去回應,而唔係審視提出嘅理據合唔合理。

團契小組嘅教徒本身就有部分背景非常接近,加上本身有相當部分嘅小組成員本身就係霸權論述嘅擁躉,係咁嘅情況下搞商討,只會令「耶撚」鞏固既有嘅信念,排斥異見,簡單嚟講就係增加同質化嘅速度(再唔係有唔少諗法唔同嘅人見個情況咁惡劣,閃人都閃唔切)。想係團契小組搞真正嘅商討?!仲差好多皮喎!不如建立咗團契小組講真話嘅文化,然後審視嗰啲真心話係咪停留喺「真心膠」嘅層次先啦!

  1. 「你以為你自己邏輯好好啊?!好多人嘅邏輯都好過你啦!」

「好多人嘅邏輯好過自己,係表示自己要同嗰班人學習,而唔係全盤否定邏輯嘅重要性。」不過你咁樣回應「耶撚」,佢地就會指責你「敬拜偶像」。但佢地敬拜自己建構出嚟嘅上帝就唔係「敬拜偶像」(意指佢地講嘅上帝同聖經講嘅有出入)。喂,《出埃及記》話,以色列人係曠野製造金牛贖都係建構自己幻想出嚟嘅上帝咋喎!

每次講到呢個話題,都要面對兩難嘅局面,開名舉例講,讀者又唔知佢地係邊個嚟,更加無從考究事情嘅真偽(除左圈子內嘅人會大概知講緊咩之外);唔開名講,又會殃及無辜。其實基督徒群體都有小部分接近聖人嘅教徒,然後又有一定數量會犯錯,但會坦然承認罪過,而且唔會胡亂指點江山嘅教徒。係我心目中,呢班人都算得上係無辜,或者至少罪不至被扣上「耶撚」嘅帽子。當然仲有少數會開聲批評嘅教徒,但呢班人之中都未必會有絕對嘅共識。其餘嘅,唉,我返左教會都差唔多廿年(都係因為遇過少數好嘅教牧同工同教徒,但我就唔知佢地會唔會同我一樣認為有以上嘅問題),點都知發生緊咩事嘅(我自己就已經離開咗嗰啲表面上強調「大愛感性包容」三軌並行,實際上卻係充滿虛偽、嫉妒、謊言同隔閡嘅團契小組,勉強算係「退黨保平安」),之前都寫過幾篇文講呢個問題,暫再無補充。

延伸閱讀:

  1. 不要論斷人與不要論斷人之終極論斷別人的演繹〉,載《立場新聞》,2015年12月24日
  2. 基督徒忌「律己以寬,待人以嚴」〉,載《時代論壇》,第1465期,2015年9月27日,頁13
  3. 香港基督徒不容忽視的潛在自身問題〉,載《香港獨立媒體》,2016年9月28日
  4. 人際關係與國際關係的關係〉,載《時代論壇時代講場》,2016年11月23日

發表意見