人在中環 - CK

人在中環 - CK

我係一隻又笨又固執既豺狼。

2019/2/4 - 16:47

運勢與心情,其實緊密連繫

資料圖片,來源:Will O @Unsplash

資料圖片,來源:Will O @Unsplash

寫埋呢篇,就收爐了。

早幾日有個好熟命理八字嘅朋友同我講:「CK,你啲衰運差不多行完啦,捱多半年會好轉㗎啦…應該。」

「哈哈,是但啦。」我說:「呢幾年都黑到慣啦,死唔去就已經算係行運啦。」

廣告

朋友上年呢個時候同我講,話我狗年唔知係犯定沖定刑太歲……總之就同阿太歲哥過唔去咁啦。佢仲話,狗年直頭係我上半生運氣嘅谷底。好啦,年尾了,我望返打上呢一年,係咪真係咁差呢?

差,的確係差嘅。有親人過身、有錢財損失、有事業阻滯,瓣瓣都中一啲。當然心情唔係特別好,但我試過更差的。所以所謂運氣嘅谷底,其實只要心情還撐得住,感覺都唔係真係咁差的。

「俾你算到我行衰運又如何呢?」我苦笑:「查實又改變唔到啲乜,係咪?」

「又唔可以咁講喎。」相士朋友說:「知道會衰,個心打咗個底,咁到真係衰嗰陣,咪冇咁突然,心情咪冇咁跌蕩囉。嗱,你問心,我上年批死你今年冇運行,咁你真係冇運行啦,係咪?雖然都係行衰運,但係你一早預咗嘛,個心係咪好過啲先?心情好咗,就算係避咗好多劫㗎啦。運嘅嘢,有時,其實係感覺多過真實㗎。」

風水師呃你十年八年,但「運」同「心情」其實係緊密連繫嘅呢個講法,我 buy。

相士朋友仲有一個忠告俾我,就係當你知道自己行緊衰運嘅時候,盡量將手上嘅嘢,放慢一點去做。有啲重要嘅決定,可以拖住唔做,就盡量唔好做啦。問題係,大部份人行緊衰運嘅時候,其實都唔知、或者唔承認自己行緊衰運。喺行緊衰運期間,即使你幾咁 logical 都好,做出嚟嘅 decision,都總係會錯。錯,仲往往唔係即時俾你知道,而係長期影響住你往後嘅人生。

「err……咁唔係個個重要決定都拖得吖嘛……」

我又諗起上一篇提過嘅 Renee 了。喺佢認識現任老公之前不久,佢就被佢拍拖多年嘅前男友飛咗了。咁老實講前男友都唔係咩好人,不過去到談婚論嫁階段先至被飛,的確係傷嘅。佢喺嗰段時間,感情落空,工作又唔順利,總之頭頭都碰著黑。

跟住,佢就遇到現任老公,只係再過咗一年,就結婚了。

And the rest is history.

祝大家喺嚟緊嘅豬年事事順利,每日笑口常開。

 

(標題為編輯所擬,原刊於作者 Facebook