立場新聞 Stand News

聖誕舞會禮儀

2017/12/21 — 6:29

【文:阿臣 @全民教育局 HKEd4All】

對於男校(maybe女校)嘅學生嚟講,聖誕節其中一個最「正」嘅活動非舞會莫屬。對於部份人嚟講,呢個絕對係to see and be seen嘅機會,但響心裡大叫「飛雲,機會嚟喇!」之前,應該有啲嘢要注意一下。

傳統ballroom禮儀可能響依家嘅香港會嫌太過隆重,但絕對值得俾大家參考一下:

廣告

1. 衣著要端莊

傳統Ballroom禮儀係evening dress,即係晚禮服。用依家香港嘅標準,就可能會over咗。

廣告

男仔嚟講,合身嘅恤衫、西褲/扯布褲就真係好基本,牛仔褲、牛仔褸就咪鬼響ballroom出現啦,話知你條牛係咩vintage、咩日本貴價牌子都好,得出嚟嘅結果都係一條牛。

女仔呢,你有你嘅美好身段,但係ballroom係一種含蓄一啲特氣氛,露得比較多嘅衣物就真係諗清楚。顯得妳elegant係一種對場合同自己嘅尊重。

2. 行為大方、得體

男又好、女又好,可能講就大大聲,但係真係做嘅時候,又真係有啲扭扭擰擰。這個絕對係社交場合嘅大忌。記住,表現大方、得體,係社交場合嘅社會標準。一群人堆埋一齊唔好睇、匿埋一齊食嘢同竊竊私語好失禮。三兩個聚下頭當然可以,但全場好似有超能膠癡住你哋幾個咁,咁不如咪鬼去舞會啦!

仲有,記住呢個係一個社交場合,禮貌係重要嘅,請到你對眼/個心鐘意嘅當然開心,但係請唔郁都要表示返啲禮貌。受邀請的,同樣都應該莊重少少。

3. 跳舞

其實識唔識跳唔係最大所謂,係你有無盡力去試。跳舞係兩個人一齊合作完成一件事,合法拖手仔只係個過程。唔需要好努力咁show你的舞姿、唔駛曬命,多啲同舞伴溝通,就一就舞伴嘅需要,多留意對方嘅舞步,咁樣先至好。

跳咩舞都好、做咩事都好,收・放・自・如,就係好!
 

發表意見