立場新聞 Stand News

超技術文:龍珠中龜波氣功的效益

2016/5/9 — 20:35

作者按:望咗龜仙人出一次龜波氣功,悟空就即刻識照版煮碗,打爛咗架車。

作者按:望咗龜仙人出一次龜波氣功,悟空就即刻識照版煮碗,打爛咗架車。

作者按:文中引用大量漫畫《龍珠》嘅圖,一畀人告我就肯定賠到破產。但睇完你就明白,呢啲圖只係用嚟作學術、研究及示範用途,本人無意嘗試透過呢堆圖取得任何利潤或金錢回報。

未文不接受任何非授權媒體轉載­、特別係buzzhand等content farm-我係冇經授權拎人啲圖,但並不等於你可以偷我嘢,ok?

日本漫畫歷史中,鳥山明所畫嘅《龍珠》可謂皇者中嘅皇者,受歡迎程度、知名度,仲有持久度,無任何漫畫比得上。你可以搵到漫畫喺一段短時間內受歡迎過佢(男兒當入樽)、亦有漫畫長命過佢(尼羅河女兒),但無漫畫可以長時間保持到高人氣,連完咗十幾年都仲有一系列商品狂出。特別係《龍珠》裏面嘅絕招龜波氣功,你唔睇漫畫都講得出個名。

既然龜波氣功咁重要,點可以無統計同分析?

廣告

我斷斷續續用咗兩年時間,由頭到尾翻睇一次龍珠漫畫版,數返龜波氣功出現嘅次數、出招嘅人物、使出嘅對象同造成嘅損傷。

1. 何謂「龜波氣功」?

廣告

呢篇文章只包括漫畫全部519話,不包括動畫、電影及其他書刊。

龜波氣功,重點在於必須以雙手使出,兩手合成花萼(或花瓣)狀態,然後向對方打出一個似流星、有條尾巴嘅一個光波。

例子:

用一隻手打出嘅波,並不叫做龜波氣功。例如悟空消滅菲利嘅呢招,並不算作龜波氣功

例外:

孫悟空喺188話用腳出光波,我當係龜波氣功。

2. 龜波氣功出現次數

龍珠全數519話中,龜波氣功喺第14話第一次出現,當時龜仙人用龜波氣功打飛火陷山同城堡;之後龜波氣功喺漫畫中再出現66次,共出現67次。

平均計算,大概每8話就出現一次龜波氣功。出現得最密嘅係510話,呢一話悟空對布歐共使出龜波氣功三次。幾乎隔一頁就出波,真係 大喜屋 龜波氣功 放題。

3.   有關使出龜波氣功的觀察

喺67次龜波氣功當中,

《龜波氣功完全消滅敵人嘅次數》

4次

嘩哈哈哈哈哈哈,係咪好驚奇?出咗67次龜波氣功,只係得4次係完全消滅敵人,將敵人殺死或令對方完全失去戰鬥能力:

-八爪魚(76話)仲要無交待孫悟空係咪用龜波氣功殺死八爪魚

-飛船(94話)

-大魔王手下(141話)

-斯路(416話)

龜波氣功好似好撚勁,但查實佢所消滅嘅四個敵人,有三件係雜魚同廢柴嚟!一招用足500期、玩咗十幾廿年嘅嘅絕招,漫畫裏面只係殺過一個強敵(斯路)。

當然,相起其他主角嘅絕招,龜波氣功已經算殺得人多:比達招超必,又話幾勁幾勁,黃豆都無摧毀過一粒;OnePiece裏面連人都冇死過(除咗艾斯);火影阿鳴門招幽門螺旋菌,只係殺過角都一個……

頭嗰十幾年,龜波氣功幾乎只係用嚟畀人閃避、彈開,完全做唔到絕招殺敵嘅效果。我相信,去到斯路嗰篇(尾二嘅故事),鳥山明發覺原來龜波氣功無殺過勁人,所以特登要悟空兩父子出龜波氣功殺死斯路~~~

