立場新聞 Stand News

純粹分析:上戶彩當選「最性感人妻」

2015/8/14 — 20:59

上戶彩

上戶彩

見好多朋友都講上戶彩被選為最性感人妻呢單嘢。呢單嘢嘅議論,其實係「性感」與「人妻」呢兩個概念嘅問題。

要被認為係性感人妻,首先你本身要係(同埋似)人妻,而且仲要性感,仲要兩個屬性冇違和感先得。例如如果太性感嘅人妻,就會失去人妻屬性,相反,太過似人妻,就未必令人覺得性感。

上戶彩性唔性感,我唔方便直接評論(剛剛有人響後面問我電腦畫面個女人係邊個),印象中佢都拍過性感照,外貌身型都好有條件,但整體嚟講佢個樣、個格、幕前形象實際上又唔係太性感冶豔,而且因為夠入屋所以係廣告商寵兒。佢實際上係人妻、幕前都係做人妻,咁性感咗去邊呢?

廣告

上戶彩近年兩部代表作係《半澤直樹》同《晝顏》(唔計《羅馬浴場II》半裸泡浴演出的話)。佢響《半澤直樹》裡面係千萬受薪階級夢寐以求嘅年輕貌美妻子,唔單止年輕貌美溫柔嫻熟,而且直情係半澤直樹主角威能催化劑,幫老公響職場上遇神殺神,理想人妻屬性爆燈;而響《晝顏》裡面,佢又係飾演年輕貌美妻子,但就響傳說中嘅午後時間同個戇直生物科教師(唔知點解又諗起一個朋友)發生不倫關係,咁就令觀眾有好多想像空間喇。

呢兩個角色夾埋,性感屬性同人妻屬性都有,性感唔一定要成日有水著寫真或者唔夠布造衫,而係一種想像,一個衣著正常嘅人妻,只係俾到觀眾幻想空間就夠。

廣告

性感嘅嘢,我真係唔識,上文只係嘗試抽離地為分析而分析,講錯唔好打頭。

原刊於作者博客

上戶彩

上戶彩

 

發表意見