立場新聞 Stand News

「負皮王」梁烈唯斥網民太膚淺:我擦鞋你吹呀,你對住個電腦一世都買唔到樓!

2015/10/30 — 18:15

「我係擦鞋呀,你吹呀?」有「高登負皮王」之稱的無線藝人梁烈唯,早前上載「向老兵致敬照片」引起網民廣泛批評「擦鞋」,近日訪問時發表偉論解話,大嘆網民「太膚淺」,又話人終日對住電話、電腦,一世都買不到樓,「你咁得閒諗埋呢啲,不如諗下自己好過啦!」

話說,9 月 3 日北京舉行抗日紀念大閱兵之時,梁烈唯上載「向老兵致敬照片」響應,引起網民不滿批評他做法「擦大陸鞋」。幾日後,有人在高登討論區發帖,題為「大家點睇梁烈唯,唯唯??」,一句留言「好似越來越受歡迎 wor」一周之內,錄得 1.5 萬個 thumb down,成為「高登負皮王」。

廣告

大陸已經好強,不用你擦鞋

「如果你係基督徒嘅話,耶穌死,直頭你都可能未係呢個宇宙,只係一粒塵,點解你又信基督教?點解你會祈禱?」梁烈唯接受《東方新地》訪問,大談「被負皮」的經過,認為老兵「奮力抗戰,但最終都係淪陷咗,但都唔可以抹殺呢班人對我地嘅影響」,又直言批評者「太膚淺」,認為網民「根本就唔知道個架構係點」,又指大陸娛樂市場發展蓬勃,「人地已經好強,係咪仲要你去擦鞋,然後俾個機會你呢?唔係囉,人地宜家已經係睇你個 talent 囉。」

廣告

部分網民覺得梁烈唯同無線高層關係友好,又冠以是「擦鞋」的評語,他回應:「OK,我今日就話俾你聽,我係擦鞋呀,你吹呀?」他又話自己「每一日都呼吸空氣,每一日要工作」,不是活在網絡世界,不介意 LIKE 和讚,痛斥網民「你咁得閒諗埋呢啲,不如諗下自己好過啦!如果你一日只係對住個電話,對住個電腦,你一世都買唔到樓㗎啦!」

外國人都在街邊小便

對於中港關係,負皮王同樣有獨到的看法,「我地 70 後 80 後有一大班人,好中意去日本啲藥房買藥,唔通啲日本人又叫我地做蝗蟲?」至於強國人隨地大小便,梁烈唯就話隨街小解是國際慣例,「好多外國人我都見到佢地係街邊小便㗎,根本係全個世界都係度做同一樣野。」梁烈唯勸勉港人,中國大陸才剛剛開放,好多人都未見過世面,「有啲野佢地係未做得好,但唔代表佢地永遠都做唔好。」

負皮王對同胞可以包容到咁,你又可以包容梁烈唯到咩地步?

發表意見