立場新聞 Stand News

這條廣告 確然係勁

2016/5/15 — 15:13

圖片截自Nescafe 《情深咖啡未曾飲》廣告

圖片截自Nescafe 《情深咖啡未曾飲》廣告

這條廣告,確然係勁。

我話勁,唔係因為條片搞笑,唔係因為歌詞絕核,唔係因為腦細或劉江,大家心知肚明,係因為黎明。

黎明最近紅到一個點,佢玩 Facebook Live 打個乞嗤,都會有幾千Like,當然個個產品都希望能得到黎天王加持。但 Leon近年都已經好少接商業廣告,頂多幫幫公益宣傳。以黎明今日嘅人氣、地位與身家,本來我以為佢都唔會再接商品廣告,但現在竟然為一個咖啡品牌代言,仲要七情上面扮演儍氣又不失有型嘅 Office Boy,我嚇咗一大跳。

廣告

急急打電話問Nescafe 背後嘅品牌大腦 Kim,只為問一個簡單問題:「妳究竟點樣請得郁金句王黎明?」

一個品牌嘅成功,其實需要一個膽生毛嘅品牌負責人。

廣告

原來係Kim自己主動聯絡黎明公司傾合作可能,Leon第一件事,唔係傾錢,而係提出一定要先試咗隻產品再算。Kim 9 秒 9 把新配方咖啡送俾黎明,黎明飲過之後,竟然聯絡 Kim可以傾落去,就係咁,夢幻一般,黎明答應咗。(如此情節,令我諗起《食神》入面嗰個孱仔,拎住盒瀨尿牛丸,對住個銀行家講:「試吓吖!」)

鍾意就鍾意,唔鍾意就唔鍾意,唔好話乜嘢 L。I。K。E。黎明真係同Facebook 入面嘅佢一樣,愛恨分明到一個點。只要佢鍾意佢相信,竟然唔介意幫人賣番廣告。
大概 Kim 自己之前都估唔到會 Sell 到,抱著 Nothing to lose 嘅心態一試而已。呢個故事教訓我地樂觀嘅重要性,應該相信凡事都有可能。

Kim 唔係嗰啲「突然黎明」,當Leon Facebook 仲係五位數 Like嗰時,已看到黎明玩Facebook 嘅獨有魅力,很適合用喺 digital marketing 上面 。我之前寫嗰篇《黎明是最識玩 Facebook 的藝人》,正係剖析黎明嘅性格與演譯如何與 Facebook 玩法扣合。Kim在當時已聯絡黎明傾呢個合作,今天黎明 Facebook 爆紅,品牌如中 Jackpot。

一個品牌嘅成功,其負責人除了需要膽生毛,其實仲需要有眼界,一個能看準機會嘅眼界。

廣告嘅成功定義,乜都係假,最緊要引到人買。究竟盒咖啡有乜咁巴閉可以引到黎明出山呢?搞到我都好奇想買盒嚟試吓。

這條廣告,確然係勁。

原刊於作者facebook

發表意見