立場新聞 Stand News

老婆:「可以退休,唔可以唔做嘢。」

2016/3/6 — 12:41

資料圖片:莊偉忠

資料圖片:莊偉忠

辭職啫,市場反應唔使咁誇啩,報紙網媒鋪天蓋地,相熟朋友同事連番慰問,連無乜聯絡嘅朋友仔,都用盡唔同方式表示關心,網上百計千計留言,睇極睇唔哂,點覆呀,不如喺呢度回應吓:

1. 幾年嚟,透過無數訪問、專欄、面書、拙作《不開會的CEO》、演講、私下傾談,我單哂眼㗎喇,大家唔係咁渣,咁都睇唔到、feel唔到、估唔到我準備退休嘛。

2. 做嘢三十年,平均每星期工作超過六十小時,每日瞓五粒鐘,計落做咗唔止四十年,休息吓,多啲陪老婆大人都得啩。

廣告

3. 未試過做一份工長過七年,喺一田破紀錄做咗八年,乜鬼都試過玩過做過,失敗過,成功過,發明咗好多世界無嘅新嘢,滿足感好大,但突破空間越嚟越細,越嚟越難滿足我無可救藥嘅好奇心。

4. 本質上廢青一個,懶得就懶,人識做,我唔做,人唔識唔想唔敢做,我至有興趣做,你估易呀。呢幾年集中創作,已經將實務權力全面下放,戰友個個青出於藍,獨當一面,我越嚟越得閒。但係收咗人工,貢獻又有限,仲識寫個醜字,唔想好似其他腦細咁,霸住毛坑不拉屎,索性退位讓賢,等佢哋跳出我嘅陰影,大步向前行。功成名遂身退,天之道,有乜唔啱。

廣告

5. 返工收錢做嘢交差,唔係為咗加入大家庭交心,如果建立到默契友情,嗰啲係bonus,八年嚟,我呢份bonus特別大。好唔捨得班親密戰友,噚日宣佈嗰時,好多人喊,我好傷心,死忍住兩行眼淚,噚晚通宵眼光光,人生第三次因為工作失眠,希望你哋原諒體諒支持我。

6. 走得太前,太關心政治時事,太敢言,受壓,被辭職。好心啦,估估下大隻講得棚牙,唔知扮知,唔醒懶醒,笑死朕。:o)

7. 唔會從政,唔會參與社企,性格不合,感動唔到自己,都無興趣。但老婆大人吩咐:「可以退休,唔可以唔做嘢。」咁有智慧嘅哲理,小人只能遵命,靜極而動,後會有期。

故意隔日回覆,因為好多問題,瞓醒之後,有時唔見咗,唔同咗,或者細咗。但現今嘅香港,謠言唔會止於智者,公道未必自在人心,咁就勉為其難,解釋一次咁大把。

將來會做乜,退休兩日至諗啦,?家徇眾要求,攪一次傳媒茶聚,一次齋問齋答座談會,詳情遲啲公佈。大家終於明白,點解由舊年十月開始,我唔接受演講邀請,真相大白啦。

作者facebook專頁

發表意見