立場新聞 Stand News

聽歌回憶(1)-90年代前期嘅女友系歌手

2015/2/1 — 16:46

事先聲明,呢個系列嘅文唔係樂評。

因為要清除有關李逸朗版《傻女》*嘅記憶,我用原版《傻女》洗自己腦。後來整長啲個Playlist,整咗個90年代前期流行女歌手playlist。做嘢時聽,少男時期嘅鬥心返晒嚟,HP、AP、MP全部+200,個人醒晒,做嘢都快手咗。

我唔知點準確形容呢個playlist,90年代前期嘅年輕女歌手,基本上就係以寶麗金風格為主流,如果用食物形容,就好似啲高糖高脂食物咁,易入口,但係會滯,簡單嚟講,呢個group叫做少男夢中女友組別,佢地sell嘅係少男純直嘅女友想像。黎瑞恩、湯寶如、王馨平、彭羚、周慧敏、楊采妮、蘇慧倫、梁詠琪(梁詠琪係我嘅飛佛,一定會另外開post寫)都係呢group。不過話時話,其實任何年代嘅年輕女歌手多數都係sell女友想像,謝安琪係例外,高登仔對佢嘅情有獨鍾,肯定唔係女友想像。

廣告

呢個group嘅共通點係,佢地進入90年代後期,就慢慢消失,冇人能夠再進一步,同以下嘅歌手相反。

廣告

呢個list冇楊千嬅。佢出道係1996年,當時佢一出道sell小清新,同1990年代前期嘅流行曲嗰種風格好唔同,開創咗個新類別。另外,1995年出道嘅陳慧琳,又係另一個類別,佢一出道就好似子彈火車咁。遲啲有機會再開新post寫佢兩個。

我個playlist冇王菲,因為我一直都唔太鍾意佢,以前覺得佢好扮嘢(唔好玩啦,邊個藝人唔係扮緊嘢?當時我就係唔鍾意佢呢種扮嘢),但我係覺得佢唱歌唱得好聽。鄭秀文同王菲有少少似,我都係唔太buy呢type。

你可能會問,林憶蓮呢。即係咁,林憶蓮雖然係90年代走紅,但佢係80年代出道,係同梅豔芳同輩,不過佢好似吸血新世紀咁唔會老…

作者博客

發表意見