《龍珠》另一個廢柴絕招係元氣彈。漫畫出現過三次元氣彈,對象係比達、菲利同布歐。以命中率計,元氣彈比龜波氣功好啲啲,三次都打中人;不過,比達同菲利中完都只係受傷,仲有戰鬥力打落去……講到點勁,點儲氣,挑!一樣打唔死人。我更加有理由相信,鳥山明喺斯路篇用龜波氣功了結,先發現「嘩仆街咧,原來元氣彈都冇殺過人」(愛新覚羅溥傑ブランケットうわー、それは強度のミサイル元は誰も殺されませんでした),所以要特登整多個布歐篇出嚟,最後用元氣彈打死布歐。

另外,《出完龜波氣功反而畀人消滅次數》

4次

漫畫裏面有4位仁兄,出完龜波氣功反而畀人殺死……分別係:

阿樂打培植人:培植人中咗波唔死、攬炒。

斯路:同孫悟空兩父子鬥波輸咗

未來斯路:呢個仲傪,想對杜拉格斯出波,波都未出到就死咗

布歐:出波打元氣彈

即係,出龜波氣功殺人同被殺嘅機會率係相等嘅。龜波氣功真係好危險,你出之前要諗清諗楚。

《龜波氣功傷人指數》

你會話,挑,殺唔死人啫,傷到人呀嘛。所以我搵埋佢究竟有冇傷到人,喺67次龜波氣功裏面:

-26次傷害對手(包括4次死亡),佔39%
-23次無損、避開,佔34%
至於點解龜波氣功令人受傷死亡嘅成功率咁低……因為

《龜波氣功最常見嘅使出目標》

空氣,9次

我認真嘅:喺189話之前,聚人共用過9次打空氣。喺佢哋未識舞空術之前,龜波氣功係最常用嘅推進器。呢9次分別係:

-武天老師靠龜波氣功彈回武台

-悟空靠龜波氣功令潛艇喺水底向前行

-悟空學咗佢師傅,又用龜波氣功喺空中推進……

-悟空又靠龜波氣功打空氣彈回武台……

-悟空再靠龜波氣功打空氣喺空中推進…… 

-悟空又靠龜波氣功打空氣喺空中停止推進……

-悟空又靠龜波氣功打空氣喺空中推進……空氣真係同你咁大仇口咩?

-悟空又靠龜波氣功打空氣嘅反動力衝向魔童……仆街連續兩期咁樣打空氣

-連續三集,悟空向空氣使出龜波氣功,靠佢嘅反動力避開魔童嘅光波……貼圖貼到手軟

留意下,上面9射空氣,有8次係涉及天一第一武道大會……佢成日話乜嘢飛出個台就輸,搞到班友不斷用龜波氣功射返自己返嗰台度。

其他主要敵人受龜波氣功嘅次數為:菲利(5次)、斯路(4次)、布歐(4次);睇嚟,空氣先係悟空班人嘅最大敵人……………..

以上9次打空氣,已經無計以下被龜波氣功攻擊過嘅死物:

-龜仙人打火焰山同城堡

-悟空打車 

-程龍打月亮 

-悟空兩次打牆

《使出過龜波氣功嘅人物》

 -龜仙人,武功原創者。佢用咗50年創造出來嘅絕招。 

-悟空:望咗龜仙人出一次龜波氣功,就即刻識照版煮碗,打爛咗架車……龜仙人嗰50年,究竟有幾多年係用嚟睇咸書…… 

悟空喺漫畫共使出龜波氣功40次,大概有三分之二嘅龜波氣功都係由悟空使出……佢仲要~~

用腳出(188話),上圖已有

令個波識轉彎(157話、201話):

撇除悟空成日偷人嘢、冇經授權下使用人哋嘅武功(好似某人偷用龍珠嘅圖咁),悟空的確係一個武學天才嚟。

-阿樂:佢喺龍珠出過兩次龜波氣功,一次係畀天津飯打返翻去阿樂自己度… 

另一次就係培植人嗰次……龜波氣功根本打唔死人,只會畀人打死。

-天津飯:……打第二次天下武道大會,天津飯向程龍使出龜波氣功……全本龍珠,天津飯係另一個無師自通學識(另一個係悟空;布歐吸過主角、斯路有悟空基因),再次證明龜仙人嗰50年係白活了……

