Pazu 薯伯伯

Pazu 薯伯伯

旅遊寫作人,為最早一批在網上連載遊記的香港人,多年來足迹遍佈歐、亞多國,在喜馬拉雅山麓、東南亞、南亞等地區生活。著有《風轉西藏》、《北韓迷宮》、《西藏西人西事》及《不正常旅行研究所》,分別在香港,北京及首爾出版。作者 Facebook:https://www.fb.com/pazukong;風轉咖啡館:https://www.fb.com/spinncafe;作者博客:http://pazu.com/blog;Pazu 兒歌網:http://www.pazu.com;相集:https://www.instagram.com/pazu

2019/11/1 - 15:31

萬聖節之夜

相片中呢個女人想呃錢,其實有兩個人,但另一個逃生能力較強,跑咗去好遠。(作者攝)

相片中呢個女人想呃錢,其實有兩個人,但另一個逃生能力較強,跑咗去好遠。(作者攝)

噚日坐車去到銅鑼灣一帶,再行路返屋企。

忽然有兩個女人過嚟,用普通話問:「不好意思……」

我當時戴住耳塞,聽唔清佢哋講乜,就除低耳塞,問佢哋有乜可以幫到手。

廣告

點知呢兩個女人,一開口就問:「你不要介意啊,我們有件事想找您幫個忙。是醬子,我們有點困難,想您在附近找個餐廳,請我們吃點東西。」

當時我心情就唔太好,本來諗住萬聖節去蘭桂坊,又封哂路,無得上去飲兩杯。而家忽然見到有兩個三十歲操普通話的華籍外地女子,心想可能是問路,尤其近來多交通改道,遊客問路,當然要幫手。

自己本身好喜歡去旅行,喺外地經常受到陌生人幫助,返到自己家鄉,當然都想幫番其他旅客。即使係中港矛盾好熱烈時,其實我對內地遊客,都算係好幫忙。

點知呢兩個女人,一開口,居然就係典型街頭騙案嘅開端!

我當時忍唔住笑咗出嚟,倒吸一口涼氣,用普通話同佢哋講:「你們真的挺不要臉。」

佢哋大概無估到我咁直接,先係呆咗一下,問我:「甚麼?」

我再講一次:「你們真的完全不要臉!」

然後呢,佢哋就開始逃跑。一個跑向九如坊方向,另一個過咗對面馬路。

我就攞個相機影佢哋,但無影到正面,佢哋繼續咁跑,我都無追上去,只係鬧佢哋:

「你跑嘛!你好意思嘛!要不要臉的!」

當然重有呢一句:

「(你們)把中國人的形象都丟乾丟淨!」

有一個女人跑咗入後巷,我就離開,點知最好笑係,呢個女人沿著後巷逃跑,兜咗個圈,由巷仔另一邊出嚟。我見佢由巷尾出嚟時舒一口氣咁,點知一擰轉頭,又見到我,咁佢又慘豬豬咁即刻跑番轉頭!

完。

注一:如果有人問我,點解確定佢哋係行騙,咁就正如你收到尼日利亞遺產騙案時,係唔需要真金白銀被呃咗錢,先知道佢哋係行騙一樣。但願唔好有人真心膠咁問:「萬一佢哋真係落難異鄉,咁咪好慘囉?」

注二:其實我當時仲講咗一句話嚇佢哋,我話:「我要抓你們去報警!」佢哋一聽「報警」,果真嚇到跑得再快啲,證明佢哋真係唔太知道香港嘅情況。

萬聖節快樂!

 

想追看薯伯伯的文章,請設定此 Page 為「搶先看 / See First」
Instagram
新博客

【新書速報】Pazu 薯伯伯《不正常旅行研究所》(白卷出版社)— 從西藏拉薩到神州大地;由亞洲各國至中東地區。非常人般玩轉奇異世界、紀錄精彩故事文化習俗。在旺角序言、北角森記、誠品書店及各大書店,均有代售!其中在旺角序言及北角森記,有少量簽名版本。

作者 Facebook