立場新聞 Stand News

老闆,鹹魚點賣?

2016/2/19 — 13:06

資料圖片(圖片來源:HAePPTY  @ wikipedia)

資料圖片(圖片來源:HAePPTY @ wikipedia)

一個賣鹹魚嘅,如何跟其他賣鹹魚嘅賣得與眾不同?前幾日喺港台聽到陳志輝教授節目嘅一個古仔。話說老竇帶住幼兒喺一個鹹魚舖前面指手劃腳、活動教學、七情上面兼阻頭阻勢,舖頭老闆拋了個不屑的眼神,從容不迫同個老竇講咗句話。你估吓鹹魚舖老闆到底同佢講啲乜?原來佢話:「後生仔(其實老竇好耐都冇俾人咁叫過),呢啲唔係賣畀你,而係賣畀你老竇㗎,計你平啲,二百蚊條。買條畀你老竇,絕對好過你畀一千蚊家用啦!」 

你可以話呢個只係一個Salesperson sell東西的伎倆。然而,勁在你一啲都唔察覺佢有sell過你嘢。除了觀察力,仲有對於消費者的洞察。結果那個老竇就爽快用咗二百蚊幫老闆買咗條鹹魚返屋企孝敬佢老竇。

人人都話𠵱家零售難做,我絕對同意。然而,要生存或險中求勝,一定要有些過人之處。人人都賣鹹魚,鹹魚啲品種及水準又大同小異,實有原因人哋幫襯你而唔去隔籬。

廣告

你冇見過,九龍城、天后或筲箕灣,都總係有一間魚蛋粉舖長期有條人龍,而喺佢側邊又係賣看似一模一樣的魚蛋粉舖就門堪羅雀?

過年前,我去一間茶餐廳買外賣,等外賣之際,梗係八吓呢間舖開張不到半年,到底點可以搶到隔籬有間專做街坊熟客經營超過廿年的同類茶餐廳生意?叮!答案來了。有位外形大概係的士司機嘅顧客,用餐之後行去收銀枱準備畀錢之際,老闆娘四萬咁口同佢講:「梁生,你要唔要福字月曆呀,有兩款揀,金色同紅色,你要邊款吖?仲送開工大吉原子筆!」直叫我目瞪口呆。厲害!

廣告

講番上面嘅鹹魚古仔。緊隨這位老竇買完條二百蚊嘅鹹魚,有個阿婆攞起一條望落色澤大小都差不多嘅鹹魚,老闆同呢位看來幫襯咗超過半世紀嘅阿婆做咗個手勢,就收咗佢六十蚊。假設兩條鹹魚係冇分別,嗰百四蚊差價到底去咗邊?大概係老闆觀人於微,賣鹹魚,識講「孝道」、仲可以帶出比活動教學更高層次的「身教」。百四蚊,抵畀啦!

發表意見