立場新聞 Stand News

逃出侏羅紀

2016/1/5 — 10:18

蘇麗珊

蘇麗珊

劉鳴煒K.O 游學修,呢單新聞,如果各位男士加啲想像力,其實係會睇到幾心寒。強調,唔係心酸,係心寒。點解心寒?首先,同大家簡短地分享一段十幾年前嘅一晚心路歷程。

嗰一年,西班牙足球班霸皇家馬德里嚟香港踢表演賽;嗰一晚,皇馬所有球星去咗蘭桂芳嘅 Dragon-i。嗰年放暑假返嚟香港,勁好彩地,有個朋友識人,邀請咗我同當年嘅女朋友去 Dragon-i。又勁好彩地,我同我女朋友都同碧咸影到合照。

就喺影完合照嗰刻,我女朋友同碧咸講:I am your super fan。大家大概想像到 Dragon-i 嗰晚嘅環境,好噪,好多人,所以我女朋友係要喺碧咸嘅耳邊同佢講嘢。就喺望住佢哋交頭接耳嗰一剎那,我心中閃過一個念頭:如果碧咸睇中咗我女朋友,點算?

廣告

去到碧咸嘅 level,佢其實唔使做啲乜,就襯我行開去廁所嗰啲時間,佢只需要明目張膽問我女朋友一句,can I kiss you,咁我嗰晚就會立刻做咗童軍,即係戴綠帽。碧咸話錫就錫?你女朋友咁隨便㗎咩?我唔係覺得我女朋友隨便,而係如果你有近距離接觸過碧咸,你會同意佢嗰種魔力係好得人驚。

結論係乜?

廣告

睇番游學修同劉鳴煒嘅對決,喂,未知其中一個係劉鳴煒之前,個個女仔都話好 buy 游學修㗎喎,點知一見樣,差不多全部去晒劉生嗰邊。劉生係乜都冇做過,講得激動啲,these women went nuts just because he was the son of a goddamn tycoon。

結論即係乜?

結論係,如果劉鳴煒睇中咗你女朋友,然後瘋狂追求佢,仲要買埋五卡鑽戒同佢求婚,基本上你死梗,基本上你以前同佢過得幾咁開心浪漫都死梗,因為第三者係劉鳴煒。

那當然,by the same logic,如果李澤楷睇中劉鳴煒嘅女朋友,劉生都要做童軍。因為去到李生 level,分分鐘唔係送鑽戒,而係帶你上太平山,遙望香港夜景,然後叫你求其指一棟大廈,當係禮金。

不過,其實小小一個香港地,都有好多女仔未必咁現實。

呢啲比較特別嘅女仔,唔係話唔需要樓,唔需要車,而係比起樓同車,佢哋更加需要一個佢哋睇得起嘅男人。

有個女性朋友,靚得好緊要,年紀同我一樣。因為樣靚,好多人追,仲要個個追求者唔係揸 Range Rover 就係波子。

最後,唔好話靚車,呢個女性朋友揀咗一個連車牌都冇嘅男人做佢老公。

佢老公係一間創業板公司嘅 CFO,人工「僅僅」六萬一個月。說「僅僅」,因為六萬一個月未必夠嗰啲揸 Range Rover 嘅二世祖攝牙罅。好記得好記得好記得,靚女朋友喺 facebook 咁樣寫過,超過二百人 like 佢個 post:「養得起我一世嘅人,如果我睇佢唔起,就算佢養得起我九世十世,我都冇可能同佢一齊。」

你可能覺得呢個女仔簡直係仙女,但我想話畀你聽,仙女,都係要人教出嚟。

呢位仙女嘅爸爸媽媽,根據而家嘅社會標準,應該係異類。

聞說,仙女嘅老公第一次見兩位老人家,未來外母就夾咗舊雞髀畀佢。有篇公屋潮文話,未來女婿有私人樓先會有雞髀食。現實中,呢位未來女婿有雞髀食,係因為,雖然個男仔中學讀男拔萃,但屋企好窮,佢中二開始就要出嚟做嘢幫補屋企。未來外母聽到好感動,雞髀是獎勵他這麼年輕就這樣有承擔。

佢哋結婚嗰日,外父致辭,好多人拍爛手掌。我 recap 一次呢位外父講嘅金句,希望畀所有覺得自己個女有樓先有幸福嘅變態父母聽:「阿權 (新郎哥)同我哋講,話想娶 Janice,我第一句係話好開心有佢呢個女婿,第二句就問佢哋結咗婚會喺邊度住。阿權個樣好驚,然後同我講佢儲緊錢買樓。我其實係想話,未搵到地方住嘅話,如果佢唔介意,同我哋住先。有冇樓都唔緊要,男人最緊要唔係有磚頭,係有膊頭。阿權,個女交畀你,我放一萬個心。」

游學修有冇膊頭,不得而知,但佢女朋友五官標緻,仙女咁靚,係不爭嘅事實。如果我係游學修,望住轉軚撲向劉鳴煒嗰班「女神」,我會忍唔住笑。

個個侏羅紀咁嘅樣,I mean, 絕種咁索。劉生,辛苦晒。

發表意見