立場新聞 Stand News

「關公瞓街記」第六回:南昌街奇案

2017/11/18 — 20:33

上回說到會長偉誤入盤絲洞,眾人商議如何去銀星賓館救駕。祿叔話二人茍合唔係強姦,一大班人衝入去,蟬姐一旦報警,則大家肯定有要洗定八月十五坐籃。

朱滴想了一會,曰:「晚生倒有一計。」眾人忙問:「計將安出?」朱滴於是講古,話幾十年前有一打犯事件,犯人投訴幾個警察在一極底寒冷的冬天晚上,冇着衫只穿泳褲頭載潛水眼鏡呼吸管,衝入口供房打左佢一身。由於過程太過荒誕,法官完全唔相信事件,於是一眾差佬當庭釋放。之後有個導演叫彭浩翔製作左套《出埃及記》,第一場就拍此荒謬場景。今回大家照板煑碗扮鬼扮馬,包保蟬姐報警講乜都冇人信。

於是關公着番套古裝,朱滴穿潛水衣,老鬼勝扮美國隊長,福祿壽戴孫悟空朱八戒沙僧面具…。鄭旦做神奇女俠踢竇,芬姐睇水。一眾穿載完畢,直奔銀星賓館。

廣告

說說偉哥以為撈粗嘢遇到飛來蜢,一大清早就哄左條女去開房,心諗「正呀喂亅。正是「你有張良計,我有過牆梯」,蟬姐暗罵:「今回折墮囉,條死咸蟲連九龍塘房錢都慳番,話去乜爛鬼公寓…。正仆街,如果唔係公司話呢單係收購舊樓,大嘢佣金雙計,真係咪搞阿姐。」她心想,一陣整粒迷藥,加送波餅質暈條老柴,然後替佢在文件上打指模畫押,咁就收工。

二人抵達賓館入到房,蟬姐當然冇諗住上演足本《游龍戲鳳》全剧,但折子戲卻點都唔慳得。於是佢輕解羅裳奶罩,只剩番條底橫保住重要關隘,雙峯插雲引君入甕。

廣告

偉哥谷精上腦多時,此刻雙眼發光,正準備施以祿山之爪,蟬姐笑淫淫曰:「衰鬼咪咁心急。」之後在手袋拿出粒迷藥含在口中,吹氣如蘭細細聲講:「食左粒印度神丹再去沖涼,咁就唔會撻車死火,中途抛錨,搞到大煞風景。」跟着連隨送個西洋濕吻,嘴連嘴餵左粒藥比會長偉。再加送兩個波餅,一手推左偉哥入浴室。

偉哥快手快腳求奇沖兩嘢,隨即唱住小曲坐上牀,準備開工大戰三百回合。忽然之間,偉哥但覺天旋地轉頭暈暈,模糊間隱約聽到蟬姐講:「老人家年纪大,沖完熱水涼好疲倦的,瞓陣先啦…。」跟着便昏迷見周公去了。

大功告成!蟬姐即刻在手袋取出買賣協議書及印章,準備替偉哥打指模。千鈞一髮間,房門忽被踢開,蟬姐只見成隊騎呢怪衝進來,有紅面古裝佬、美國隊長、潛水人、朱八戒…。领頭的神奇女俠鄭旦大喝一聲:「你隻潘金蓮竟敢勾我老公,來人,大刑侍候。」說時遲那時快,朱滴一手塞左隻臭襪入佢口,連隨五花大缚。之後成隊雜牌軍雞手鴨腳,抬住偉哥出門,鬆人去也。

蟬姐嚇至呆若木雞。眾人消失後,才自行鬆缚。佢驚魂未定,衫都唔記得着便衝落樓叫救命。

此刻正是午飯時間,南昌街車水馬龍,熙來攘往。忽然間有件裸女狂奔。嘩,咁搞法,當然是好戲連場了。

發表意見