-無閑:佢喺漫畫出過6次龜波氣功,次數算多。不過呢,當中4次對方避開咗或者無損咁格擋咗,打中嘅係最弱雞嘅餃子同最強嘅菲利。

打中完菲利,無耐無閑就畀菲利打到屍骨無存,去咗領便當…….你話,龜波氣功真係唔識好過識。 

-其他:爺爺悟飯、悟飯、悟天、斯路、布歐。除咗爺爺,其他人嘅龜波氣功,似乎都係偷學返嚟。悟飯、悟天嗰啲,應該係悟空當咗龜波氣功係自己發明,再教畀兩個仔……人嚟講你都算渣滓。

龜波氣功真係公廁真係雞嚟,一街啲人望兩眼就識用。最慘係,其實一啲都唔好用。

總結: 
-龍珠漫畫,共出現67次龜波氣功
-只有4次殺死敵人
-有4次出波者死亡
-空氣係龜波氣功最常見嘅目標
-阿戊阿壽都識出龜波氣功

兩年就係得出呢啲結論,搵食真係艱難。

《深度分析》

以下嘅嘢,係我由頭到尾重溫一次龍珠後嘅觀察,少圖多字。

1. 超級撒雅人係陀衰家

龍珠嘅高峰同高潮,肯定係超級撒雅人(超西)嘅出現。悟空變超西,震撼咗我好幾日:以往悟空嘅突破,都只係個人精神咗、身高改變、同用有人講「撒雅人喺死亡邊緣復活,戰鬥力會幾何級上升」嚟表達,而超西就係令髮型同性格完全唔同晒,仲要令原本超晒班嘅菲利變咗幼稚園學生咁……

個震撼係勁到當年超任隻龍珠game,最尾打菲利嗰陣悟空變咗超西(有隊友死亡)、而比達又唔死的話,完game出credit之後比達會變成超西打最一戰。中學嗰陣為咗實現超西vs超西呢個畫面,好多同學日打夜打;我後尾用模擬器打,都有留返呢個save。

話就話超西千年一遇、萬人無一,點知後尾好似大陸嘅百年一遇災難咁,成日出現。但你諗返幾次超西或者超西出現突破,都會直接造成災難:

悟空變超西(娜美星篇)

悟空變咗超西無耐,菲利知唔夠打、嬲得濟出光波打落娜美星,令娜美星滅亡。

娜美星人無家可歸,要搵悟空算帳。唔撚關菲利事。

比達變超級比達(斯路篇)

「超級比達」呢個超柒嘅名,居然係來自比達自己把口……斯路變咗半完全體,唔夠「超級比達」打。「超級比達」為咗顯示好似咁特區高官一樣咁打得,任由斯路食埋18號變完全體……根住「超級比達」發覺自己唔夠打……好柒……

再計埋放16-18號出嚟但又唔夠打、畀條女打到斷手,「超級比達」喺嗰排短期內柒咗兩鑊甘嘅……

悟飯變超西2(斯路篇)

悟飯變超西2,斯路知唔夠打、嬲得濟出變大自爆,要令地球滅亡。無錯你睇緊嘅橋段同悟空/菲力喺娜美星篇嘅係一模一樣,只係換咗人。人類總是犯著同樣的錯誤。

不過最終悟空出嚟再次拯救世界,將斯路轉咗去界王度。

我認為超級撒雅人帶出一個好重要嘅訊息:

等價交換。

超級撒雅人的確令戰鬥力急升,但同時間亦令撒雅人好戰、輕挑嘅心更加明顯。悟飯變咗超西2後,不斷向斯路淫笑(平時嘅佢絕對唔會咁做)、而比達同悟空變咗超西,亦出現嗜戰嘅心態,悟空直頭唔用龍珠返地球都要同菲力決一死戰。某程度上,悟空亦利用斯路有撒雅人血源嘅因素,引誘斯路,同佢講佢入埋精神時光屋出嚟,就會勁好多。於是斯路先整個斯路遊戲出嚟……證明撒雅人嘅性格,根本就係劣到爆。

