立場新聞 Stand News

造馬都要專業

2015/12/10 — 12:56

( 圖片來源:毛記電視《皆大撲飛》MV 截圖 )

( 圖片來源:毛記電視《皆大撲飛》MV 截圖 )

頭髮造型品牌Gatsby 一直以來做廣告夠出位,我諗大家都會好認同。在香港,佢大部分廣告都係直用(Straight Adaptation)日本原裝廣告,鮮有本地作品。從日本的木村拓哉、松田翔太到最近毛記起用林海峰賣Gatsby,真係有啲計。何解?四樣嘢:低成本、切合國情(廣告用一單低能騙案作為故事骨幹)、唱歌仔易入腦、同一公式(宅男眨下眼都可以變型男⋯⋯諗下都開心啦)。

毛記廣告,越收越多本地客,自己做埋創意同製作一站式,落到地、有共鳴、高效益。毛記電視,應記一功。其他電視台,擔心唔夠廣告,面臨執笠,係咪應該學下毛記,㸃樣可以殺出條血路?並唔係一定要搞笑、食字食時事、搞諷刺先至成功,但原地踏步就死路一條。



更值得一提的,係毛記下年年頭搞嘅首界「十大勁曲金曲分獎典禮」講到明就係分獎、造馬,總好過人家明係分豬肉但又扮公平、扮專業。毛記才剛做宣傳,我身邊就有大量朋友問我攞唔攞倒飛(仲要係打算用錢買果隻)。這個勁曲金曲,由當初的超玩味性質,搞到搬上專業表演舞台,有邊個估計得到?做每一件事,做得專業,成功的機會也自然高。講番之前搗破果單世紀電話騙案,你睇佢個運作模式、從招聘、培訓、獎罰制度等是何其專業?話説回來,如此專業老千,害人不淺,當然十惡不赦啦。

廣告

講到造馬分豬肉,廣告行內的情況也變得越來越少了。前晚出席廣告業介其中一個重要嘅頒獎禮,其認受性之所以高,就係出晒名評審專業嚴謹、唔分豬肉。能夠同一大班新知故友相聚,份外高興。然而,眼見有幾間活躍多時的大4As公司今年竟然完全絶跡,我心諗:「一係今年生意真係差成咁?一係就因為去年食白果所以嬲咗今年唔玩。」行頭變得越來越細、也越難做⋯⋯依家做廣告的,好似很多人都忘記了當初入行的本義,廣告要做得專業、玩也要玩得專業、入獎要專業、連造馬也要專業哩!

廣告

發表意見