立場新聞 Stand News

細路玩iPad 親戚咀藐藐

2015/2/24 — 14:19

資料圖片

資料圖片

農曆新年,大班親戚聚會,遇上一件小事,卻讓我印象深刻。

做父母嘅都知道,呢亭聚會,動不動就三幾粒鐘。要小朋友冇嘢做坐定定陪你食飯,其實有啲難度的。大人可以吹水幾粒鐘,但同場既細路就總要有啲娛樂「招呼」一吓佢地,否則四圍走周圍搞搞震應該無可避免。

嗰餐飯,同場有兩個小朋友。一個係遠房表哥個仔,大約六、七歲左右吧。另一個,係表妹個仔,大少少,差不多九歲了。食飯途中,表哥個仔拎咗幾本故事書出嚟解悶。「睇書」呢個動作勁呀,親戚們見到,特別係長輩級既,個個有讚冇彈。咁事實上,我都好認同,細細個養成讀書習慣絕對係好事來的。遠房表哥教仔,都教得幾好丫。

廣告

表妹個仔就「唔生性」了。拎部iPad mini出嚟。親戚們見到,個個咀藐藐,有幾個忍唔住既長輩,更向表妹痛陳佢地響報紙讀過既「專業意見」,話細路仔用iPad會幾影響學習,又話依家啲細路仔細細個淨係識得打機咩都唔去學唔去睇,完全唔識同人溝通,係我哋呢啲「現代父母」之過。表妹一向好脾氣,只係禮貌地向幾位發炮既長輩微笑點了點頭,然後就繼續讓囝囝玩iPad。

我八掛,行過去個小朋友身邊,睇吓佢玩緊乜。行到去一望,佢所謂「玩」緊個app,我都有用,係Amazon嘅Kindle。

廣告

即是話,兩個小朋友做緊嘅嘢,其實都係一樣,同樣都係「閱讀」,只不過media唔同,但看在上一代人嘅眼中,感覺就係天淵之別。我望了一望表妹,表妹跟我做了一個無奈嘅表情。well,我明白為甚麼佢選擇唔為自己同兒子向親戚們解釋的,人總是會先入為主,解釋的作用,其實不大。

散席既時候,我跟表哥個仔閒聊了幾句。我問佢,平時響屋企有咩玩呀?我見佢帶咗幾本書嚟,以為佢會答我「睇書」吧。點知佢話:「玩iPad囉。」點解今日唔帶嚟玩嘅?「媽媽話今日有好多親戚,唔準帶喎。」

OK,明白曬。

祝大家羊年大吉。

發表意見