呢個等價交換係:上天畀你有強勁戰鬥力,同時間呢樣嘢會令你直接造成更大嘅災難。

2. Boy’s Love

龍珠充滿無限Boy’s Love基情Hehe關係。

-天津飯同餃子:呢對拍擋係龍珠Hehe嘅佼佼者。每次修練,佢哋都只係自己兩個收收埋埋唔知喺邊度練功,然後有一兩次修練完要打交餃子連影都冇……可能係菊花太痛…… 

-悟空同比達:We all know佢哋嘅婚姻只係掩飾,去到後期仲要合埋體……比達恨咗好多年。我懷疑比達+悟空呢個combo,啟發咗後來嘅櫻木+流川、鳴門+佐助、呢類一半正一半邪嘅BL情侶檔。 

-悟空同界王:有科學研究指出,當一個人就快死,腦裏面會浮起佢

生命最重要嘅人。而悟空同快將爆炸嘅斯路攬炒嗰陣,佢諗起成隻小強咁樣嘅界王……Oops, this tells you something. 

-悟空同無閑: 

試說出第二次天下武道大會後,邊個角色嘅死令悟空決心搵大魔王報仇(10分)。 

試說出娜美星篇中,邊個角色嘅死令悟空變成超級撒雅人(10分)。

因果題:娜美星篇中,邊個角色喺悟空出元氣彈後、畀菲力發脾氣殺死?人造人篇中,邊個角色無殺18號,令斯路變成完全體,最終令悟空要死?請問呢個係咪叫「我為你死一次、你為我死一次,真係好浪漫」?(20分) 

以現代婚姻術語嚟表達,無閑係洗米嫂、比達係Mandy Lieu。人都係貪新忘舊、而超級撒雅人都係人,明白未? 

-悟天同杜拉格斯(年輕):潛力股。為避免觸犯兒童色情條例,不詳述。不過,悟天同杜拉格斯既然遺傳咗各自老竇悟空同比達嘅戰鬥能力同血統,咁佢哋遺傳埋老竇之間嘅愛,好合理。大佬,佢哋係漫畫裏面合體呀!!合體呀!!你同你女友幾時會合體呀?咪扑嘢嗰陣囉!!

順帶一提,我從杜拉格斯嘅外型度完全搵唔到半樣同比達有關嘅嘢-頭髮唔同色(一個紫一個黑)、連比達嘅M字額都冇,我懷疑阿樂後期無再出現,係因為比達發現咗啲嘢而殺撚咗阿樂,阿樂死過一次唔可以用龍珠再返生。

3. 悟空到悟飯、主角接棒

去到故事一半(撒雅人出現),鳥山明已經想造就悟飯接悟空棒,成為主角,去維持世界和平。但作為富二代,就咁畀佢做主角,無說服力、大部份讀者亦無共鳴,於是鳥山明用咗好多篇幅去打造悟飯呢個角色: 

-三歲就使出頭鎚,重傷悟空同魔童都打唔贏嘅拿鐵斯 

-同無閑去娜美星冒險,令佢有經歷同成長 

-不斷再出悟飯忿怒時有驚人嘅力量:打拿鐵斯、納巴、菲利第一次變身後 

-去到斯路篇應該係收成正果。故事應該由悟飯打贏斯路,順勢悟空死埋,悟飯接棒做主角。但問題係悟飯打贏斯路,最後都係要悟空幫手,而悟空其實係悟飯害死嘅 

-去咗布歐篇,悟飯做主角,頭嗰兩期佢扮乜嘢幪面超人,我好快就cut咗書,無再睇。對我嚟講,龍珠喺斯路篇之後已經完結咗。我相信因為龍珠喺悟飯做主角之後好唔受歡迎,布歐之後就要完。

主角係陪住讀者成長,咁先會有歸屬感,有共鳴。港日漫畫,主角幾乎唔會換人,一直由同一主角由頭演到尾,好少換人、更加少成功換人。足球小將曾經想整個葵新伍出嚟,但仆晒街,又係要出返戴志偉小志強;天下到最後仲係步驚雲同聶風;龍虎門嘅三皇,現實過咗千幾期佢哋都仲係20歲;北斗之拳第二章無咗吸引力。要數得出換主角嘅、而本書又受歡迎嘅,我識嘅只有日漫JoJo(每一章都唔同主角)、港漫海虎(海虎到地獄到次男;連第三代白千軍都谷唔起)。

鳩吹完畢,多謝各位。

 

作者 facebook

發表意見