立場新聞 Stand News

老西農夫

2016/10/18 — 16:19

齋藤聖人(Kiyoto Saito),25歲,日本山形縣務農世家嘅 16 代傳人,矢志成為日本第一農夫。

佢調理農務嘅功夫未必係日本首席,但知名度卻堪稱東瀛一哥,而佢起朶嘅方法,聽落好簡單,叫你做落可能反白眼:就係著住全套老西耕田。

呢個熱到出熱痱嘅 Idea,源於一個玩笑,由齋藤哥哥飲大兩杯時無意中講起,最後毅然付諸實行。齋藤早期嘅老西 Look 慘遭同行白眼及嘲笑,但佢一笑置之。

廣告

齋藤希望讓務農年輕化,睇落更 Young 更好玩。呢個 Fashion 同 Farming 嘅結合,漸漸吸引到電視台同報章嘅廣泛報導。齋藤更將資訊科技結合傳統農業,開 Blog 分享農耕經驗,並設網頁讓人 Online 訂米,將其鮮明嘅 Personal Branding 和知名度,轉化為實質商機。

孖襟、煲呔、馬甲、窄身西褲⋯⋯我相信齋藤格勒底同袋底嘅汗,多到足夠用嚟灌溉。但佢就係堅持繼續做,更經常換新裝、配合唔同髮型同配飾。望住相片中齋藤一副不羈嘅表情,我諗起國產凌凌漆挨住豬肉枱嗰一幕。

廣告

嗰一幕,周星馳打大赤肋著住圍裙,飲緊杯 Dry Martini。

嚟個世界,一個睇落瘋狂無聊嘅點子,若果鍥而不捨去執行,反而引人欣賞。

潮語「柒到盡頭就是型」背後嘅原理,我認為反映住做人一項重要美德:「堅毅」。

作者facebook專頁
 

發表意見